Македонија
Тренчевска: Во создавањето идни социјални услуги, значајна улога имаат демографските податоци во една држава

Министерката за труд и социјална политика, Јованка Тренчевска во рамки на министерската конференција во Рим, Италија реализираше средба со директорката на Регионалната канцеларија на Фондот за население на ОН (УНФПА), г-ѓа Џулија Валезе, на која уште еднаш беше потврдена одличната соработка на бројни проекти со оваа организација. Како дел од позначајните се вбројуваат отворање кризни центри за жени кои биле сексуално злоупотребувани, проектите со имплементација на Истанбулската конвенција, како и создавање механизми за заштита на жените од насилство.
Министерката истакна дека соработката продолжува и на новиот проект за демографска статистика.
„Многу идеи, средства и труд се вложуваат во демографските политики во Северна Македонија. Како и во заштитата на возрасните во државата. Пописот спроведен во 2021 година покажа дека имаме голем процент на возрасна популација и дека демографските податоци станаа еден од основните принципи за создавање идни социјални услуги кои ќе ги примаат граѓаните. Како дел од Законот за социјална заштита, со поддршка на Светска банка, 22 општини добија поддршка за имплементација на социјалните услуги за помош и нега во домовите на возрасните, но и на лицата со попреченост,“ рече Тренчевска.
Таа напомена дека наскоро ќе биде објавен нов повик за доставување понуди за имплементација на вакви услуги во други општини со цел да се зголеми опфатот на ранлива категорија граѓани кои добиваат бенефиции од децентрализирани услуги.
Министерката истакна дека во Северна Македонија, после 20 години се спроведе попис кој ја покажува демографската структура на населението. Важноста на овие податоци, рече Тренчевска, е клучна во креирањето стратегии, особено во системите за социјална заштита, но и во законодавството, животниот стандард и планирањето на идните активности. Оттука и важноста да да се инвестира во Државниот завод за статистика, и во сите институции како што е Министерството за труд и социјална политика, кои се едни од клучните актери во процесот на прибирање информации, но и нивната достапност и дистрибуција.
Соговорничките разговараа и за законските решенија донесени изминатиов период кои имаат за цел заштита на основните човекови права и унапредување на положбата на сите граѓани. Како што се Законот за спречување и заштита од дискриминација, усвојувањето на Стратегијата за еднаквост и недискриминација 2022-2026 год., и Законот за спречување и заштита од насилство врз жените и семејно насилство.
Со цел спроведување на Законот за спречување и заштита од насилство врз жени и семејно насилство работна група составена од претставници на институции, здруженија на граѓани и експертска поддршка на УНФПА, во рамки на проектот финансиран од Британската амбасада, подготвува подзаконски акти и програми потребни за спроведување на Законот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Завршен првиот дел од санацијата на хидросистемот Ѓавато, кој повеќе од 4 години беше со пробиени цевки

Заврши првата фаза на санирање на хидросистемот Ѓавато. Бунарскиот дел е комплетно завршен, пуштена е водата и нема никаде протекување, објави премиерот, Христијан Мицкоски.
Тој додаде дека останува уште една интервенција на цевката за испуст и со тоа ќе бидат дуплирани количините вода кои ќе се влеваат во Дојранското езеро.
„Каква беше состојбата пред интервенцијата? Повеќе од четири години пробиени цевки на двата функционални бунари. Потрошени повеќе од половина милион евра за електрична енерија, а ефектот минимален или никаков. Два функционални од десет направени бунари. Негрижа и срам. Во втората фаза ќе обезбедиме најмалку уште две бунарски пумпи за зголемен капацитет и побрзо полнење на Дојранското езеро. Владата во втората фаза ќе го задолжи ФОД при ЕСМ (поранешно ЕЛЕМ) да ги репарира постојните потисни пумпи. Конечно во последната трета фаза ќе инсталираме сончеви панели со батерии за акумулирање на електричната енергија и сопствено производство на електрична енергија. Нема трошење милиони евра од буџетот за електрична енергија“, напиша Мицкоски.
Македонија
СДСМ ги објави имињата на уште 11 кандидати за градоначалници

Попладнево се одржа седница на Извршниот одбор на СДСМ. Членовите донесоа одлука со која е дадена согласност за кандидатури за градоначалници во уште 11 општини низ државата:
1. Бутел – Оливера Ливриниќ
2. Велес – Маја Хеско
3. Гевгелија – Миле Атанасов
4. Делчево – Дејан Глинџарски
5. Демир Капија – Лазар Петров
6. Конче – Благој Илиев
7. Кратово – Влатко Спировски
8. Кривогаштани – Игор Каравиловски
9. Македонски брод – Ивица Стојковски
10. Ранковце – Даниел Крстевски
11. Старо Нагоричане – Далибор Трајковски
„СДСМ јасно ја потврдува својата подготвеност да понуди силни, чесни, квалитетни и докажани кандидати за претстојните локални избори кои ќе работат во интерес на граѓаните и напредок на општините’“, соопштија од партијата.
Македонија
Гужва на границите: на Богородица и Табановце се чека по 40 минути

Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, информира АМСМ.
На ГП Богородица времето на чекање за влез е околу 40 минути, на ГП Дојран времето на чекање за влез е околу 20 минути, на ГП Табановце времето на чекање за излез е околу 30 минути, додека пак на останатите граничните премини од македонска страна нема подолги задржувања за влез и излез од државата.
Од денеска од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.