Македонија
Тренчевска: Институциите, граѓанскиот и меѓународниот сектор заедно може да направат многу повеќе во борбата против насилството

Министерката за труд и социјална политика, Јованка Тренчевска, заедно со амбасадорот на Британија во Република Северна Македонија, Метју Лосон, градоначалникот на општина Струмица, Костадин Костадинов, претставничката на УНФПА, Афродита Плавјанска-Шалја, го посети здружението на граѓани „Скај плус“, Струмица, кое, покрај засолниште, има воспоставено и советувалиште за жени жртви на семејно насилство и нивните деца во општина Струмица.
Владата на Република Северна Македонија, со поддршка од британската амбасада, презеде цврсти чекори во заштитата на жртвите на семејно насилство и родово базирано насилство и овозможување соодветни услуги за заштита и поддршка на жртвите на насилство и нивните деца.
„Скај плус“ како засолниште за жртви од насилство е пример за модел на соработка кој ги вклучува сите клучни фактори – Министерството за труд и социјална политика, локалната самоуправа, полицијата, граѓанското општество и приватниот сектор“, истакна министерката за труд и социјална политика, Јованка Тренчевска.
Таа посочи дека потребно е следење на текот на живот на жртвата со цел повторно интегрирање во општеството.
„Животот на жените што се жртви на семејно насилство е исполнет со предизвици и затоа ние како општество, пред сѐ, треба да работиме на градење на нивната самодоверба преку креирање можности за развој и напредок. Токму тоа го промовираме со кампањата што ја спроведуваме како Министерство за труд и социјална политика – „Гласна и храбра“, целта ни е жените жртви на семејно и родово базирано насилство економски да се зајакнуваат и да ја разберат важноста на менталното здравје во повторно интегрирање во општеството и да ја разберат силата што ја имаат во себе, а која им е клучна кон градењето комплетна благосостојба. Затоа што за нас е важно секој еден во нашата држава да има достоинствен живот, како и еднакво да ги ужива сите права. И кога жените го користат својот максимален потенцијал, тогаш ние влијаеме на искористување на потенцијалот на нивните деца, а со тоа трансгенерациски ги искоренуваме повторените однесувања,“ рече Тренчевска.
Амбасадорот Метју Лосон го истакна значењето на поддршката на жените и девојките што претрпеле семејно насилство.
„Тоа е неверојатно важно прашање и навистина мислам дека фактот да се биде во Струмица заедно со граѓанскиот сектор, заедно со локалната самоуправа е навистина добар пример за соработка помеѓу партнерите во оваа земја и меѓународните партнери изаедничката поддршка насочена кон жените и девојките и ова прашање останува да биде приоритет за британската влада преку нашата работа во оваа земја“, истакна амбасадорот Лосон.
„Како УНФПА, се гордееме што го препознавме моделот на соработка со сите локални фактори кои успешно го применуваат шелтер-центарот ‘Скај плус’ од Струмица и со поддршка на британската амабасада помагаме овој модел да се примени и во други општини.
Заедно со нашите партнерски институции и организации работиме на неколку полиња во унапредување на сервисите за жртвите и преживеаните. Помогнавме да се заокружи законската рамка преку сите подзаконски акти, да се изработи протоколот за мултисекторско постапување и соработка и да се дизајнира модел на интегрирано собирање и анализа на податоци за родово базирано и семејно насилство. Преку заедничките кампањи и локални средби, интензивно работиме услугите да бидат достапни, особено до ранливите категории жени и девојки. Не застануваме тука бидејќи само заеднички можеме да ги подобриме услугите, а воедно и да му ставиме крај на насилството“, порача Афродита Плавјанска-Шаља пред присутните.
Градоначалникот на општина Струмица, Костадин Костадинов, ја изрази поддршката на Општината во борбата против родово базираното насилство и заштита на жените од семејно насилство.
„Општина Струмица го држи врвот и нема намера да се симне од него. Така е во многу области, така е и во областа на згрижување на жените – жртви на семејно насилство и нивните деца. Струмичкиот шелтер-центар како позитивен пример за соработка на здружението на граѓаните ‘Скај плус’ и Општина Струмица е вистински доказ за тоа“, порача Костадинов.
Стојне Митева од здружението „Скај плус“ изрази огромна благодарност и од име на „Скај плус“ и од Општина Струмица кон бртанската амбасада и УНФПА.
