Македонија
Тошковски домаќин на министерски состанок во рамките на Процесот за соработка во Југоисточна Европа

Министерот за внатрешни работи Панче Тошковски беше домаќин на министерскиот состанок ж„Трендови и предизвици во регионалната безбедносна соработка во регионот во Југоисточна Европа низ призмата на организираниот криминал со акцент на шверцувањето мигранти и трговијата со луѓе и нејзино натамошно унапредување“, кој се одржува во рамките на Процесот за соработка во Југоисточна Европа.
Во рамките на овој состанок министерот Тошковски имаше свое обраќање, во кое истакна дека oсобено му е драго што меѓу нас имаме присуство на речиси сите учесници на Процесот, застапени на разно ниво, докажувајќи ја посветеноста на оваа иницијатива, поддршката што заеднички ја нудиме за да ги зачуваме мирот, безбедноста, стабилноста, солидарноста и добрососедските односи, кои веќе се признаени и на европско ниво. Воедно, потенцира дека oрганизираниот криминал забрзано се развива во светот и претставува растечка закана за општествата и граѓаните. Еволутивен и повеќедимензионален по карактер, организираниот криминал се приспособува на новите технологии и брзата дигитализација, што доведува до нови предизвици во одржувањето на безбедноста како на регионално така и на светско ниво.
„Нашето заедничко дејствување е важно и корисно не само за пошироката јавност туку и за граѓаните на нашите земји за чие добро и безбедност работиме и ние како службеници во министерствата. Постабилна, побезбедна, економски напредна Југоисточна Европа, тоа им го должиме на нашите граѓани. Да продолжиме да работиме заедно за тоа и да им го обезбедиме“, потенцира Тошковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
МНР ја демантира партијата Левица: Паушални и целосно неточни наводи кои не соодветствуваат со фактичката состојба

Министерството за надворешни работи и надворешна трговија категорично ги демантира неточните информации изнесени од страна на политичката партија „Левица“, поврзани со работењето на Конзулатот на Република Северна Македонија во Њу Џерси.
„Станува збор за паушални и целосно неточни наводи кои не соодветствуваат со фактичката состојба. Воедно, ја информираме јавноста дека дипломатско-конзуларното претставништво функционира со редовно работно време и е целосно на располагање за сите услуги и потреби на македонската дијаспора во Соединетите Американски Држави“, велат од Министерството.
Македонија
Перински во Зелениково: Инвестирањето во локални проекти е основа за подобар квалитет на живот

Во рамките на иницијативата „Каде што срцето е дома“, министерот за локална самоуправа, Златко Перински, денеска ја посети Општина Зелениково, каде што одржа работна средба со градоначалникот Коста Маневски и членовите на општинскиот Совет. Средбата беше искористена за размена на идеи и ставови во однос на актуелните предизвици со кои се соочува општината, но и за планирање на идни чекори за понатамошен развој и напредок на локалната самоуправа. Фокусот беше ставен на најважните приоритети за подобрување на животните услови на жителите и за унапредување на инфраструктурата.
Една од темите што беше разгледана беше предлогот за измена и дополнување на Законот за локална самоуправа. Министерот Перински истакна дека оваа измена ќе донесе значајни подобрувања во управувањето на сите општини, со зголемена отчетност и транспарентност, што ќе овозможи поефикасни услуги за граѓаните. Според министерот, измените ќе ги зајакнат општините и ќе им овозможат да се справат со предизвиците со кои се соочуваат, создавајќи подобри услови за живот.
Општина Зелениково, која се наоѓа во јужниот дел на Скопската котлина и ја сочинуваат 14 населени места со рурален карактер, сериозно го насочува својот фокус на подобрување на патната инфраструктура. На првиот владин повик за поддршка на инфраструктурни општински проекти, на Општината и беа одобрени три проекти, а на вториот повик, таа аплицираше за седум проекти.
Министерот Перински нагласи дека Владата ќе продолжи да ги поддржува локалните самоуправи и да инвестира во нив што е од големо значење за остварување на заедничките цели за создавање на пофункционални и современи локални заедници. Поддршката од Владата, како што беше нагласено, претставува значителен фактор за успешната реализација на инфраструктурни проекти и за обезбедување на континуиран развој на сите општини и региони. Таа со засилен интензитет ќе продолжи и во иднина во насока на создавање пофункционални општини кои овозможуваат подобро секојдневие за сите.
Македонија
Речиси третина од фирмите чии лиценци ќе се одземаат имаат блокирана сметка или се неактивни, според истражувањето на Центарот за граѓански комуникации

Центарот за граѓански комуникации го објави истражувањето за фирмите коишто се на списокот што го објави Министерството за транспорт и врски за одземање на нивните лиценци за градежно работење и урбанистичко планирање, а по спроведените контроли и трагичниот настан во Кочани.
Иако на списокот на фирми на коишто ќе им се одземат лиценци за градежно работење и урбанистичко планирање што го објави Министерството за транспорт и врски има 479 фирми, всушност лиценци ќе им се одземат на 426 фирми, бидејќи на списокот има некои фирми што се повторуваат, а други на коишто им се одземаат по неколку лиценци.
Истражувањето за фирмите на коишто ќе им се одземат лиценци за градежно работење и урбанистичко планирање што го објави Министерството за транспорт и врски, покажува дека на фирмите ќе им се одземаат 11 различни видови лиценци. Вкупно ќе бидат одземени 471 лиценца.
Истражувањето открива дека:
– Лиценци ќе им се одземат на 426 фирми, бидејќи од 479-те фирми на списокот има некои што се повторуваат, а други на коишто им се одземаат по неколку лиценци.
– На фирмите ќе им се одземаат 11 различни видови лиценци, а вкупно ќе бидат одземени 471 лиценца.
– За најголем дел од фирмите, лиценците што ќе им се одземат не се услов за фирмите да работат и да добиваат државни тендери.
– Во моментов, само 49 од фирмите што се на листата за одземање лиценци имаат актуелни договори за јавни набавки во вкупна вредност од 26 милиони евра.
– Сепак, само 23 фирми кои имаат важечки договор за јавна набавка всушност ќе ја загубат лиценцата којашто била услов за добивање на тендерот. Овие фирми имаат вкупно 58 договори за јавна набавка, чија вкупна вредност изнесува 14 милиони евра.
– Од сите фирми на списокот, 101 има добиено тендер во последните три години, во вкупна вредност од 77 милиони евра.
– 28 % од фирмите за одземање лиценца се со блокирана сметка или се правно или деловно неактивни, а останатите фирми се активни.
– Приходи оствариле 85 % од фирмите во вкупна годишна вредност од 128 милиони евра (за 2023 година која е последната година за којашто има објавено податоци).
– Најголем дел од фирмите остваруваат ниски годишни приходи. Секоја трета (31 %) од фирмите има годишен приход помал од 15 илјади евра, додека приходи поголеми од 1 милион евра имаат само 33 фирми, односно 8 %.
– Во сите овие фирми работат 2188 луѓе. 4 % од овие фирми немаат вработен, а 3 % имаат само еден вработен. Со повеќе од 10 вработени се само 3 % од фирмите.