Македонија
„Треба се инвестира во науката“ – шумарскиот факултет одбележа 75-години постоење

Факултетот за шумарски науки, пејсажна архитектура и екоинженеринг „Ханс Ем“ со пригодна свеченост одбележа 75 години постоење.
Во рамки на настанот, како основна заложба на „Ханс Ем“ беше подвлчено домаќинското управување, заштитата и унапредувањето на шумите – еден од најважните природни ресурси во Македонија но и во светот.
На свеченоста се обрати министерот за образование и наука Јетон Шаќири кој оцени дека наставно научниот персонал е за секоја пофалба – максимално посветен на образовниот процес и активен во научно – истражувачката дејност.
Тој потенцираше дека на факултетот се едуцира кадар кој е навистина потребен и изрази надеж дека интересот за овој тип на студии ќе расте во иднина, за што, како што рече, во координација со Министерството за земјоделство, шумарство и водостопанство, од оваа година се воведува нов тип на стипендии за студенти запишани на студии од областа на шумарските науки.
„Стипендиите се стимулативни, затоа што износот е 18.000 денари на месечно ниво, за 9 месеци во годината. И тоа е одлична можност за младите, првенствено да одберат вистинска струка во која ќе можат лесно да се вработат, а притоа, нивната едукација да биде финансиски поддржана и олеснета. Сигурен сум дека понудената квота ќе биде целосно искористена, а ние како институции ќе се задолжиме да одржиме континуитет на нивното доделување секоја следна академска година“, нагласи минитерот, додавајќи дека на државата и требаат сé повеќе инженери, еколози и хортикултуристи и дека тоа со заеднички напори е остварливо.
Пред присутните свое обраќање имаше и деканот, проф. др. Кирил Сотировски кој рече дека факултетот има голема одговорност и обврска не само кон секторите шумарство и екологија туку и кон севкупното општество, а тие заложби го одбележуваат нивното досегашно работење во изминатите 75 години.
Деканот на „Ханс Ем“ предупреди на моментно катастрофалните, па и катаклизмичките еколошки состојби на планетата кои, како што рече, се можеби најдобрата шанса за оживување на секторот шумарство и на сродните еколошки науки.
„Опасности нé демнат многу – од глобални климатски промени, што според мене е веќе депласиран, би рекол дипломатски назив за глобалното прегревање, преку губењето на почвите, опустинувањето, намалувањето на биодиверзитетот, доведено до екстрем, така што веќе живееме во ерата на шестото големо изумирање на видовите организми; сите овие и многу други проблеми директно ги засегнуваат шумите, но со повеќето од тие проблеми може да се справуваме преку модерно, еколошко шумарство“, предупреди Сотировски и апелираше дека инвестирањето во шумарството во државата мора да се сведе на ниво на стратешка долгорочна определба на сите политички и општествени чинители. Што поскоро, тоа подобро за сите, рече тој.
Вработувањата на асистенти е проблем кој го начна Сотировски во обраќањето, коментирајќи дека системот потфрла веќе со децении, и процесот на редовното систематско обновување на академскиот персонал се решава, или почесто не се решава, на ниво на спорадични, несистематски одлуки.
„Чинам дека доколку за нешто би требало најлесно да се дојде до консензус меѓу сите наши политички чинители од најразлични провиниенции, тоа е дека треба да се инвестира во наука. Зарем не сме сите сложни дека најлесниот и загарантиран пат кон напредок на државата е преку прогресивно долгорочно зголемување на инвестициите во истражувања?“, истакна деканот Сотиривски, во таа насока споменувајќи ги како позитивен пример, Словенија, Израел, Финска, Данска, Кина.
Додаде дека во текот на 2020 и 2021 година биле вработени девет асистенти, по повеќе од 10 години и се заблагодари што нивниот долгогодишен крик конечно бил регистриран и соодветно разбран од тогашниот министер за образование. Сепак, рече деканот на факултетот, и покрај оваа среќна разрешница, проблематично е што „решавањето на вработувања за асистенти се базира на тоа министер да го регистрира и разбере нашиот крик, и што воопшто е дојдено до состојба која предизвикува крик и очај“.
Сотировски упати честитки за јубилејот и изрази надеж дека луѓето од секторот се свесни за својата поголема улога – и дека не треба да се сведуваат само на обезбедувачи на дрвна маса, туку да бидат двигатели и чинители на сериозен еколошки пристап кон шумите и кон природата генерално.
Некогашниот Шумарски факултет во Скопје, а од неодамна Факултет за шумарски науки, пејзажна архитектура и екоинженеринг „Ханс Ем“ (ХЕФ), е единствената високообразовна и научна институција од областа на шумарството и од сродните области во државата. Како дел од Земјоделско-шумарскиот факултет, тој е формиран во 1947 година, само две години по завршувањето на Втората светска војна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Уапсени се полицајци и полициски функционери кои биле на смена кобната вечер“: СДСМ ја поздрави акцијата на ОЈО ГОК за Кочани

