Македонија
Талески: За една година владеење ВМРО-ДПМНЕ ја загрози иднината и ја врати државата цела деценија назад

На денешната собраниска седница, пратеникот од СДСМ, Миле Талески, упати критика до владејачкото мнозинство предводено од ВМРО-ДПМНЕ за ребалансот на буџетот, критикувајќи ги како што рече, лошите економски, но и погрешните политики на власта кои според него за само една година ја вратија државата цела деценија назад, како во времето на Никола Груевски, загрозувајќи ја нејзината иднина.
„Ова е ваш буџет, кој самите го подготвивте, и за кој сега предлагате ребаланс. Ниту буџетот што беше изгласан во декември покажа дека имате план и визија, ниту пак овој ребаланс покажува дека знаете како и што ќе направите во интерес на граѓаните. Тотално покажувате дека немате план и не знаете каде терате,“ истакна Талески.
Тој ја обвини Владата за економска неспособност и целосен аматеризам во спроведувањето на економските политики за што цената ја плаќаат граѓаните:
„Немате план, немате стратегија, не знаете што правите. Во исто време граѓаните осиромашуваат, цените се повисоки, платите не растат, нивната вредност опаѓа.“ рече Талески.
Се осврна и на влошувањето на меѓународната позиција на земјата, закочениот европски пат и негрижата на власта за македонските национални интереси
„Не се грижите ниту за јазикот, ниту за идентитетот, ни за достоинството на Македонија. Се грижите само за себе и вашите партиски интереси,“ рече Талески.
-Мислите дека Бугарија е проблемот, а всушност вие сакате да го бугаризирате македонскиот народ со тоа што не правите ништо за да го продолжиме европскиот интеграциски пат. Свесни ли сте дека токму поради вас, сè повеќе луѓе заминуваат, бараат бугарски пасоши и се изјаснуваат дека имаат бугарско потекло? Тоа не го прават зашто сакаат, туку зашто сакаат подобра иднина – бараат просперитет и европски вредности. А вие, наместо да понудите надеж, ги терате да бегаат, рече пратеникот на СДСМ.
Тој обвини дека на сите полиња државата уназадува.
Државната администрација е потполно партизирана и дека се спроведуваат притисоци за вработувања пред избори:
Безбедносната состојба, е драматично влошена, дециден е Талески, граѓаните не се чувствуваат безбедни:
„Македонските градови станаа див запад, се пука насекаде, има убиства речиси секој втор ден, се палат автомобили, се газат луѓе на пешачки патеки. Тоа е резултатот на ВМРО-ДПМНЕ“ рече пратеникот на СДСМ, Миле Талески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нов спортски комплекс на „Пољана“ во Хром

Општина Ѓорче Петров започна со реализација на еден од, како што велат од таму, најзначајните инфраструктурни проекти за спорт и рекреација – изградбата на современиот спортски комплекс „Пољана“ во населбата Хром, кој се простира на површина од 1.450 м².
Комплексот ќе содржи: фудбалско игралиште со вештачка трева, со модерна подлога и целосно нов изглед, две кошаркарски игралишта, опремени за тренинг и натпревари, фитнес зона на отворено, со справи за активен и здрав живот и детско игралиште, замислено како безбеден и весел агол за најмладите.
„Хром заслужува современ спортски простор, а токму ‘Пољана’ ќе биде местото кое ќе ја оживее спортската и општествената енергија на оваа населба. Чекор по чекор, со многу работа и љубов, ја градиме иднината на Ѓорче Петров – заедно со сите вас. Со изградбата на комплексот „Пољана“, Општина Ѓорче Петров уште еднаш ја потврдува својата посветеност за подобрување на животниот стандард и создавање квалитетни услови за спорт, дружење и здрав живот“, изјави градоначалникот Александар Стојкоски.
Македонија
Имам понуди за меѓународни позиции, но нема да ја напуштам позицијата градоначалник на општина Чаир, вели Османи за кандидатурата

„Јас немам план Б или резервен план, освен Чаир“, изјави кандидатот за градоначалник на општина Чаир, Бујар Османи. Тој упати остар предизвик кон својот опонент Изет Меџити од „Влен“. Османи го повика Меџити законски или преку изјава кај нотар да се обврзе дека нема да ја напушти позицијата градоначалник доколку ја добие во замена за каква било друга функција.
Османи ги отфрли и како неточни тврдењата дека ја користи трката за Чаир само за повторно да добие владина позиција.
„Јас ќе потпишам дека нема да ја напуштам канцеларијата или позицијата градоначалник на општина Чаир сè додека не одлучат граѓаните и преземам обврска пред луѓето. Еве јас сум подготвен законски да потпишам дека, независно каква понуда ќе имам, домашна или меѓународна, бидејќи имам и понуди за меѓународни позиции. Нема да ја напуштам позицијата градоначалник на општина Чаир зашто ова за мене е мисија и сум влегол со целото мое битие, со моето знаење, со моето искуство, во овој процес“, изјави Османи.
Тој порача дека најголемата разлика помеѓу него и неговиот опонент е во искрениот пристап кон Чаир и немањето резервна адреса за живеење и за функција.
„За разлика од мојот политички опонент за кого Чаир е резервен план. Не се трга од Владата со идејата: ако победам добро, ако не победам, се враќам во Владата. Зеде фиктивна адреса во Чаир – ако победам добро, ако не, се враќам таму каде што живеам, во друга општина“, рече Османи.
Тој потенцира дека тука пораснал тој, но и неговите деца и дека целиот негов професионален и политички капитал е вложен во Чаир.
Македонија
Николоски – Ле Риголер: презентирани можностите за почнување и унапредување значајни инфраструктурни проекти

Вицепремиерот и министер за транспорт Александар Николоски денеска оствари средба со Кристоф Ле Риголер, амбасадор на Француската Република, на која се разговараше за унапредување на економската соработка меѓу Република Македонија и Француската Република.
На средбата присуствуваа и претставници на бизнис заедницата на Француската Република пред кои беа презентирани можностите за отпочнување и унапредување на значајни инфраструктурни проекти од стратешка важност за државата.
Беа потенцирани добрите билатерални односи меѓу двете земји и разменети мислења и ставови за политичките и економски прашања во земјава и регионот.
Вицепремиерот Николоски ги претстави развојните планови на Владата и планираните инфраструктурни проекти, особено проектите кои имаат регионално значење и со кои се придонесува за забрзан економски развој на земјите од регионот.