Македонија
Тренчевска и Бочварски: Сите граѓани се еднакво важни, инвестираме на територијата на целата држава со цел подобар животен стандард

Министерката за труд и социјална политика, Јованка Тренчевска, и министерот за транспорт и врски, Благој Бочварски, посетија две локации во општина Кавадарци: објектот „Сонце“ од ЈОУДГ „Рада Поцева“, инвестиција на Министерството за труд и социјална политика, и реконструираната улица Димката Ангелов-Габерот, инвестиција преку Министерството за транспорт и врски.
Министрите Тренчевска и Бочварски во објектот „Сонце“ од ЈОУДГ „Рада Поцева“ направија обиколка во градинката и проследија дел од активностите што беа изведувани од страна на децата од градинката.
Тренчевска во својата изјава за медиумите, по посетата во градинката, ги истакна досегашните инвестиции на Министерството за труд и социјална политика во општина Кавадарци.
„Само во општина Кавадарци од 2017 година до сега отворивме 5 нови објекти, со што обезбедивме места во градинката за вкупно 363 деца. Владата преку капиталните инвестиции на Министерството за труд и социјална политика инвестира само во општина Кавадарци за градежни активности и опрема во детските градинки вкупно 1,049,863 евра. Денес, утрото го поминавме во објектот ‘Сонце’ од детската градинка ‘Рада Поцева’, кој има капацитет за 140 деца. Овој модерен објект со современа опрема е инвестиција на Министерството за труд и социјална политика преку проектот за подобрување на социјалните услуги финансиран од Светската банка. За овој објект издвоивме 50.219.379 денари за градежни активности и 8.515.702 денара за набавка, испорака и монтажа на опрема“, рече Тренчевска.
Министерот Бочварски заедно со Тренчевска направи и увид на реконструирана улица Димката Ангелов-Габерот, инвестиција преку Министерството за транспорт и врски.
При посетата на Кавадарци министерот Бочварски потенцира дека граѓаните на Кавадарци добиваат квалитетни проекти со кои се подигнува квалитетот на живот, подобри патишта и развој на локалната економија.
„Преку Министерството за транспорт и врски инвестираме 1,1 милион евра само за подобрување на локалните улици и до сега ги реконструиравме: улиците Дисанска, западен булевар, Илинденска, Пионерска, Браќа Џунови, Димката Ангелов-Габерот, на која се наоѓаме денеска.
Понатаму, улиците Слога, Вељко Влаховиќ и Максим Горки.
Оттука, сакам да најавам дека в година ќе ги реконструираме и улиците Ѓорѓи Соколов и 25 Мај за кои постапките во Министерството за веќе почнати.
Исто така, инвестиравме 2,5 милиона евра во делот на комуналната инфраструктура на 11 улици. А она што е најважно е дека со силна динамика работиме на изградба на експресниот пат од Градско кон Прилеп како директен бенефит за сите граѓаните од Кавадарци и регионот“, изјави министерот Бочварски.
На посетата на инвестициите беа присутни и пратениците Даниела Колева и Панчо Минов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) СДСМ: Целиот систем се распаѓа додека ДПМНЕ, ЗНАМ и ВЛЕН меѓусебно се расправаат

Уште не е помината првата година од мандатот на новата Влада, веќе на граѓаните има стана јасно, Владата на ДПМНЕ, ЗНАМ и ВЛЕН се најлошата и најнефункционалната Влада која сме ја имале. Додека целиот систем бувално се распаѓа, тие ја трујат јавноста со внатрекоалициски расправии. Наместо да сработат нешто од програмата, медиумите се полни со нивните партиски несогласувања, изјави портпаролката на СДСМ, Богданка Кузеска.
„Очигледно е дека покрај тоа што не се способни да ја водат државата, не се способни ниту да се договорат во Владата како да си ги поделат тендерите, па затоа се расправаат. Луѓето гледаат како власта се кара самата со себе, додека државата тоне.
Нема институција што функционира. Во здравството – хаос, економијата тоне, реализација на проекти нула, плати стагнираат а и оние постоечките не се исплаќаат. Во ваков целосен хаос државата никогаш не била.
Немаме ниедна мерка за помош ниту проекти насочени кон граѓаните. А каде одат парите? За манго, папаја и шетање по белиот свет на владини делегации од по 60 луѓе. За приватни авио-летови, за сметки по луксузни хотели а за граѓаните? Евтин ПР и коалициски расправии, ништо друго.
Им порачуваме, грејс периодот одамна ви помина. Одамна граѓаните чекаат нешто конкретно што ќе се сработи во нивни интерес. Фактот што единствено се бавите сами со себе јасно потврдува дека оваа Влада е целосно неспособна. Тоа се гледа јасно и од авион. Освен кој колку земал, како се поделени фунцкиите, како пропаднале тендерите за паркингот на Клинички и слично, друго немате ништо понудено“, рече Кузеска.
Македонија
Мицкоски: Истрагата за Кочани ја води Обвинителството, не Владата

