Македонија
Тренчевска: Законот за родова еднаквост не е исто што и законот за матична евиденција, тоа се два закона што не третираат иста проблематика

Министерката за труд и социјална политика, Јованка Тренчевска, заедно со дел од нејзиниот тим денеска одржа брифинг за новинарите со наслов „Вистинскиот концепт на предлог-законот за родова еднаквост“.
Темата на брифингот беше предлог-законот за родова еднаквост, а се организира со цел да се расчистат дилемите во јавноста за ова ново предлог-законско решение и да се добијат точни информации за правилно информирање на јавноста.
Новинарите имаа можност да слушнат повеќе за потребата и целта од носењето на ова законско решение, суштината на законот, како и дистинкцијата помеѓу предлог-законот за матична евиденција и предлог-законот за родова еднаквост.
Министерката Тренчевска појасни дека станува збор за два закона, кои не третираат иста проблематика.
„Предлог-законот за родова еднаквост третира еднакви можности на жените и мажите. Предлог-законот ја унапредува положбата на жените во сите сфери во општеството. Со овој закон ниту се третира менувањето на полот ниту, пак, истополовите бракови, туку се занимава со унапредување на положбата на жените, како и еднаквите можности на мажите и жените во општеството. Воспоставување еднаквост, создавање видливост на жената во општеството, е единствената намера на креаторите на овој закон“, потенцира Тренчевска.
Министерката истакна дека предлог-законот за родова еднаквост сè уште е во консултативен процес и не е влезен ни во владина процедура. Притоа додаде и дека процесот ќе продолжи со цел да бидат слушнати сите фактори во општеството.
Министерката појасни дека родовата еднаквост не е исто што и половата еднаквост.
„Поимот род и пол не е исто што и родов идентитет. Тие се дефинирани во согласност со постојната законска регулатива во државата и во согласност со она што државата го презела како обврска од Истанбулската конвенција“, додаде Тренчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце се чека 40 минути

Зголемена е фреквенцијата на возила во земјава. На граничниот премин „Табановце времето на чекање за излез е околу 40 минути, додека на останатите гранични премини од македонска страна нема подолги задржувања при влез или излез од државата.
Како што информира АМСМ, сообраќајот на државните патишта се одвива непречено, по суви коловози, а интензитетот на патиштата надвор од градските средини е зголемен.
Се препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Пет активни пожари, најтешки за гаснење во Јасен и Јажинце, вели Ангелов

Екипи на ЈП „Национални шуми“, ЈП „Јасен“ и на Територијална противпожарна бригада на Град Скопје (БППЗ) го гаснат пожарот во повеќенаменското подрачје „Јасен“ каде е зафатена мешана шума. Како што информира попладнево директорот на Дирекцијата за заштита и спасување (ДЗС) Стојанче Ангелов, ставени се во функција и се користат сите можни ресурси.
Активен е и пожарот во Јажинце иако досега неколкупати бил ставен под контрола. Според Ангелов, овој пожар се уште е закана за некои од околните села и затоа на магистралниот пат што од Тетово води кон граничниот премин „Јажинце“ се поставени возила, како бариера – да го сопрат огнот. Ангелов очекува во текот на денешниот ден пожарот да биде изгаснат. Притоа предупреди дека еден дел се шири кон Скопје, село Дворце, во општина Сарај каде на терен се наоѓа екипа на БППЗ.
Покрај овие два, кои се најтешки за гансење, како што истакна Ангелов, има уште три активни пожари.
-На територија на цела држава има пет активни пожари на отворен простор, од кои два се сериозни за гаснење. Првиот пожар е во ловиштето „Јасен“ каде рано утрово со дејство почнаа 30 припадници на специјалните единици „Волци“ и „Ренџери“, а присутни на терен се екипи на ЈП „Национални шуми“, на ЈП „Јасен“ и на Територијална противпожарна бригада на Град Скопје (БППЗ), иако во текот на вчерашниот ден воспоставивме делумна контрола врз овој тежок за гаснење пожар, изјави од терен Ангелов. Додаде дека утрово добил фотографии од кои се гледа дека еден дел од пожарот пак е активен и гори, изјави директорот на ДЗС.
Стратегијата е, како што рече, пожарот да биде пресретнат и стопиран и во текот на денов да се стави под делумна контрола.
Ангелов потсети дека пожарот во атарот на Јажинце, општина Јегуновце, вчера бил целосно изгаснат, но ноќта повторно се активирал.
-И покрај тоа што со пешадиско гаснење некаде по полноќ до 2 -3 часот наутро успеавме да изгаснеме една линија подолга од еден километар, сепак, утрово, пак, се активира кракот во насока кон Шар Планина. Претставуваше и се уште претставува закана за некои од овие села, иако на магистарлниот пат кој од Тетово води кон ГП Јажинце се поставени возила. Доколку огнот дојде до патот, ќе биде сопрен, појасни Ангелов.
Македонија
(Вознемирувачко видео) Полицијата на раце носи жена што се обиде да се самоубие скокајќи во Вардар

Денеска (16.08.2025) околу 14 часот во СВР Скопје е пријавено дека во реката Вардар во Скопје, под мостот на ул. “Војвода Васил Чакаларов” има женско лице.
Од страна на полициски службеници од ПС Карпош веднаш е постапено по пријавата и по пристигнување на местото на настанот, било утврдено дека лицето дава знаци на живот и од страна на полициските службеници жената е извадена од реката, по што со Итна медицинска помош е пренесена во Ургентен центар при комплекс клиники “Мајка Тереза” во Скопје за укажување на помош.