„Ја поздравуваме вечерашната акција на Обвинителството за организиран криминал и корупција во која се лишени од слобода полицајци и полициски функционери кои биле на смена кобната вечер на 16 март во т.н. дискотека Пулс во Кочани“, соопшти СДСМ.
„Фактот што четири месеци ВМРО-ДПМНЕ се обидуваше да ја сокрие одговорноста на полицајците и полициските функционери, фактот што нивната вина беше негирана од страна на Панче Тошковски и Христијан Мицкоски укажува на тоа дека сите биле вмешани или на некој начин знаеле за нелегалното работење на Пулс и тоа го одобрувале.
Само поради обидите да се сокрие одговорноста од страна на Тошковски и Мицкоски на лицата кои тие ги поставија за полицајци, командири и началници би требало веднаш да си поднесат оставки.
Одговорност мора да има и за Александар Јанев, директорот на БЈБ. Тошковски и Јанев не смеат повеќе да ја попречуваат истрагата ниту да влијаат некој да не сноси одговорност.
Вистината за Кочани која цела недела ја објавуваше СДСМ е точна. Се покажа дека без силен притисок на јавноста, на дел од медиумите и на СДСМ нема да има правда за Кочани. Време е за одговорност, време е за оставки“, се додава во соопштението на СДСМ.
Македонија
Приведени уште 13 полициски службеници за пожарот во „Пулс“

Во тек е акција под раководство на обвинител од Специјализираното одделение за полициски службеници, соопштија од Обвинителство за гонење на организиран криминал и корупција.
Уште 13 полициски службеници и началници се приведени во рамки на истрагата за пожарот во дискотеката „Пулс“ во Кочани.
Од Обвинителството најавија дека соопштение ќе има во текот на утрешниот ден.
Македонија
МОН: Стручното образование е силна страна на македонскиот образовен систем, креира квалитетен и побаруван кадар на пазарот на трудот

„Во средните стручни училишта во Македонија успешно функционира концептот на дуално образование во чија реализација е вклучена и бизнис заедницата. Училиштата и компаниите заедно содаваат квалитетен кадар кој полесно може да се снајде на пазарот на трудот. Затоа, развојот и проширувањето на овој концепт ќе биде наш приоритет и во следниот период“.
Ова го истакна државниот секретар во Министерството за образование и наука, Елена Ивановска на панел дискусија „Достапност на квалификувана работна сила: предизвик и стратешки фактор за инвестициски одлуки и економски раст“, организирана во рамки на Првиот македонско – германско бизнис самит, со кој АХК германската стопанска комора во Македонија одбележува 25 години постоење.
Ивановска рече дека од самиот почеток на мандатот, новото раководство во МОН се заложи за унапредување на законската регулатива, бидејќи таа е основ за спроведување на образовните политики, новите мерки и активности со кои ќе се остварат целите од владината програма за градење на поквалитетен образовен систем.
„Во новиот Закон за стручно образование и обука системски се уреди концептот на дуално образование, се прецизираа обврските на сите учесници во реализацијата. На пример се дефинираше кој и како може да стане ментор на учениците, компаниите да им исплаќаат месечен надомест на практикантите, да им овозможат заштита и безбедност при работа и така натаму. Со Законот за средно образование пак, се предвиде поголема поддршка за талентираните ученици, се воведуваат кариерни советници што ќе ги насочуваат учениците и сето ова е во интерес на создавање на потребната квалификувана работна сила“, рече Ивановска.
Осврнувајќи се на регионалните центри за стручно образование и обука рече дека тоа се всушност средни стручни училишта кои се трансформираат во образовни установи со поголема вредност и повеќе функции, обврски и одговорност.
„Таму не само што се реализира средно стручно образование за ученици, туку идејата е да се реализира и образование и обука на повозрасни кои имаат потреба од доквалификација, преквалификација и слично, за да станат конкурентни на пазарот на трудот. Фреквентноста на луѓе ќе биде многу поголема. Центрите ќе прават и анализи на пазарот на трудот, ќе креираат програми за настава и обука и така натаму“, рече Ивановска, додавајќи дека во моментов се формирани 7 регионални центри, а до 2028 година ќе се формира осмиот и последен, што како обврска е предвидено во Реформската агенда.
Државниот секретар информираше дека во регионалните центри се вложуваат големи износи на средства за да има добри училници, опремени кабинети, работилници и соодветни сместувачки капацитети. Средствата во најголем дел ги обезбедува Европската унија, а Ивановска ја повика и бизнис заедицата да помогне во модернизацијата на инфраструктурата, затоа што, како што рече, училиштата се инкубатори на човечки капитал кој и нив им е потребен.
На панел дискусијата модерирана од Дејан Чуповски, раководител на програмата за дуално образование при АХК германската комора, се обратија и програмската директорка на Источниот комитет на германското стопанство, директорот на средно стручно училиште „Св. Наум Охридски“ во Охрид, Сашо Недески, раководителката на одделот за глобална техничка и комерцијална обука во компанијата Дрекслмаер, Барбара Гербер и управниот директор на компанијата Унија Груп, Бранислав Серафимоски.