Премиерот Христијан Мицкоски на денешната собраниска седница за пратенички прашања, потенцираше дека обвинителството ја води истрагата за несреќата во Кочани, а не владата и токму обвинителството кажува кој ќе биде опфатен и посочи дека во моментов 68 лица се опфатени меѓу кои има актуелни функционери, што во време на СДСМ беше невозможна мисија.
„Не мислев дека можете толку ниско да се спуштите и сѐ уште да се обидувате да се качите на бранот на колективната трагедија која ја зафати државата. Барем пратеничката група на СДСМ има најмалку право да зборува за морал. Што се однесува за оставките за 5 месеци од денеска ќе започне кампања за локални избори и граѓаните ќе кажат чија политичка кариера завршува, чија продолжува и во каква форма. Граѓаните ќе кажат. Тоа што играте на картата на кратко помнење и континуирано ги навредивте граѓаните мислејќи ќе добиете политички поени, ве советувам, не, нема да добиете, туку губите“, изјави премиерот Мицкоски одговарајќи на пратеничко прашање од пратеникот Митко Трајчулевски.
Премиерот Мицкоски му појасни на пратеникот дека истрага води обвинителство и обвинителството кажува кој треба да биде приведен, а не владата.
„Нека ви кажат сопартијците за модуларната болница, за Ласкарци и за Беса Транс колку беа опфатени со истрага и колку кривични пријави беа поднесени во тој момент. Ако не ви кажат, набргу од денеска ќе има расправа во Собранието и ќе слушнете од другите колеги пратеници и зошто, кој и како. Истрагата за Кочани ја води јавниот обвинител, не јас, не владата. Ако јавниот обвинител одлучи дека мене треба да ме приведат, нека ме приведат. Седум години не затворавте, не приведувавте и до ден денеска ВМРО-ДПМНЕ е под прогон на обвинители од времето кога СДСМ ги бираше. Издржавме и затвор е за мажи, а во нашиот случај и за жени. 68 лица досега се опфатени во истрагата од страна на јавниот обвинител, обвинителството и сите кои се задолжени за ова. За разлика од модуларната болница, Ласкарци, Беса Транс каде починаа 75 наши сограѓани имаше нула. Овде има 68 лица, дали ќе бидат 168 ќе каже обвинителството, не јас, не министерот за внатрешни работи, туку обвинителството заедно со судот одредуваат“, потенцираше премиерот Мицкоски.
Тој додаде дека да нема дилема ако обвинителот рече дека треба да се приведат високи функционери од оваа влада, ќе се случи тоа.
„Еден член на владата е во притвор. Во ваше време тоа беше невозможна мисија. Повикани на информативен разговор високи функционери од страна на обвинителството, не од моја страна, не од страна на министерот за внатрешни работи. Истите обвинители и судии кои вие ги биравте, вашиот Совет за јавни обвинители и Судски совет кои вие ги биравте, не ВМРО-ДПМНЕ и треба работите правилно да се кажуваат, македонската јавност треба да ја знае вистината. Актуелен градоначалник е притворен, во време на СДСМ тоа беше невозможна мисија“, рече Мицкоски.
Мицкоски нагласи дека нема да се заборават случаите како модуларната болница, Беса Транс и Ласкарци и дека нема да помогне ниту шверцерски поминатиот Кривичен законик со европско знаме.
Македонија
Крводарителска акција на 30 април по повод Светскиот ден на слободата на медиумите

Самостојниот синдикат на новинарите и медиумските работници организира крводарителска акција на 30 април со која ќе го одбележи 3 Мај – Светскиот ден на слободата на медиумите. Акцијата ќе се одвива координирано на неколку локации во земјата.
„На 30 април 2025, во терминот од 8 до 14 часот, драгоцената течност која спасува животи ќе може да се дарува во Скопје во просториите на Дневниот центар за дарување крв на Црвениот крст на град Скопје (ДХО ‘Даре Џамбаз’). Во исто време, во просториите на службите за трансфузиона медицина во Клиничкиот центар во Битола, во Општата болница во Струмица, ЈЗУ Општа болница Прилеп и во Клиничкиот центар во Штип крв ќе може да се дарува од 9 до 14 часот“, велат од ССНМ.
Крводарителската акција, која Синдикатот ја организира трета година по ред, се одржува во соработка со Здружението на новинарите на Македонија (ЗНМ) и со поддршка на Црвениот крст на град Скопје. Со цел ефикасно организирање на оваа солидарна акција пријавувањето е на електронската пошта на ССНМ – [email protected].