Македонија
Судијката за која Груевски тврдеше дека ќе го ослободи Заев, нема да му суди на премиерот

Судијката Добрила Кацарска за која експремиерот Никола Груевски тврдеше дека ќе го ослободи премиерот Зоран Заев, повеќе не е член на судискиот совет. Ова следува откако Обвинителството го преквалификува делото за Заев.
Сега, поради помалата предвидена казна затвор, случајот го суди судија поединец, Дарко Тодоровски.
Адвокатот на Заев, Филип Медарски, побара снимките набавени со посебни истражни мерки да не бидат доказ бидејќи, како што рече, за ова кривично дело Законот за кривичната постапка не го предвидува тоа. Клучен доказ повеќе нема да бидат посебните истражни мерки, туку изјавата на сведокот Иван Николов и другите материјални докази.
Адвокатот на Заев во завршните зборови рече дека сведокот потпишал три записници и дал три искази, кои се контрадикторни едни со други.
„Сведокот рече дека постапувал по инструкции на Обвинителството: ‘Како ќе ми наредеа, јас така правев’“, го цитира Медарски исказот на сведокот.
Тој дополни дека сведокот во МВР кога го пријавувал случајот се сретнал со Митко Чавков, директор на БЈБ, кого го знаел и претходно, и тоа, како што рече, се сретнале неколкупати. Потсети на исказот на сведокот, во кој тој потврдил дека против сведокот Обвинителството води истрага.
Медарски потсети на изјавата на сведокот, кој рече: „Јас го терав тоа да го каже“. Адвокатот додаде дека целта на предметот е за дискредитација на Заев и за негово оцрнување со цел да не бидат објавени бомбите.
Претходно, Обвинителството побара преквалификација на делото и пониска казна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Се укинуваат визите за Обединетите Арапски Емирати

Последната посета на Обединетите Арапски Емирати го донесе првиот конкретен резултат. На наше барање, тие ги укинуваат визите кои беа потребни за патување кон оваа земја, објави премиерот Христијан Мицкоски на социјалните мрежи.
Наскоро, како што појаснува, со конкретната примена на одлуката за без визното патување ќе се влијае на посилна економија, слободно патување, зајакнување на меѓусебното партнерство.
„Се бориме на секој можен начин да се помогне на нашите граѓани, и со секој ден да се носат промени за заедничката иднина“, пишува Мицкоски.
Македонија
Судот ѝ го одзеде пасошот на претседателката на антикорупциската комисија, која споделувала службени тајни на „Вибер“

На претседателката на антикорупциската комисија, Татјана Димитровска, одземен и’ e пасошот, откако Кривичниот суд го прифати предлогот за определување на мерки за претпазливост, како осомничена во дополнетата истрага за предметот „Адитив“.
Таа се сомничи дека преку апликациите за пораки „Вибер“ и „Ватс ап“ му оддавала службени тајни на друг обвинет за поведени постапки, за отворање предмети и одлуки против сега обвинетите фирми и лица во предметот „Адитив“, како и податоци за проверка на имот и неговото семејство.
Судот определи и забрана за преземање одредени работни активности поврзани со кривичното дело, што подразбира дека осомничената не смее да има контакт со предмети, пошта и друга документација поврзана со работењето на ДКСК, воедно не може да гласа и да распределува предмети.
За првоосоничениот Б.Н. кој се товари за злосторничко здружување, злоупотреба на постапка за јавни набавки и перење пари, определена е мерка притвор во траење од 30 дена, соопшти Кривичниот суд.
И за осомничената Б.П.М., определени се мерки за претпазливост, односно привремено одземање на патната исправа и забрана за издавање нова и забрана за преземање одредени работни активности поврзани со кривичното дело.
Против овие решенија странките имаат право на жалба.
Македонија
Девет лица завршија во притвор поради злоупотреби со инвалидските пензии и туѓата нега

На деветмина осомничени од уапсените 23 во акцијата за туѓата нега, судот им одреди мерка притвор од 30 дена.
Едно лице сè уште е недостапно за органите на прогонот.
Притворот за деветмината осомниченни е определен поради опасност од бегство, попречување на истрагата со влијание врз сведоци и опасност од повторување на делото, информираа од Кривичниот суд.
Петмина завршија во куќен притвор, додека за девет лица, судот определи мерки на претпазливост, односно обврс да се јавуваат во судот и привремено одземање на патната исправа и забрана за издавање нова.
Во истрагата на Обвинителството се опфатени вкупно 49 лица. Се работи за две криминални групи чии членови разработиле шема преку која на лица баратели на социјални услуги им овозможувале да добијат право на туѓа нега и инвалидска пензија. Меѓу осомничените има и лекари специјалисти кои биле претседатели Стручната комисија за издавање наод, оцена и мислење за потребата од помош и нега од друго лице.