Македонија
Тајни седници се држеле во Судски совет за да по вторпат се разреши Дамева, новиот челник тоа е паметно постапување
Тајни седници си држеле членовите на Судскиот совет, за да го повторат гласањето за точката за разрешување на Весна Дамева. Во четири ѕида, била повлечена одлуката за разрешување на Дамева со седум гласови, па повторно се гласало и со девет гласа ја тргнале од функцијата. Сашко Георгиев, новиот избран претседател, уште неседнат, кажа дека свесно била исклучена јавноста.
„Имаше дискусии кои не се за во јавност. И повторно ќе ве повикам, сите знаеме, во сите институции, медиуми – има работи има проблеми, особено во делот на меѓучовечки односи. Не е одлука во смисла на тоа дека сакаме да скриеме нешто од јавноста. Дали требаше да продолжиме со состојба како што почнавме, каде јавноста гледа Судски совет, а да се доведеме во ситуација интегритетот да биде на очиглед на јавноста. Мислам дека паметно постапивме во тој дел. Мислам дека во најголем дел меѓу нас е вратена довербата“, рече Герогиев.
Тој беше избран за претседател по работното време на Судскиот совет, на седница која ја доби назнаката „вонредна“. Како што претходно се шпекулираше Георгиев го зазема местото на разрешената Весна Дамева, откако попладнево беше избран со 8 гласа „ЗА“ и 4 „против“.
Разрешувањето на Дамева помина во тензична атмосфера. Тајната седница била одржана оти за нејзиното разрешување гласаа седум членови, иако е избрана со осум членови. Меѓу тие што гласаа беше и предлагачот на точката Селим Адеми, кој е и заменик-претседател на Судски совет. Се доведе во прашање неговиот глас оти предлагач не може да гласа. Во Деловникот за работа нема пропишана процедура за разрешување, ниту има ваква можност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Земјотрес во Скопје
Земјотрес во 21:46 часот беше почувствуван на територијата на Скопје.
Според информациите, земјотресот бил со јачина од 2,9 степени според Рихтеровата скала.
Длабочината на потресот, според информациите од ЕМСЦ е 6 километри.
Македонија
ВМРО-ДПМНЕ: Безобразно е СДС да бара покачување на платите на наставниците, а не оставија буџет ниту за исплата на основните плати
Срамно е СДС да зборува за покачување на платите на наставниците и да се поставува во улога на нивен заштитник, кога во буџетот не оставија средства за исплата ниту на основните плати до крајот на календарската година, реагира ВМРО-ДПМНЕ преку допис до медиумите.
„Манипулираат со податоци за покачувања на плати, кои патем, инфлацијата што самите ја создадоа, целосно ги анулираше и како и сите други граѓани, така ги доведе и наставниците во исклучително тешка економска положба.
СДС и нивниот коалиционен партнер ДУИ буџетот за образование за 2024 година го потрошија во првите 6 месеци од годината. Новото раководство на министерството наследи буџетски дефицит од 5 милијарди денари. Немаше пари ниту за исплата на основните плати на наставниците, а не пак за нивно покачување. Иако во СДСМ се свесни дека наставниците го знаат ова, немаат проблем да се претставуваат како нивни поддржувачи.
Новата Влада предводена од ВМРО – ДПМНЕ со ребалансот на буџетот обезбеди средства во износ од 900 милиони денари за да можат наставниците да добиваат плата до крајот на тековната година. Во новиот буџет веќе се предвидени и средства за нивно зголемување следната година.
Освен на подобрувањето на материјалниот статус на наставниците, програмата на Владата предвидува и повеќе можности за кариерен и професионален развој, значително подобрување на условите за работа, како враќање на општествената вредност и почит кон наставничката професија“, се вели во соопштението на ВМРО-ДПМНЕ.
Македонија
Меџити: Ги стопиравме штетните дозволи кои претходната Влада на ДУИ и СДСМ ги додели на он-лајн коцкарници
Првиот Вицепремиер Изет Меџити изјави дека на денешната седница на Владата се донесе одлука за реализација на толкувањето од Собранието за престанок на важноста на нелегалните лиценци за он-лајн коцкарници издадени од Владата на ДУИ, а со тоа и запирање на он-лајн коцкањето во државата.
„Ги стопиравме штетните дозволи кои претходната Влада на ДУИ и СДСМ ги доделија на српски фирми, црногорски и други. Стопиравме можност нашите деца да имаат коцкарници на своите телефони, во своите компјутери од дома и од училиште. Ветувањето пред изборите, денес станува реалност. Остануваме луѓе од збор. Нема да дозволиме личното богатење на поединци од претходната Влада да биде причина за илјадници осиромашени семејства на наши сограѓани“, рече Меџити.
Како што додаде, врвен приоритет на владата е заштитата на граѓаните, а посебно на младите луѓе.
„Да ги заштитиме од долгови, банкрот, зависност од коцкање, последователно да ги заштитиме од социјални и фамилијарни потешкотии, да ги заштитиме од судир со законот и нелегални активности кои секогаш се последица на коцкањето“, изјави Меџити.
Според него, отсуството на јасна процедура, претходната Влада свесно ја користела за создавање на нови и нови компании за он-лајн и интернет коцкање, а интерес имале поединци од врвот на ДУИ и претходната Влада, додека штетата била на илјадници наши сограѓани.
„Ветивме дека ќе се бориме против ова зло, денес покажуваме на дело. Нема да запреме додека не создадеме услови за пристоен живот”, рече Меџити.