Македонија
Тито Петковски: Преспанскиот договор е историска можност за македонска промоција во светот

НСДП денес во Скопје на свечен начин одбележа 14 години од своето формирање. На роденденската прослава присуствуваа претставници од сите општински организации на партијата, на која свое обраќање имаше претседателот Тито Петковски.
„Со јасна идеја и политичка програма пред 14 година НСДП исчекори на политичка сцена во Северна Македонија, со нов политички квалитет втемелен во вредностите на модерната европска социјалдемократија успеавме да изградиме политичка виталност и цврстина сите овие години да ја одржиме и развиваме нашата препознатливост во партискиот плурализам на државата. Негувањето на внатрепартиската демократија и внесувањето на морални начела во партиското делување создаде атмосфера на меѓусебна доверба и одговорност, на меѓусебно почитување и разбирање, што низ сите овие години резултираше во еден силен партиски колектив кој знаеше да ги согледа предизвиците со кои се соочува државата и да понуди идеи и одговори на истите“, рече претседателот на партијата Тито Петковски пред присутните членови, нагласувајќи дека стекнатото политичко искуство и изградената јасната идеолошка позициононираност ветува силен потенцијал и за понатамошно засилено делување во политичкиот простор.
Зборувајќи за програмските подготовки за претстојните парламентарни избори, Петковски истакна дека и во овој изборен циклус партијата е отворена да го слушен гласот на граѓаните, нивните идеи и предлзои за тоа како гледаат и размислуваат за насоката во која треба да се развива државата.
„Начелото на еднаквоста мора да биде запазено во креирањето и водењето на економските политики. Економскиот раст и развој на државата треба да биде во чекор и со развојот на човечкиот капитал. Зајакнувањето на образовните, културните и научните темели на општеството станува имератив, само на тој начин можеме да акумулираме и ослободиме креативен човечки капитал. Вистинско време е овие општествени сфери да го добијат својот приоритет во партиските и владините програми“, истакна Петковски и дополни дека само на тој начин може да се обезбедат долгорочни развојни перспективи пред државата, притоа проследени и со радикална трансформација во делот на работните односи, што помеѓу другото треба да доведе ид о надминување на конфликтот помеѓу трудот и капиталот.
Оценувајќи ја и енергетиката како една од сферите која треба да добие приоритет во изборната програма на партијата, Петковски истакна дека е потребно засилување на институционалната и буџетската поддршка за напуштање на употребата на фосилните горива и се поголема искористеност на енергијата од ветрот и сонцето во Северна Македонија.
„Разгорувањето на националистичката реторика, предизвикано со последните случува околу Законот за употреба на јазиците и ставот на Бугарската академија на науките околу постоењето на македонскиот јазик, се закнува да ја контаминира предизборната политичка сцена со теми кои се далку од западно-европските демократски дострели и вредности. Овој изнасилен предизборен политички контекст, кој нема никакви основи во реалните потреби и приоритети на граѓаните, бара од сите политички партии да покажат сплотеност и одговорност, политичка мудрост и созреаност. Во пресрет на правењето на финалниот чекор за полноправно членство во НАТо и ЕУ ќе биде преголем историски луксуз да дозволиме нашето мултиетничко, мултикултурни и мултирелигиозно општество, да биде предизборен политички ресурс на ретроградни центри на моќ“, рече Петковски.
Осврнувајќи се на политичките и економските придобивки од полноправното членство на Северна Македонија во ЕУ и НАТО, Петковски стави фокус и на културните перспективи кои се отвораат со реализацијата на овие стратешки цели.
„Со Преспанскиот договор и одблокирањето на евро-атланските интеграциски процеси добиваме историска шанса да се претставиме пред светот, да ја покажаме своја културна различност, своја мултиетничност, но и својот македонски идентитет, кој со овој договор го потврдивме. Со малку поголема сплотеност, со јасна идеја и визија, овој договор треба да го прифатиме и како историска можност за македонска промоција во светот како народ, како култура, како традиција. Да не дозволиме и оваа историска шанса, како многу други назад низ историјата, да замине пред нас без да ја забележиме и искористиме за културна афирмација“, порача Петковски пред своите сопартијци.
На одбележувањето на роденденот на партијата беа доделени и 14 плакети на нејзини членови, како признание за нивниот личен допринос во формирањето, развојот и градењето на партијата и нејзината препознатливост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Република Македонија во Рим го одбележува денот на Свети Кирил и Методиј