„Навистина, без нивната поддршка немаше ниту да се создадат услови за напредок на организацијата и сите внатрешни документи што и се потребни на организацијата со цел комплетна заштита на жртвите на семејното насилство, но и изработката на прирачникот, секако повторно под капата на УНФПА и британската амбасада. Јас сум бескрајно благодарна за тоа што амбасадата дозволи прирачникот да се појави и да биде достапен и онлајн, па така букварот како до шелтер-центар, односно до реплицирање на моделот, во кој ќе бидат вклучени сите фактири во општеството зашто само така можеме да се избориме со болката што ја чувствуваат, за жал, многу жени во Струмица, во земјата, во регионот“, истакна Митева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) „Филипче со лаги за економијата во стилот на Заев – не знае чија е јахтата, ама знае дека ќе коалицира со ДУИ“, вели Стојаноски

„Денешната прес-конференција на Венко Филипче е најдобар доказ дека СДС е изгубена во сопствените лаги и дека се обидува со празни бројки и манипулации да ја прикрие вистината: Македонија денес е држава на стабилни финансии, држава која по години пустош и корупција почна да се обновува и држава која ја враќа довербата во институциите“, вели Бојан Стојаноски, пратеник на ВМРО-ДПМНЕ.
„Како што тврдевме, така и испадна. Денеска Филипче јавно најави коалиција со ДУИ. Прашањето е едноставно: Што толку има ДУИ за него и за Заев, за да не можат да се тргнат од нивниот скут? Секојдневно зборуваат за „ново раководство“ и „автентични одлуки“, а на крајот повторно се враќаат кај старите партнери во криминал и во корупција.
Второ, зошто Филипче не собра храброст да одговори чива е јахтата на која го помина целото лето? Наместо да глуми жртва на пропаганда, нека ја каже вистината. ВМРО-ДПМНЕ никогаш не рекло дека јахтата е негова, туку дека е на неговиот ментор, оној кој и денес го контролира. Народот тоа јасно го гледа.
И уште една дилема којашто останува: Со кого беше на одмор целото лето? Со кого не разговарал за политика, туку можеби за „природата на универзумот“? Граѓаните заслужуваат искрен одговор, а не бегство од вистината зад празни флоскули.
Филипче зборува за економија, замислете истиот тој кој беше дел од владата што ја донесе највисоката инфлација во историјата на државата, најскапата струја и гориво, сиромаштија и задолжување за генерации нанапред. Под нивните политики, народот преживуваше со рекордно поскапување на лебот и основните продукти. Денес тој зборува за „стандарди“, истиот кој ја претвори македонската здравствена заштита во пепел, со крвави тендери, со аферата „Модуларна болница“, со јахти, со шеми и со договори во четири очи.
Ајде со бројки: Во времето на ВМРО-ДПМНЕ, од јули 2024 до јуни 2025, номиналниот раст на просечната нето-плата е 10.1%, а реалниот раст е 6.5%. Во времето на СДСМ, од 2017 до мај 2024, номиналниот раст е 8.2%, а реалниот раст едвај 3.5%. Истовремено, просечната стапка на инфлација под СДС беше 4.7%, а под ВМРО-ДПМНЕ е 3.6%. Само нека ги видат податоците и ќе им биде јасно кој ја лаже јавноста.
Најдрско е што Филипче ја обвинува Владата за инфлацијата и сиромаштијата, а токму тој и неговата банда се симбол за економска несигурност, криминал и корупција. Под СДСМ, Македонија беше држава на невработеност, затворени фабрики и контрола од криминални елити. Денес, Владата предводена од ВМРО-ДПМНЕ обезбедува стабилност, нови инвестиции, нови работни места и вистински економски раст, нешто што СДС не знае ни да го замисли, а камо ли да го спроведе.
Филипче зборува за „чест“ и „борба за граѓаните“, а го видовме како ужива на јахти, во друштво на транзициски олигарси, додека народот едвај врзуваше крај со крај. И денес, наместо да одговори чива е јахтата, тој се заплеткува во лаги и полувистини. Народот го гледа тоа и знае дека СДС е партија на тајкуни и тендери, а не партија на граѓаните.
За коалиции? Филипче сам призна дека СДС и ДУИ повторно се едно исто. Две партии без легитимитет, без идеи и без визија, кои знаат само да се бранат зад етнички поделби и криминални интереси. Македонија им сврте грб и тоа ги боли.
Најголемата вистина е дека СДС нема што да понуди: нема политика, нема програма, нема енергија. Затоа единствената нивна стратегија е хаос, дезинформации и клевети.
Македонските граѓани одамна ја разбраа играта на Филипче и неговите ментори. Затоа СДСМ е четврта партија со 6% рејтинг, а ВМРО-ДПМНЕ е таа што ја води државата кон стабилност, економски раст и европска иднина.
