Македонија
Тренчевска: За утврдување на минималната пензија ќе се разговара во 2023

Време е да се разговара за утврдување на минималната пензија на ист начин како што имаме утврдена минимална плата, смета министерката за труд и социјална политика, Јованка Тренчевска. Таа денес на вториот ден од „Текстилијадата“ во Штип, одговарајќи на новинарско прашање за барањата на пензионерите минималната пензија да изнесува 20.000 денари, рече дека в година ќе се одлучува колкава да биде минималната пензија.
„На состанокот кога го креиравме моделот за усогласување на пензиите, зборувавме со претставниците на Сојузот на пензионерите дека време е во 2023 година да почнеме да разговараме за систем на минимална пензија, како што имаме и минимална плата, меѓутоа колкава ќе биде зависи од анализите што треба да се направат во меѓувреме и секако во дијалог со Сојузот на пензионерите. Време е да се размислува за минимална пензија“, рече министерката Тренчевска.
Таа потсети дека со усогласувањето во јануари од 2,9 % и сегашното од 6,8 % пензиите се покачени речиси 10 %, нешто што никогаш во изминатиот период не се случило, а следно усогласување ќе има во март 2023 година.
„Кога градиме систем, градиме за да имаме резултати и на краток и на долг рок, но ако сакавме да бидеме популисти, можевме да кажеме на сите линеарно покачување од две, три, пет илјади денари. Ќе го осетат во самиот момент, но тоа не е систем што значи трајно решавање на проблемот со усогласување. Како министерка за труд насочена сум кон трајни системски решенија, кои даваат резултати и на краток и на долг рок“, рече министерката Тренчевска.
По последното усогласување со кое пензионерите добија покачување на пензиите од 6,8 %, особено пензионерите со најниски пензии, сè погласно кажуваат дека покачување од 700-800 денари не значи многу во услови кога цените на основните продукти последниве месеци се речиси удвоени.
Според последната анализа што ја објави Фондот за пензиското и инвалидското осигурување минатиот месец, во јули пензија добиле 330.884 пензионери. Најниската исплатена пензија била 10.276 денари, а највисоката 60.294 денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Македонецот кој спречи терористички напад во авион: „Реагирав инстинктивно“

На летот од Лондон до Глазгов се случи инцидент, откако еден од патниците извика дека има бомба, со слогани „Смрт за Америка, смрт за Трамп“ и „Алах акбар“. Патникот кој се закани дека ќе постави бомба беше совладан од Зоран Настески, по потекло од Македонија и Србија, кој живее во Велика Британија.
Настески го собори човекот на подот за време на летот и го држеше до слетувањето, кога го презеде шкотската полиција. Во меѓувреме, во Велика Британија е започната истрага за терористичкиот напад. Индискиот „Јутуб“ канал „НДТВ“ објави видео од инцидентот, на кое се гледа моментот кога Настески совладува патник кој извикува дека има бомба и го навредува американскиот претседател Доналд Трамп.
View this post on Instagram
„Вчера наутро тргнав на одмор во Глазгов. Десет минути пред слетувањето, еден човек помина покрај мене држејќи кафе и телефон во рацете. На почетокот се плашев дека ќе ми истури топло кафе, па се засолнив. Потоа почна да вика дека има бомба и дека ќе го собори авионот, за да докаже дека политиката на Трамп е погрешна“, вели Настески, пренесува „Телеграф.рс“.
Патниците паничеа, додаде Настески, децата врескаа, а екипажот беше видливо вознемирен.
„Само реагирав инстинктивно, сакав да ги заштитам другите. Станав, го соборив, му го зедов телефонот и го држев за раце додека не слетавме. Набрзо ми помогна друг патник, не сум сигурен дали беше Англичанец или Шкотланѓанец“, рече Настески.
По слетувањето на аеродромот, пожарникарите и полицијата дојдоа на пистата и уапсија 41-годишен маж. Целиот настан го снимила патничка. Видеото набрзо станало вирално на социјалните мрежи.
По десет години работа во Велика Британија, Настески планира да се пресели со својата партнерка во Србија, каде што има семејни корени. Неговиот татко е Македонец, роден во Скопје, а неговата мајка е Србинка.
„Се селам во Белград затоа што ја запознав најпрекрасната жена на светот, Сандра“, рече Настески.
Авиокомпанијата „Изи џет“ објави дека човекот што го предизвикал инцидентот бил уапсен веднаш по слетувањето во Глазгов и дека персоналот на авионот бил обучен да се справува со вакви ситуации, за да не биде доведена во прашање безбедноста на сите во авионот.
Македонија
Започна изградбата на пречистителната станица за отпадни води во Битола

Во општина Битола, денес беше одржан состанок, со кој се означи почетокот на реализацијата на проектот за изградба на пречистителната станица за отпадни води.
Во присуство на претставници на Министерството за животна средина, Министерството за финансии, изведувачот на пречистителната станица конзорциумот Лантаниа-Стентон градба-Карканиас, избраниот надзор- фирмата Ептиса, претставници на КЈП „Нискоградба“ и претставници на општинската администрација, градоначалникот на општина Битола Тони Коњановски, посочи дека овој стратешки еколошки проект е многу значаен чекор кон заштитата на животната средина.
Основната цел на проектот е да се подобри инфраструктурата за собирање и третман на комунални отпадни води, во согласност со директивата за третман на отпадни води и националниот закон. Според договорот, времетраењето на градба е 2 години и една година гарантен период. Со помош на ЕУ, се гради одржлив систем за отпадни води за идните генерации, преку инвестирање во чиста вода и зелени решенија што ќе обликуваат поздрава и поодржлива иднина.
Македонија
Дожд и грмежи вечерва и во раните утрински часови, јавува УХМР

Времето до крајот на денот ќе биде сончево со мала до умерена локална облачност. Ќе дува слаб до умерен, во западните делови западен, а долж Повардарието северен ветер, кој наместа повремено ќе засилува. Кон крајот на денот во северозападните делови облачноста ќе се зголеми и во текот на ноќта и во раните утрински часови ќе има локален дожд, повремено пороен со појава на грмежи и услови за краткотрајно невреме.
Времето утре ќе биде променливо облачно и посвежо, претпладне со повремено пороен локален дожд, грмежи и услови за појава на краткотрајно невреме. Ќе дува слаб до умерен, а наместа долж Повардарието повремено засилен ветер од северозападен правец. Минималната температура ќе биде во интервал од 13 до 22, а максималната ќе достигне од 27 до 35 степеним јавува УХМР.
Во Скопје, променливо облачно, во раните утрински и претпладневни часови со повремен пороен дожд и услови за појава на ретки грмежи. Ќе дува слаб до умерен, попладне во делови од котлината повремено засилен северен ветер. Минималната температура ќе се спушти до 19, а максималната ќе достигне до 33 степени.