Македонија
Судии од кривичен оставија лице со инфаркт во притвор – лекови можел да пие и таму

Судиите Васка Николовска-Масевска, Горан Бошевски и Софче Гаврилова-Ефремова, како членови на кривичниот совет во Основниот суд Скопје 1, ја одбија жалбата на адвокатот на осомничениот Басри Ибраими од Тетово неговиот клиент, кој доживеа инфаркт, поради влошената здравствена состојба, наместо во Шуто Оризари, да добие куќен притвор.
Како што објави „Макфакс“, на 15 мај на oсомничениот Басри Ибраими од Тетово му се слошило во затворот „Скопје“, каде што ја издржува мерката притвор. Ден подоцна, кога лекарите му констатитрале инфаркт, на универзитетската Клиника за кардиологија му била извршена интервенција коронографија и му бил вграден стент.
Поради неажурноста на институциите, притвореникот со вграден стент над 2 недели лежел во затворот во Шуто Оризари зашто Клиниката и управата на затворот не можеле да ја обезбедат медицинската документација за судот да го разгледа барањето на неговиот адвокат и да го пушти од притвор.
Кога документацијата беше обезбедена, сепак кривичниот совет одлучи дека барањето на притвореникот за друга мерка треба да биде одбиено имајќи ги предвид природата на кривичното дело, степенот на кривичната одговорност и видот на казната што му се заканува, како и можноста од изрекување ефективна казна затвор. Осомничениот е обвинет за трговија со луѓе и шверцување мигранти.
Судиите навеле дека при донесувањето на одлуката ја имале предвид здравствената состојба на притвореникот, но во решението напишале дека ако лицето има потреба од медицинска помош, ќе му биде укажана во секое време. Во решението пишува и дека Клиниката за кардиологија во отпустното писмо констатирала оти пациентот е во стабилна општа состојба со пропишана таблетарна терпаија, која, според судиите, притвореникот може да ја прима и во затворот.
За одлуката на судот претставка е поднесена до народниот правобранител и до Хелсиншкиот комитет за човекови права.
Маргарита Цаца Николовска, судијка на Уставниот суд во Босна и Херцеговина и поранешна судијка на Европскиот суд за човекови права, за „Макфакс“ изјави дека решението за определување мерка притвор мора да биде крајно индивидуализирно и конкретизирано со наведување на аргументите поради кои се определува таа мерка, а не само со препишување на законските основи. „Секој притвор мора да биде образложен со аргументи, а не само со препишување на законскиот текст“, изјави Николовска за „Макфакс“.
Во Законот за кривичната постапка пишува дека при одлучувањето која од наведените мерки судот ќе ја примени, надлежниот орган ќе води сметка да не се применува потешка мерка ако истата цел може да се постигне со поблага. Судот мора да води сметка за притворот на осомничените и обвинети лица за времето додека се таму бидејќи тој е гарантот на почитувањето на законските прописи, а во конкретниот случај донесува одлуки што се директно на штета на здрајвето на притворените лица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Завршен првиот дел од санацијата на хидросистемот Ѓавато, кој повеќе од 4 години беше со пробиени цевки

Заврши првата фаза на санирање на хидросистемот Ѓавато. Бунарскиот дел е комплетно завршен, пуштена е водата и нема никаде протекување, објави премиерот, Христијан Мицкоски.
Тој додаде дека останува уште една интервенција на цевката за испуст и со тоа ќе бидат дуплирани количините вода кои ќе се влеваат во Дојранското езеро.
„Каква беше состојбата пред интервенцијата? Повеќе од четири години пробиени цевки на двата функционални бунари. Потрошени повеќе од половина милион евра за електрична енерија, а ефектот минимален или никаков. Два функционални од десет направени бунари. Негрижа и срам. Во втората фаза ќе обезбедиме најмалку уште две бунарски пумпи за зголемен капацитет и побрзо полнење на Дојранското езеро. Владата во втората фаза ќе го задолжи ФОД при ЕСМ (поранешно ЕЛЕМ) да ги репарира постојните потисни пумпи. Конечно во последната трета фаза ќе инсталираме сончеви панели со батерии за акумулирање на електричната енергија и сопствено производство на електрична енергија. Нема трошење милиони евра од буџетот за електрична енергија“, напиша Мицкоски.
Македонија
СДСМ ги објави имињата на уште 11 кандидати за градоначалници

Попладнево се одржа седница на Извршниот одбор на СДСМ. Членовите донесоа одлука со која е дадена согласност за кандидатури за градоначалници во уште 11 општини низ државата:
1. Бутел – Оливера Ливриниќ
2. Велес – Маја Хеско
3. Гевгелија – Миле Атанасов
4. Делчево – Дејан Глинџарски
5. Демир Капија – Лазар Петров
6. Конче – Благој Илиев
7. Кратово – Влатко Спировски
8. Кривогаштани – Игор Каравиловски
9. Македонски брод – Ивица Стојковски
10. Ранковце – Даниел Крстевски
11. Старо Нагоричане – Далибор Трајковски
„СДСМ јасно ја потврдува својата подготвеност да понуди силни, чесни, квалитетни и докажани кандидати за претстојните локални избори кои ќе работат во интерес на граѓаните и напредок на општините’“, соопштија од партијата.
Македонија
Гужва на границите: на Богородица и Табановце се чека по 40 минути

Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, информира АМСМ.
На ГП Богородица времето на чекање за влез е околу 40 минути, на ГП Дојран времето на чекање за влез е околу 20 минути, на ГП Табановце времето на чекање за излез е околу 30 минути, додека пак на останатите граничните премини од македонска страна нема подолги задржувања за влез и излез од државата.
Од денеска од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.