Филипче може да држи уште илјада вакви пресови, но едно ќе остане факт: Народот не живее од неговите лаги и ПР-празнословија, туку од реалните политики и резултатите кои Владата ги испорачува секој ден“, изјави Бојан Стојаноски, пратеник на ВМРО-ДПМНЕ.
Македонија
Алијанса за Албанците: Клеветите на ВМРО-ДПМНЕ повеќе не држат вода

„Кога ВМРО-ДПМНЕ и Христијан Мицкоски фрлаат отров, станува јасна една непобитна вистина: тие се шампиони на клеветата и ништо од тоа што го зборуваат не држи. Редовните клевети што ни ги сервира „Белиот дворец“ се само очајнички обиди да се пренасочи вниманието на јавноста од нивните постојани неуспеси“, велат од Алијансата за Албанците.
„ВМРО-ДПМНЕ беше во локална коалиција со Алијансата за Албанците, а до вчера и на централно ниво. Чудно е зошто досега немаа ниту една забелешка кон АА и претседателот Арбен Таравари, додека денес, откако им ги расипавме мрачните планови против Албанците во Северна Македонија, мизерно се обидуваат да плетат лаги и басни.
И потсетуваме на ВМРО на масовната корупција што ја имаа во времето на Груевски и сè уште со гордост држат околу себе корумпирани функционери со кривични дела. Заедно со неговиот експеримент ВЛЕН обвинуваат за еден паркинг кој никогаш не беше изграден и не изнесоа ниту еден факт за злоупотреба, додека и денес нивните рушевини од корупција стојат во Вардар, во центарот на Скопје, и не можат да се измијат ниту со водите на реката, ниту на езерото, ниту на кој било океан.
Арбен Таравари и Алијансата за Албанците не се фатени од никого и не се резерва на никого. Нашите одлуки се автономни и независни од надворешни фактори. Поради таа причина решивме без ни најмала жал или двоумење да излеземе од оваа антиалбанска и антиевропска влада, покажувајќи дека АА не може да се уценува, да се купи или да се продаде.
Ниските клевети на ВМРО-ДПМНЕ против АА и нејзиниот лидер, Арбен Таравари, не се ништо друго освен измама на самите себе и на јавноста.
Што се однесува до изјавите што беа јавно демантирани, самиот Мицкоски има кажано: „Никогаш нема да се случи членството на Северна Македонија во Европската Унија.“ Доколку мислеше дека тие зборови дадени во затворен круг ќе послужат како националистичка храна за членството, тогаш жестоко се излажал.
Антиалбанските и антиевропските ставови на Мицкоски повеќе не се јавна тајна. Тој често ја предава својата свест повторувајќи јавно тоа што го зборува во партиските канцеларии. Неговата последна изјава дека „Уставните измени нема да се случат ниту пред, ниту по локалните избори“ е јасен доказ за саботажа на европскиот пат, како и неговите секојдневни дејствија за нарушување на правата на Албанците и укинување на Охридскиот договор.
Мицкоски добро би направил да ги прекине врските со Москва, Будимпешта и Белград и да престане да биде промотор на „Српскиот свет“. Албанците никогаш нема да дозволат Северна Македонија да се претвори во непријател на Европската Унија, НАТО и Соединетите Американски Држави“, се наведува во соопштението на Алијансата за Албанците.
Македонија
Сите ученици ќе имаат учебници на почетокот на новата учебна година, и тоа по сите предмети, велат од МОН

Сите ученици ќе имаат учебници на почетокот на новата учебна година и тоа по сите предмети согласно наставните планови во соодветните одделенија. Втора година по ред печатењето и испораката на учебниците се реализира навремено, а секое училиште ќе го добие тиражот кој го има побарано преку посебната електронска апликација на Министерството за образование и наука.
Обезбедени се и учебници по странските јазици, за прв пат после седум години во кои недостигаа, а наставниците и учениците самостојно се снаоѓаа со литература. Нови учебници со унапредена содржина има и за седмо одделение во основното образование и за прва година во гимназиско образование, каде започнува примената на нови наставни програми. Над 100 нови наслови ќе бидат достапни и за учениците од средните стручни училишта, велат од МОН.
Изработката, печатењето и испораката на учебниците беше голем предизвик во минатото. Прашањето е системски решено, со новиот Закон за учебници во чија изработка учествуваа сите засегнати чинители, вклучително и автори, рецензенти, но и сите издавачки куќи во државата.
Сите надлежни институции, органи и тела кои учествуваат во постапката за обезбедување на учебници, доследно и навремено ги исполнија своите должности, за што Министерството за образование и наука изразува благодарност и повикува заедничкото делување за обезбедување на подобро образование да продолжи и понатаму. Учебниците се основен услов за квалитетен воспитно – образовен процес, се додава во соопштението на МОН.