Македонија
Таравари ги пречека хероите од Ласкарце
Делегација на месната заедница на селото Ласкарце, предводена од претседателот Самет Мисини, денеска ја посети општина Гостивар за на градоначалникот Арбен Таравари и на граѓаните на Гостивар да им изразат сочувство за загинатите и желби за брзо оздравување на преживеаните од трагедијата од 13 февруари.
„Постојано ги броиме жртвите, но понекогаш забораваме дека таа трагедија ја преживеаја 38 други лица, и сето тоа, пред сè благодарение на придонесот на овие луѓе, кои дојдоа денес тука кај нас да ни изразат сочувство, и благодарение на нивните соселани, кои со сите сили им излегова во пресрет и успеаја да спасат многу животи. Секако, Гостивар им должи на овие луѓе почит и вечна благодарност“, истакна Таравари.
Тој информираше дека утре во 13 часот ќе го посети местото на настанот, при што ќе се сретне и со жителите на ова село херој, ќе им се заблагодари и ќе побара предлози од нив за некој инфраструктурен проект којшто Општина Гостивар, во рамки на можностите, ќе може да го реализира како донација.
„Преку овој проект, би сакал ние како гостиварци да ги зајакнеме односите со жителите на Ласкарце, секогаш да се сеќаваме на овие херои и ова да послужи како пример за хуманост и солидарност“, подвлече градоначалникот Арбен Таравари.
„Не може со зборови да се опише ужасот што го видовме ние кои први истрчавме за да помогнеме. Ние како народ сме хумани луѓе и помагаме во тешки моменти. Како претседател на месната заедница, им се заблагодарувам на моите соселани што толку брзо се мобилизираа и организирани со сите можни средства да помогнат колку што е можно повеќе луѓе да спасат“, истакна претседателот на МЗ Ласкарце, Самет Мисини.
Градоначалникот на Гостивар, Арбен Таравари, во знак на почит и благодарност, на претседателот на МЗ Ласкарце, Самет Мисини, му додели благодарница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пролетен неделен ден во зима со температури до 16 степени
Претпладне по одделни котлини ќе има услови за појава на утринска магла. Во текот на денот ќе преовладува сончево време со мала до умерена облачност. Ќе дува слаб ветер претежно од јужен правец.
Минималната температура ќе биде во интервал од -4 до 5, а максималната ќе достигне од 12 до 16 Целзиусови степени, информираат од Управата за хидрометеоролошки работи.
Во Скопје, исто така се очекува сончево време со мала до умерена облачност и со слаб југоисточен ветер. Во делови од котлината ќе има услови за појава на утринска магла. Минималната температура се очекува да се спушти до 0, а максималната да достигне до 15 Целзиусови степени.
Според синоптичарите, до среда ќе се задржи стабилно и релативно топло време. Утрата ќе бидат постудени со појава на слаба магла по одделни котлини. Во четврток и петок ќе има услови за слаби локални врнежи од дожд.
Македонија
Родителите на децата загинати во Пулс порачаа дека правда мора да има
Родителите на загинатите во трагичниот пожар во „Пулс“ поладнево на „Марш за ангелите“ порачаа дека нема да дозволат одговорните за трагедијата на нивните деца да ја избегнат правдата, иако, велат на обвинителната купа седат само дел од лицата поврзани со трагедијата.
-Суштината е одговорноста. Факт е дека денес на обвинителна клупа седат дел од лицата поврзани со трагедијата. Но, исто така факт е – болен, непобитен факт – дека постојат луѓе со многу поголема моќ, обврски и надлежности, кои воопшто не се ни опфатени. Луѓе кои имале должност да спречат, а не спречиле, рече Александар Наунов, претседател на Здружението на граѓани „16 Март 2025 Кочани“.
Тој, во изјавата за медиумите, истакна дека се најавува свикување колегиум на обвинителите за повторно разгледување и евентуално ослободување на дел од обвинетите.
-Колегиумот (на обвинители) може да прегледува документи, но не може да брише факти, не може да брише пропусти, не може да брише нечии должности што биле игнорирани. Не може да избрише нечие непостапување кога тоа било прашање на живот и смрт, смета претседателот на ЗГ „16 март 2025 Кочани“.
Според Наунов, суштината не е во тоа кој трчал, кој се плашел, а кој спасувал, туку кој имал должност, а не ја извршил.
-Ние не сме овде за одмазда. Ние сме овде за правда. За ред. За систем што ќе ги штити децата – не систем што ќе ги остави да загинат. Родителите никогаш не се откажуваат. Можеби ќе нè уморите, но нема да нè скршите. Можеби ќе не одолговлекувате, но нема да не замолчите. Вистината ќе излезе на виделина, рече Наунов.
Протестниот марш денеска започна од „Паркот на Револуцијата“, а заврши пред Основниот суд и обвинителство во Кочани.
Македонија
Претседателката за утре го свика Советот за безбедност
По извршените консултации претседателката Гордана Сиљановска – Давкова за утре – 1 март 2026 година, закажа седница на Советот за безбедност.
Како што соопштија од Кабинетот на претседателката Сиљановска – Давкова, седницата ќе започне во 18 часот во Вилата Водно, а на дневен ред ќе биде безбедносната состојба во земјава по најновите случувања на Блискиот Исток.

