Македонија
Традиционално пријателство со Чешка со постојан политички дијалог и заемна соработка

Претседателот на Пратеничката група за соработка со Парламентот на Чешката Република, Ненад Коциќ и членовите на Групата: Лолита Ристова, Марија Кочовска, Бране Петрушевски, Јован Јаулески и Дајанчо Ефтимов, се сретнаа со Делегација на Комисијата за европски прашања на Парламентот на Чешката Република.
Пратеникот Коциќ, на почетокот на средбата, истакна дека билатералните односи меѓу двете земји ги карактеризира традиционално пријателство со постојан политички дијалог и заемна соработка.
„Како земја кандидат за членство во Европската Унија, Република Северна Македонија верува дека институциите на ЕУ ќе ја одржат перспективата на проширувањето на Унијата со сите останати земји кандидати како кредибилен процес базиран на заслуги, имајќи ги предвид и актуелните геополитички безбедносни предизвици“, рече Коциќ.
Особено е важно, додаде тој, ЕУ да не го изгуби фокусот од Западен Балкан и да не ја одлага интеграцијата на делови од сопствениот географски регион. Укажа дека проширувањето е една од најдобрите политики на Унијата и е долгорочна инвестиција за цела Европа во политичка, безбедносна и економска смисла.
Претседателот на Комисијата за европски прашања на Парламентот на Чешката Република, Владислав Вилимец, на македонските колеги им посака успешно да ги завршат сите задачи поврзани со евроинтеграциите.
„Пристапот до Европската Унија е политичка одлука за која е потребен консензус. Јас најпријателски ве советувам да направите сѐ што е во ваша моќ за да ги исполните задачите. Ние разбираме дека процесот за уставни измени е тежок, но мора да сте единствени за ја исполните таа задача, истакна Вилимец.
На крајот, Чешката делегација побара во иднина да има повеќе средби од ваков карактер и предложи да се обнови авионската линија Скопје – Прага, како би се интензивирала соработката меѓу двете земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Алиу: Клиниката за уво, нос и грло со нова медицинска апаратура

Министерот за здравство, Азир Алиу заедно со заменик претседателот на Турската агенција за соработка и координација ТИКА, Махмут Чевик и амбасадорот на Република Турција во земјава, Фатих Улусој, денеска ја посетија Универзитетската клиника за уво, нос и грло каде со поддршка од ТИКА е обезбедена нова медицинска апаратура.
– Клиниката за уво, нос и грло е зајакната со нови електрохируршки инструменти, односно електрокаутери, со коишто се овозможува попрецизна, поефикасна и побезбедна дисекција на ткива и придонесува кон побрзо закрепнување кај пациентите. Ова е значајно за клиниката имајќи предвид дека тука се вршат над 2000 интервенции на годишно ниво. Нашата заложба е унапредување на квалитетот на здравствените услуги на сите нивоа на здравствена заштита, а особено на терциерното ниво каде се третираат најкомплексните случаи, рече Алиу.
Директорот на Универзитетската клиника за уво, нос и грло, Игор Камшикоски упати благодарност до Турската агенција за соработка и координација ТИКА за значајната поддршка во насока на зајакнување на здравствениот систем.
Македонија
Николоски: На Скопје му треба силна трансформација, градскиот воз, нови еколошки автобуси, нова инфраструктура, идниот градоначалник Ѓорѓиевски ќе има силна поддршка

Овие четири години за Скопје се изгубени, сега на градот му треба силна трансформација и ние како Влада и Министерство за транспорт ќе дадеме силна поддршка во реализација на капиталните проекти за Скопје, градскиот воз, новите еколошки автобуси и инфраструктура, истакна потпретседателот на ВМРО-ДПМНЕ, Александар Николоски.
,,На Скопје му треба силна трансформација, новиот градоначалник ќе има силен партнер во мене, во премиерот Мицкоски, во Владата и во Минстерството за транспорт. Сакам да најавам за градскиот воз, тоа е нешто што го ветивме и ќе го реализираме. Во однос на првата делница, избран е изведувач и потпишан е договор за делницата од Зелениково, преку Драчево, помеѓу населбите Кисела Вода и Аеродром и завршува на новата железничка станица. Деновиве тој изведувач ќе биде воведен во работа и очекувам првата линија напролет да е функционална. Следната година во рамки на финансиските можности ќе продолжиме со избор на изведувач за другите две линии и на тој начин да го заокружиме прстенот и да имаме функционален воз кој што ќе се надоврзува на автобусите на ЈСП и на тој начин да имаме евтин превоз, да имаме точен и брз превоз и секако да се растерети гужвата“, истакна Николоски.
Најави дека после изборите повторно ќе се распише тендерот за 120 еколошки автобуси.
,,Веднаш по завршување на изборите, откако ќе завршат овие законски ограничувања ќе ја продолжиме оваа постапка. Набавуваме 120 автобуси, 80 за Град Скопје и 40 за другите општини. ЈСП треба да има целосна промена на флотата, сега има 250 автобуси и сите тие треба да бидат променети во годините пред нас и тука градот ќе има огромна подршка”, додаде потпретседателот Николоски.
Николоски и кандидатот за градоначалник Орце Ѓорѓиевски денеска извшија увид во реконструкција на улици во општина Кисела Вода. Тие најавија пробивање на улицата Есенинова на потегот од месноста Чешма до Шампионче.
Македонија
(Видео) Филипче до Мицкоски: Прочитан си како буквар, не направи ниедна реформа во судството, не те интересира правдата

„Јавно ги прашувам ВМРО-ДПМНЕ и Мицкоски, до кога Венко Филипче и СДСМ ќе им бидат криви што не можат да спроведат ништо, ниту една реформа, ВМРО-ДПМНЕ веќе е очајно кога зборува за судството“, рече претседателот на Социјалдемократскиот сојуз на Македонија, Венко Филипче.
„Година и пол наназад поставуваат свои судии, свои обвинители и само го партизираат судството. Нема ништо суштински од спроведувањето на реформите. Јас бев тој којшто понудив рака бев на состанок кај примерот да направиме заеднички работни групи да се спроведе реформската агенда досега не е донесен ниту еден реформски закон од сферата на правосудството“, рече Филипче.
Во изјавата тој додаде дека од вкупно 12 закони кои што требаше да се донесат оваа година, седум од нив до јуни 2025 година и уште пет до крај на годинава – ниту еден, не само што не е донесен, не е ниту поднесен од страна на министерството за правда во Собранието, додаде Филипче.
Очигледно е како што кажа Филипче дека ВМРО-ДПМНЕ сака да го контролира судството.
„Не може партиски портпароли да кажуваат кој треба да биде зад решетки, тоа треба да го каже независно и целосно функционално судство. Тоа го бараат граѓаните.
Сакам да им порачам дека се прочитани како буквар. Еднаш граѓаните тој филм го гледаа со партизирано судство кога го користеа да се закануваат да го користат политички, да го користат како инструмент за политички прогон. Репризата во филмот ниту некој сака да ја гледа, ниту пак поминува и сметам дека граѓаните треба да ги казнат на изборите за ова однесување“, изјави Филипче.