Министерот за култура и туризам, Зоран Љутков, денеска и утре престојува во Рим, Италија, како член на државно-црковната делегација предводена од претседателката на Република Македонија, Гордана Сиљановска-Давкова, по повод чествувањето на денот на светите браќа Кирил и Методиј.
Делегацијата денеска присуствуваше на молебенот во базиликата „Сан Клементе“ во Рим, со кој чиноначалствуваа владиците Јосиф и Јаков, заедно со претставници од Македонската православна црква – Охридска архиепископија.
Во рамките на културната програма, организирана по повод манифестацијата „Македонија во чест на Свети Кирил“, министерот Љутков утре (24 мај) ќе присуствува и ќе има обраќање на концертот на маестро Симон Трпчески и квинтетот „Македонисимо“, што ќе се одржи во историскиот простор „Хорти Салустијани“ („Horti Sallustiani“) во вечниот Рим. Ќе бидат изведени дела од Едвард Григ, Петар Илич Чајковски и македонскиот композитор Панде Шахов.
Претходно, според предвидената агенда, државно-црковната делегација утре ќе го посети гробот на папата Франциск, а ќе положи и свежо цвеќе пред спомен-плочата на македонски јазик во чест на Свети Кирил во базиликата „Санта Марија Маџоре“.
Поклонението на гробот на Свети Кирил во базиликата „Сан Клементе“ во Рим е востановено во 1969 година, по повод 1100-годишнината од неговата смрт, и оттогаш се одбележува секоја година на 24 мај, со највисоки почести од државно-црковната делегација.
Македонија
Временска прогноза за викендов: дожд, грмежи, засилен ветер и пониски температури

Времето утре ќе биде променливо облачно и нестабилно со повремени врнежи од дожд, проследени со грмежи и засилен ветер. Пообилни врнежи ќе има кон крајот на денот и во текот на ноќта, особено во источните и јужните делови.
Минималната температура ќе биде во интервал од 8 до 15, а максималната ќе достигне од 18 до 25 степени.
Во Скопје утре ќе биде променливо облачно и нестабилно со повремен дожд, повремено пороен проследен со појава на грмежи и засилен северен ветер. Во делови од котлината ќе има услови за краткотрајно невреме. Минималната температура ќе се спушти до 13, а максималната ќе достигне до 21 степен.
Во недела времето ќе биде променливо облачно и посвежо со повремени врнежи од дожд, проследени со ретки грмежи. Врнежите ќе бидат пообилни во источните делови (над 30л/м2). Повремен локален дожд ќе има и во понеделник претпладне. До среда ќе дува засилен северен ветер.
Македонија
Силно одбранбено партнерство и целосна усогласеност со заедничката надворешна и безбедносна политика, Мисајловски и Калас ги посетија Балканските медицински наменски сили

Министерот Владо Мисајловски и високата претставничка на Европската Унија за надворешни работи и безбедносна политика, Каја Калас денеска (23 мај) ги посетија Балканските медицински наменски сили (Balkan Medical Task Force) каде извршија увид во опремата со која Европската Унија го поддржа развојот на оваа регионална организација.
Министерот Мисајловски истакна дека поддршка од Европската Унија, но и од сојузниците во градење на македонските одбранбени капацитети се должи на искрената посветеност, подготвеност и професионалност во зачувувањето на мирот, стабилноста и безбедноста на регионот и пошироко.
„Европската Унија ја препозна нашата искрена заложба за зајакнување на безбедноста вклучувајќи го и придонесот во мировните мисии и операции и одговори позитивно на барањата за зајакнување на македонската Армија со помош во опрема во висина од 40 милиони евра“, рече министерот.
Тој додаде дека европската помош се однесува на „ опрема за потребите на инженерија, за воено медицинскиот центар, за Лесната пешадиска баталјонска група, за логистиката, технологии поврзани со разузнавање, набљудување и извидување, електронско војување, комуникациско – информациски системи, системи за команда и контрола, заштитна опрема“ и посочи дека со оваа помош е опфатена и обука на персонал.
Високата претставничка на ЕУ за надворешни работи и безбедносна политика, Калас за Балканските медицински наменски сили рече дека се силен пример за регионална соработка што дава резултати.
„Европската Унија ја поддржува оваа иницијатива и политички и финансиски, бидејќи таа точно го одразува она за што се залагаме во Западен Балкан: доверба, партнерство и постигнување видливи резултати за луѓето. Оваа иницијатива е уште поважна бидејќи се однесува на спасување животи“, рече Калас.
Калас посочи дека Северна Македонија е доверлив партнер, целосно усогласен со Заедничката надворешна и безбедносна политика на ЕУ, придонесувајќи во операциите на ЕУ, особено во ЕУФОР АЛТЕА во Босна и Херцеговина и истакна дека јасноста и конзистентноста во геостратешката ориентација на нашата држава „се клуч што би можел да отклучи подлабока одбранбена соработка со ЕУ“.
Балканските медицински наменски сили се меѓународна организација со седиште во Скопје, формирана со цел да обезбеди брз и координиран одговор при катастрофи предизвикани од природни непогоди или човечки фактори. Земји членки на БМНС се Северна Македонија, Албанија, Босна и Херцеговина, Србија, Словенија и Црна Гора.