Македонија
(Видео) Тодев: Доколку за 30 дена не бидат прифатени барањата, затворска полиција ќе излезе на улица

Независниот синдикат на полицијата им даде 30 дена рок на институциите да ги исполнат барањата на затворската полиција, односно да се потпише колективен договор со кој ќе бидат подобрени условите за работа на полицајците или во спротивно сите припадници на затворската полиција низ земјата ќе престанат со работа и ќе излезат на улица да протестираат.
„Откако ќе биде свикана комисијата која треба да ги одобри барањата, 30 дена е рокот тие да ги поминат сите процедурални комисии и да стигнат на пленарна седница. Во наредниот период доколку на сите овие прашања за кои денеска разговаравме наидеме на негативности, сите затворски полицајци ќе излезат на улица“, изјави претседателот на Незавнисниот синдикат на полицијата, Гоце Делчев Тодев.
Денеска гранскиот Независен синдикат на полицијата организираше синхронизиран протестен марш при што беа посетени две министерства, Министерството за земјоделство и Министерството за правда, каде раководството на синдикатот разговараше со надлежните со цел зголемување на правата и подобрување на условите за работа на затворската и шумската полиција.
„Во Министерството за земјоделство поминавме поедноставно, имавме еден час разговори со претставниците, а во Министерството за правда одеше поотежнато, со директорот на Управата за извршување и санкции разговаравме 2,5 часа“, вели Тодев.
Според него, исходот од разговорите е позитивен, сите барања се ставени на хартија и в среда треба да бидат доставени до комисијата каде претседателот на Независниот синдикат во КП Идризово ќе ги презентира забелешките со цел отстранување на негативностите кои во наредниот период треба да бидат надминати.
„Законот за затворската полиција мора да биде применлив, односно прифатен од сите директори во затворите и на се она што беше во минатото проблем да ставиме крај и да започнеме еден нормален процес за нивно функционирање“, додаде тој.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Поништена јавната набавка за 120 електрични eко автобуси

Министерството за транспорт ја поништи јавната набавка за избор на понудувач за набавка на 120 електрични еколошки автобуси за јавен превоз и станици за полнење.
Оттука информираа дека на јавниот повик кој беше објавен 17 јуни со краен рок за достување на понудите 24 јули 2025 година, само една компанија доставила понуда.
„По извршената евалуација, Комисијата надлежна за спроведување на јавната набаака, утврди дека компанијата не ги исполнува критериумите согласно објавениот јавен повик“, се наведува.
Министерството за транспорт во следниот период ќе направи дополнителни анализи околу набавката на електрични еколошки автобуси и ќе ја информира јавноста.
Македонија
ВМРО-ДПМНЕ го оцени како ефикасно справувањето со пожарите во Македонија, во споредба со земјите од регионот

ВМРО-ДПМНЕ оценува дека институциите под водство на оваа Влада успешно реагираат на пожарите кои ги зафатија повеќе подрачја во Македонија, посочувајќи дека нашата држава покажува ефикасно справување.
Вчера во Македонија беа регистрирани 20 пожари на отворен простор, од кои десет се активни, пет се ставени под контрола, а пет се целосно изгаснати. За разлика од останатите држави во регионот, заклучува партијата, кај нас нема евакуирани и раселени лица, ниту човечки жртви, а причинетата штета е ограничена само на шумски површини.
„Ова не е резултат на среќа, туку на брза, организирана и професионална интервенција на сите надлежни служби“ се наведува во соопштението на партијата.
Во Турција, над 3.500 граѓани се евакуирани, а загинаа 17 лица, од кои дури 13 пожарникари. Огнот зафати и градски области, предизвикувајќи уништување на куќи и инфраструктура.
Во Албанија, каде што активни се 45 пожари, евакуирани се над 2.000 луѓе, изгореа над 20 куќи, а целосно се испразнети села. Огнените стихии во Грција зафатија станбени квартови и предизвикаа огромни штети, додека илјадници граѓани беа евакуирани. Апокалиптични сцени има и во Бугарија, каде што се регистрирани над 240 активни пожари и е причинета значителна материјална штета.
Македонија
Променливо облачно време повремено со пороен дожд и грмежи

Времето денес ќе биде променливо облачно и посвежо, претпладне со повремено пороен локален дожд, грмежи и услови за појава на краткотрајно невреме. Ќе дува слаб до умерен западен, а долж Повардарието северен ветер, кој попладне наместа ќе засилува. Максималната температура ќе биде во интервал од 27 до 35 степени.
Во Скопје, променливо облачно, во претпладневните часови со повремен пороен дожд и услови за појава на ретки грмежи. Ќе дува слаб до умерен, попладне во делови од котлината повремено засилен северен ветер.
Максималната температура ќе достигне до 33 степени.