Македонија
Трајанов: На тие што на Плоштадот Македонија извикуваа УЧК, местото им е во Хаг, а не во власта
Денес со присуство на над 400 делегати и гости, се одржа 7-от Конгрес на ДЕМОКРАТСКИОТ СОЈУЗ, на кој во своето обраќање, Павле Трајанов, нагласи: „На претстојните претседателски и парламентарни избори за одлучува за тоа дали ќе опстоиме како самостојна, суверена и независна држава и дали ќе се случат промени кои значат градење на демократска и европска држава или ќе тонеме во корупција , деструкција и разградување на темелните вредности“.
„Демократскиот сојуз и јас како претседател ја отворивме политичката борба против недопирливите од ДУИ, партија која ги поткопа темелите на македонската држава, со криминал, деструкција и антимакедонска надворешна политика, и сигурен сум дека оваа партија треба да се делегитимира и испрати во опозиција. На тие што на Плоштадот МАКЕДОНИЈА, извикуваа УЧК, местото им е во ХАГ, а не во власта. По дуизацијата и криминализацијата на државата, сега водството на ДУИ најавува дестабилизација доколку не биде вклучена во власта, но од ваквите најави никој не се плаши затоа што граѓаните на Македонија без разлика на нивната етничка и верска припадност цврсто се решени да живеат заедно и да ја градат заедничката држава, Македонија“, рече Трајанов.
Тој зборуваше и за приоритетите на Демократскиот сојуз, меѓу кои посебно ги посочи следните:
„Прво, коренити уставни промени односно нов Устав, поради тоа што Уставот и амандманите на истиот, го блокираат развојот, демократијата и ја промовира партизацијата и неодговорноста. Тука пред се, се неопходни реформи во судскиот систем, бришење на правилото на Бадентер, Балансерот итн.
Второ, донесување на нова стратегија за борба против тешките облици на криминал и високата корупција и донесување на Законот за формирање на независна Агенција за борба против овој вид на криминал.
Трето, деблокирање на евроинтеграциските процеси преку градење на широк политички и граѓански консензус околу следните работи: Македонскиот јазик да биде официјален по приемот на Македонија во ЕУ, Образовните, историските и идентитетските прашања да не можат да бидат основа за блокада на евроинтеграциските процеси, и да се обезбеди реципроцитет со Бугарија со признавање на Македонското малцинство во Бугарија.
Четврто, системот за безбедност да се реформира, да поминат сите вработени преку „сито“, да се обезбеди континуирана обука и да се зголемат двојно платите. Не е во ред, ниту може да се очекуваат резултати доколку и натаму главен инспектор прима плата од 45 илјади денари, а јавен обвинител од 130 илјади денари.
Надворешна политика треба да биде во функција на нашите стратешки и национални интереси и усогласена со политиките на ЕУ и стратешките партнери, пред се на САД, треба да продолжиме со реформите во областа на одбраната како членка на НАТО“.
Трајанов кажа дека Демократки Сојуз е за слободна пазарна економија, бесплатно здравство и образование и создавање услови за младите да останат во Македонија.
„Демократскиот сојуз пред повеќе од година дена се повлече од парламентарното мнозинство поради тоа што ДУИ и СДСМ ја движеа државата во погрешна насока (крив правец), и веднаш потоа објавивме дека сме за градење на национално единство и заеднички настап на изборите со сите партии кои не се согласуваат со власта предводена од СДСМ и ДУИ“, рече тој.
На Конгресот на кој присуствуваа над 400 делегати и гости, беше избран Централен совет на ДС од 80 члена.
За претседател на Демократскиот сојуз е реизбран Павле Трајанов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Посебен режим на сообраќај во Скопје за празникот Водици
На 19.01.2026 (понеделник) Единицата за безбедност на патниот сообраќај при СВР Скопје ќе воведе посебен режим на сообраќај за одредени сообраќајници во Скопје.
Во центарот на Скопје за сообраќај ќе биде затворена ул. „Филип Втори Македонски“ на потегот од крстосницата со бул. „Гоце Делчев“ до крстосницата со ул. „11 Октомври“ во двете насоки.
Во општина Ѓорче Петров за сообраќај ќе бидат затворени сообраќајницата од црквата „Свети Петар и Павле“, бул.„Партизански Одреди“ до ул.„Ѓорче Петров“, ул.„Ѓорче Петров“ до ул.„Васил Чакаларов“, како и од црквата „Свети Пантелејмон“, ул.„Козле“, дел од ул.„Васил Чакаларов“ до Железничкиот мост на реката Вардар. Во општина Аеродром за сообраќај ќе биде затворен локалниот пат кон Горно и Долно Лисиче.
СВР Скопје апелира со сите учесници во сообраќајот да ги прочитуваат наредбите кои ќе ги даваат униформираните полициски службеници.
Македонија
Утре локални врнежи од дожд, на планините снег
Утре на пониските места ќе има слаби локални врнежи од дожд, а на повисоките места и на планините од снег. По одредени котлини ќе има појава на магла. Ќе дува слаб ветер од променлив правец. Минималната температура ќе биде во интервал од -2 до 2, а максималната ќе достигне од 2 до 6 степени, информира УХМР.
Во Скопје, променливо облачно со слаби локални врнежи од дожд и појава на магла. Минималната температура ќе се спушти до 0, а максималната ќе достигне до 5 степени.
За време на викендот на пониските места ќе има слаби локални врнежи од дожд, а на повисоките места од снег.
Во поденелник и вторник има преодно стабилизирање на времето, а од среда повторно ќе има врнежи претежно од снег. Од утре до крајот на неделата има услови за појава на магла по одредени котлини. Дневната температура ќе има тенденција на опаѓање.
Македонија
Министерството за здравство ги кани на соработка нашите лекари кои работат во странство
Министерството за здравство информира дека на веб-страницата на МЗ од денес е активиран електронски модул на кој лекарите кои моментално работат или специјализираат во странство може да изразат интерес за соработка со нашиот здравствен систем.
-Во рамки на нашите заложби за дигитализација во здравството, овој електронски модул претставува директен канал за стручна соработка со дијаспората, со цел полесно мапирање профили и експертизи кои може да придонесат во нашиот здравствен систем. Меѓусебната соработка со овие лекари е предвидено да опфати обуки, едукации, менторство, консултации или проектна поддршка, како и други стручни ангажмани. Во оваа прилика ги повикувам да се пријават нашите лекари кои работат во странски медицински центри, лекари кои се на специјализација или супспецијализација во странство, или лекари кои се ангажирани во странски академски и научно-истражувачки установи, потенцира министерот за здравство, Азир Алиу.
Пријавувањето се врши исклучиво преку електронскиот модул на веб-страницата на Министерството за здравство, по што Министерството ќе ги контактира лекарите за конкретна соработка што одговара на нивниот профил.
Во електронскиот модул насловен „Лекари од дијаспората“ предвидено е лекарите да пополнат повеќе лични и професионални податоци, детали за клучните области на експертиза, лиценци, сертификати, листа на публикации, како и сегменти на соработка за кои изразуваат интерес.

