Македонија
Судијата лут на адвокатот на Јакимовски, кој поради корона, одложи рочиште, па отишол на друго судење

Адвокатот Виктор Цветковски, застапник на Стевчо Јакимовски, дојде на денешното судење за предметот што се води против актуелниот градоначалник на Карпош. Тој рече дека има направено тест на коронавирус и добил негативен резултат, а минатото рочиште беше одложено поради негово отсуство.
На ова реагира судијата Осман Шабани, кој му предочи на адвокатот дека два дена по одложеното рочиште, се јавил на рочиште за друг предмет.
„Во петокот ни одложивте рочиште, а преку еден ден во Штип се јавувате за притворски предмет. Значи, нивното здравје не е важно, нашето е?“, рече Шабани
„Во четвртокот беше позитивна. Во петокот се тестирав“, рече адвокат Виктор Цветковски, застапник на Јакимовски.
„За еден ден не се развива коронавирус. Барем не одете таму да го загрозувате здравјето. Знаеме веќе за тоа како се развива вирусот, секојдневие ни стана“, рече Шабани.
Јавниот обвинител рече дека нема одново да дава воведен говор и дека останува на истиот од претходно за Стевчо Јакимовски и за Александар Милошевиќ, иако процесот почна од почеток.
„За обвинетата Лилјана Трајковска и за Весна Стефанова постапките се одвоени и има првостепена пресуда“, рече јавната обвинителка.
Претходното рочиште за овој предмет се одржа на почетокот на ноември, еден ден по преземањето на функцијата градоначалник. Предметот се суди одново бидејќи судечкиот судија Горан Бошевски беше разрешен, а нов судија е Осман Шабани. За овој предмет, Јакимовски беше и во куќен притвор. Тој се гони бидејќи со неговите дејства Обвинителството тврди дека му направил штета од 7.209.600,00 денари, без ДДВ, на буџетот на Општина Карпош.
Според обвинителниот акт, обвинети се 6 лица. Првообвинетиот Јакимовски е обвинет за повеќе кривични дела злоупотреба на службената положба и овластувањето и едно кривично дело бесправно градење од Кривичниот законик. Тој се товари дека од 2011 до 2017 година како градоначалник во повеќе наврати ја злоупотребил службената положба и овластувањето во постапки за јавна набавка и во постапка за легализација на привремени објекти од деловен карактер и приватизација на градежно земјиште во државна сопственост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Времето денеска ќе биде сончево и многу топло, од утре засилен северен ветер, пороен дожд и грмежи

Времето денеска ќе биде сончево и многу топло со мала до умерена локална облачност. Ќе дува слаб до умерен ветер од јужен правец. Минималните температури ќе се движат од 11 до 19, а максималните од 26 до 38 степени.
Во Скопје, сончево и многу топло со мала до умерена облачност. Ќе дува слаб со умерен ветер од јужен правец. Минималната температура ќе биде 17, а максималната ќе достигне 38 степени.
УХМР информира дека од утре времето ќе биде сончево со мала до умерена облачност. Ќе дува умерен до засилен северен ветер, а дневната температура ќе опадне за 3 до 5 степени. Во попладневните часови ќе има услови за локална појава на нестабилност со пороен дожд и грмежи.
Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.