Македонија
Тренчевска: Нереално е барањето минималната пензија да биде 18 илјади денари, мора да се мисли на стабилноста на Фондот

Министерката за труд и социјална политика Јованка Тренчевска потенцираше дека МТСП е отворено за секој граѓанин и од тие причини, вели беше одржана средба со Иницијативниот одбор на пензионерите кои протестираа и со Сојузот на здружението на пензионери.
– Состаноците беа конструктивни, барањата ги слушнавме и на Иницијативниот одбор и на Сојузот на пензионери. Се договоривме, јас како министерка да доставам информација до Влада, да формираме работна група за прашањето за минимална пензија, односно Закон или измени на Законот за пензиско за да утврдиме износ на минимална пензија, согласно сето она што значи стабилност на Фондот за пензиско и капацитет на државата.
Таа додава дека разговарале и за тоа преку работната група да се дојде до одредени мерки и политики од социјален карактер за да им се помогне на сите пензионери, со посебен фокус на пензионерите со минимална пензија.
– Не очекува ново усогласување со септемвриската пензија. Ги очекуваме деновиве податоците од Заводот за статистика, врз основа на ова ќе го знаеме точниот процент за усогласување на пензиите на сите пензионери, рече министерката.
Тренчевска очекува дека до крајот на годината ќе се најде соодветно решение како да се дефинира минималната пензија во државата, која што ќе биде над она што значи праг на сиромаштија.
– Законското решение кое што е во моментот и при носењето на новата методологија во 2022 година, сите пензионери се согласија, вели дека 50 проценти од трошоците на живот и 50 проценти од порастот на просечната плата, во изминатото полугодие, во однос на она што му претходело. Очекуваме да ги добиеме податоците и врз основа на нив ќе видиме колку ќе биде. Можно е шест, можеби нешто повеќе, се зависи од статистиката, рече таа.
– Секогаш кога се креираат политики мора да се мисли на стабилноста на Фондот за пензиско, 18 илјади денари пензија е нереална цена, затоа што минималната плата ни е 20 илјади, кажа министерката.
„Тоа ќе значи дополнително оптоварување на Фондот за пензиско и доведување во ситуација да после три, четири месеци, се прашаме дали сите 330 илјади пензионери ќе добијат пензија. Мора да водиме сметка за стабилноста на Фондот за пензиско осигурување. Тоа е вистинска грижа, не се потребни популистички мерки. Во неколку месеци ќе ги задоволат потребите на сите пензионери, но на подолг рок ќе се доведе во прашање стабилноста на Фондот. Нема да дозволам како министерка, да се доведе во прашање исплатата на пензиите на било кој пензионер“, додаде Тренчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Собранието в среда ќе гласа за предлогот Трајко Славески да биде нов гувернер

В среда, 28 мај, ќе се одржи седницата за избор на гувернер на Народната банка (НБРМ).
Според информациите објавени на веб страницата на Собранието, сендицата ќе почне во 11 часот, а изборот на гувернер е прва точка на дневниот ред.
За оваа позиција претседателката Гордана Сиљановска-Давкова го предложи актуелниот претседавач на Советот на Град Скопје, професорот Трајко Славески. Од нејзиниот кабинет по предлогот истакнаа дека при носењето на одлуката, претседателката се водела од стручноста и компетентноста, дигнитетот и интегритетот, како и реалната можност за именување на кандидатот.
ВМРО-ДПМНЕ најави поддршка за Славески, додека опозициската СДСМ соопшти дека нема да го поддржи, нарекувајќи го партиски кадар.
Славески, доколку биде избран за гувернер, ќе си замине од функцијата во Град Скопје.
Македонија
„Марш за ангелите“ – во Кочани утре нов марш на семејствата на настраданите во пожарот

Седмиот „Марш за ангелите“ за настраданите во пожарот во дискотеката „Пулс“ ќе се одржи утре во Кочани.
Маршот на кои семејствата повторно ќе побараат неселективна правда ќе почне во 16:05 часот од Паркот на Револуцијата и ќе продолжи кон Трговскиот центар по што учесниците ќе се упатат кон општинската зграда, а оттаму кон Полициската станица и пред Основниот суд и Обвинителството во Кочани.
Поддршка на маршот даде и движењето „Кој е следен?” кое организира бесплатен автобуски превоз од Скопје до Кочани.
Македонија
Со јапонски искуства ќе се трансформира системот за управување со кризи и заштита и спасување, Ангелов ја заврши посетата на Јапонија

Директорот на Центарот за управување со кризи (ЦУК), Стојанче Ангелов, заедно со раководителот на Секторот за аналитика во ЦУК, Стевко Стефаноски (носител на соработката) ја завршија исклучително успешната и корисна еднонеделна работна посета на Јапонија што ќе ја продлабочи понатамошната соработка меѓу ЦУК и Агенцијата за меѓународна соработка на Јапонија (JICA), соопшти Центарот за упрвување со кризи.
„Стекнатите искуства и знаења ќе бидат добредојдени во процесот на трансформација на системот за управување со кризи и заштита и спасување (СУК)“, информираат од ЦУК.
Директорот Стојанче Ангелов, изрази голема благодарност до Агенцијата за меѓународна соработка на Јапонија којашто ја овозможи оваа работна посета покривајќи ги сите трошоци, вклучително и авионските билетите и хотелското сместување во Јапонија.
Од ЦУК додаваат дека за повеќето информации од конкретни активности во Јапонија, јавноста ќе биде информирана во наредниот период.