Македонија
(Видео) Трајанов: Со една изборна единица ќе се стави крај на прелевањето на гласовите на малите партии
Претседателот на Демократскиот сојуз, Павле Трајанов, рече дека очекува поддршка со консензус на иницијативата за промена на Изборниот законик да има една изборна единица наместо досегашните шест. Според Трајанов, овој модел на избори ќе донесе поголема контрола на Собранието врз извршната власт и ќе стави крај на прелевањето на гласовите на малите партии.
„Сметаме дека е време да се стави крај на монополот на двете политички партии да избираме по пропорционален модел, при што во парламентот ќе има место и за малите партии. Според нашите анализи, од 100 до 150 илјади гласови се губат на помалите партии и ретко која од нив сама успева да влезе во парламентот. На овој начин ќе се внесе и систем на контрола, одговорност и поинаков начин на носење одлуки. Сега одлуките се носат во големите партии, а не во Собранието, како што е пракса во демократските развиени земји. Досега немало поведено одговорност за ниту еден премиер. Политиките се носат централизирано, без здрава дискусија и критика. Овој изборен модел ќе ја смени таа слика и ќе имаме политичка разноликост, а малите партии ќе бидат погласни во напорите да се донесат квалитетни закони во интерес на граѓаните“, рече Трајанов.
Тој додаде дека начелно поддршка очекува од СДСМ, кој, според него, треба да си стои на зборот затоа што оваа иницијатива е нивно изборно ветување.
„СДСМ пред изборите рече дека меѓу првите работи што ќе ги направи е измена на законот за една изборна единица. Дали сега ќе си стои на зборот и дали им одговара оваа идеја, ќе видиме. Иницијативата е поднесена, има анализа изготвена од нашиот тим зошто треба да биде прифатена и очекуваме дискусија“, рече тој.
Идеите за 3 изборни единици, од кои две ќе бидат македонски, една албанска, Трајанов, како што рече, за ДС, се неприфатливи затоа што тој модел ќе донесе федерализација на државата. Доколку помине иницијативата за која треба поддршка од 61 пратеник, Трајанов најави дека партијата има и предлози за поинакво финансирање на партиите и медиумска покриеност на изборите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сообраќајот се одвива во зимски услови, по претежно влажни коловози, на некои повисоки места со мали остатоци од кашест снег на коловозот
Сообраќајот на државните патишта се одвива во зимски услови, по претежно влажни коловози, на некои повисоки места во западните и југозападните делови од државата со мали остатоци од кашест снег на коловозот по интервенција на дежурните екипи на ЈП Македонијапат.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Мицкоски е во паника, опозицијата освои двојно повеќе гласови од власта, велат од СДСМ
„Мицкоски мора да е во голема паника штом свика прес конференција да се пофали дека опозицијата освоила повеќе гласови од владејачките партии“, велат од СДСМ.
„Дури и со сите можни злоупотреби на институциите и притисоци, кандидатите за градоначалници од опозициските партии освоија двојно повеќе гласови од кандидатите на владејачките партии.
Опозицијата освои двојно повеќе гласови, 21.394 гласови а власта само 12.534 гласа. Заклучокот е едноставен, власта на ВМРО, ВЛЕН и ЗНАМ загуби вечерва и тоа убедливо“, соопшти СДСМ.
Македонија
Почувствуван земјотрес во Прилеп и околината
Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, ноќеска во 01 часот и 14 минути регистрира земјотрес чиј епицентар потекнува од соседна Република Грција, на околу 116 км југоисточно од Скопје, со Рихтерова локална магнитуда, ML2.9
Според досегашните податоци со кои располага опсерваторијата, земјотресот е почувствуван во Прилеп и околината со интензитет од III степени според Европската макросеизмичка скала.

