Македонија
Трендафилов за предлог-законот „плата во плик“: Ме потсетува на едно телевизиско шоу во Америка кога ги бркаат работниците на каков начин сакаат

Во однос на предлог-законот „плата во плик“, претседателот на ССМ, Слободан Трендафилов, рече дека за жал, биле дел од работната група што изготвувала такво законско решение.
„Меѓутоа, законското решение што планираат да го протнат преку предлог на Владата до Собранието и легализацијата на плаќањето во плик и враќањето пред 2009 година во општеството во Македонија, односно работниците да ги направиме модерни робови, на кои ќе им плаќаме придонеси од 290 денари дневно да може на дневна основа да ги повикуваат како сакаат и кога сакаат работодавците и да ги отпуштаат кога сакаат и како сакаат, мене ме потсетува на едно телевизиско шоу во Америка кога ги бркаат работниците на каков начин сакаат“, вели Трендафилов.
Според него, недозволиво е во Македонија, во 21 век, во земја кандидат за членка на ЕУ, да враќаме и да формализираме неформална економија.
„Затоа што сакаме сè е што е незаконско во ова општество да го озакониме и на таков начин да кажеме дека повеќе немаме незаконски појави. Поразително е да предлагате закон со кој ќе го елиминирате Законот за работните односи. Патем, овие работници нема да имаат договор за вработување, нема да знаат за никаква своја иднина и егзистенција, нема да може да подигнат кредит и нема да имаат никаква гаранција. Ако законот се применува на таков начин, предлагачите нека пробаат први, па нека кажат како им е“, додаде Трендафилов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зголемена фреквенција на возила на граничните премини Табановце и Богородица

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На ГП Табановце се бележи зголемена фреквенција на возила времето на чекање за влез во државата е околу 30-45 минути, на ГП Богородица за излез е околу 20 минути. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Посебен режим на сообраќај денеска и утре во Скопје

СВР Скопје ги известува граѓаните дека денеска и утре поради одржување на средба на лидерите од Западен Балкан, Единицата за безбедност на патниот сообраќај при СВР Скопје ќе преземе мерки за посебен режим на сообраќајот по сообраќајниците на поширокото централно подрачје на град Скопје.
СВР Скопје апелира до сите учесници во сообраќајот да ги почитуваат наредбите кои ќе ги даваат униформираните полициски службеници.
Македонија
Сончево со мала до умерена облачност, максималната температура до 37 степени

Времето денеска ќе биде сончево со мала до умерена локална облачност. Ќе дува слаб до умерен, а наместа повремено засилен ветер од северен правец. Минималната температура ќе биде во интервал од 12 до 21, а максималната ќе достигне од 29 до 37 степени.
Во Скопје, сончево со мала до умерена облачност. Ќе дува умерен, повремено засилен северен ветер. Минималната температура ќе се спушти до 20, а максималната ќе достигне до 37 степени.
Времето во наредните денови
Во текот на оваа седмица времето ќе биде сончево и топло со мала до умерена облачност. Дневната температура ќе биде во постепен пораст.