Македонија
Тренчевска: Социјална правда имаме кога се отстранети бариерите врз основа на пол, возраст, етничка припадност и попреченост

Министерката за труд и социјална политика, Јованка Тренчевска, денеска, по повод Меѓународниот ден на социјалната правда, имаше отворен ден за посета на граѓани од ранливи категории.
По тој повод, таа истакна дека социјална правда имаме кога се отстранети бариерите со кои се соочуваме врз основа на пол, возраст, етничка припадност и попреченост.
„Кога зборуваме за социјална правда, зборуваме за сите политики и мерки, кои значат вработување, искоренување на сиромаштијата, социјална вклученост, градење поправедно и вистински хумано општество за сите наши граѓани“, порача Тренчевска.
На средбата со Анабела и Горде, кои живеат во станбените единици на НВО „Порака-Волково“, се разговараше за живеењето во заедницата, за нивната ангажираност во продажбата на списанието „Лице в лице“, за секојдневието и дружењето со другите членови од „Порака“, за нивните желби и планови.
Преку процесот на деинституционализација во нашата држава воспоставени се 53 станбени единици за живеење со поддршка за деца и лица со попреченост. Во следниот период планирано е отворање три нови станбени единици во Скопје во рамките на Јавната установа Завод за рехабилитација на деца и млади. Процесот особено се интензивира од воспоставувањето на социјалната реформа.
Тренчевска се сретна со една од жените жртви на семејно насилство, која по претрпеното насилство од својот сопруг била загрижена и заштитена во засолниште. За време на нејзиниот престој во центарот за жртви на семејно насилство, дадена и е психосоцијална поддршка, како и поддршка за зајакнување на нејзините капацитети и за вработување. Денеска таа живее слободно, работи и се грижи за своето дете.
„Родово базираното насилство врз жените и семејното насилство се јавува во сите општества, дури и во најразвиените држави, можеби некаде е повидливо, а некаде затскриено, но тоа постои и затоа пред него не смееме ниту да молчиме ниту да го игнорираме. Напротив, треба да ја подигнуваме свеста за негово препознавање и постапување“, порача Тренчевска.
Целта е специјализираните сервиси да бидат достапни на целата територија на државата. Центри за жртви на семејно насилство и родово базирано насилство (засолниште) под МТСП се 9 и уште 5 од граѓанскиот сектор. Ги покриваат сите 8 плански региони на РСМ.
На ниво на држава имаме воспоставено и 10 советувалишта за жртви на семејно насилство, кои опфаќаат 7 плански региони. Истовремено, се работи и со сторителите на насилство и за таа цел имаме воспоставено 8 советувалишта. Преку овој сервис директно влијаеме на спречување на секундарната виктимизација на жртвите на насилство.
Во посета на кабинетот беше и жена – без сопствен дом, која веќе неколку години е сместена во Центарот за сместување бездомни лица „Чичино Село“ заедно со своите две малолетни деца. Тука тие, покрај покрив над главата, добиваат и три оброци, хигиенски пакети, лекови, училиштен прибор. На двете жени им беше посочено дека може да аплицираат и за социјален стан, што ги обезбедува Владата на Република Северна Македонија за ранливите категории граѓани.
„Владата на Република Северна Македонија посветено работи на политики и мерки што го унапредуваат животот на граѓаните, со акцент на најранливите. За тоа потврдуваат: зголемувањето на минималната плата за два и пол пати, изградба и проширување на 76 градинки во целата држава, првпат во историјата на нашата држава обезбеден е надоместок за мајчинство за жените земјоделки, зголемена гарантираната минимална помош за 300 отсто, воведен е детски и образовен додаток за 70 илјади деца, обезбедена е социјална сигурност за повеќе од 10 илјади стари лица преку социјална пензија, обезбедени се лични и образовни асистенти за над 1000 деца со попреченост, воспоставена е помош и нега во домот за над 700 стари лица во своите домови и зголемена е пензијата за околу 25 % за само една календарска година“, порача Тренчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ослободена од стапица мечка во Ресенско

Регионалниот ЦУК Битола, известува дека преку Единствениот број за итни случаи 112 во ЦУК била добиена пријава за заробено диво животно како последица од поставена криволовна замка во атарот на помеѓу селата Љубојно и Брајчино (Општина Ресен).
Пријавителот претпоставил во пријавата дека најверојатно се работи за мечка поради гласното рикање што се слушало во непосредна близина на мостот на Брајчинска Река.
„За оваа ситуација, од страна на ЦУК веднаш е известена Гранична полиција Маркова Нога, Полициска станица Ресен, Концесионерот – ловното друштво и други субјекти за понатамошно постапување. По интервенцијата на надлежните служби од Концесионерот -Ловното друштво, со присутен ветринар, од НП „Пелистер“ и од полицајци од МВР мечката е успиена и безбедно ослободена“, соопшти ЦУК.
Македонија
Средба Тошковски – Ходулин: Интензивна поддршка од ЕУ преку ИПА проектите за креирање полиција со европски стандарди

Министерот за внатрешни работи Панче Тошковски денеска оствари работна средба со претставници на Делегацијата на Европската унија, предводени од Стефан Ходулин, раководител на Одделот за соработка и Даница Стошевска, програм менаџер во канцеларијата.
На состанокот беше разгледана досегашната соработка помеѓу Министерството за внатрешни работи и Делегацијата на Европската унија во делот на спроведувањето на проектите финансирани преку Инструментот за претпристапна помош (ИПА).
Од страна на господинот Ходулин беше изразено задоволство од постигнатото во рамките на веќе спроведените проекти кои се имплементираат во министерството и изрази надеж дека посветеноста ќе продолжи со ист интензитет.
Министерот Тошковски во име на Министерството за внатрешни работи и се заблагодари на Делегацијата на ЕУ за досегашната поддршка и потенцираше дека истата е од исклучителна важност за министерството, и дека од наша страна ќе бидат обезбедени сите ресурси со цел максимално и рационално искористување на финансиската поддршка која е наменета за постигнување на европските стандарди во полициското работење.
За време на состанокот исто така се разговараше и за идните проекти кои се дел од Националната ИПА програма за 2025 година и следниот период, по што заеднички беше донесен заклучок дека ќе се продолжи со интензивни активности во наредниот период со цел финализирање плановите и проектите како основа за идното програмирање и обезбедување на сите неопходни предуслови од страна на министерството за внатрешни работи и целосна посветеност во нивната подготовка.
Двајцата соговорници изразија уверување и подготвеност за продолжување на одличната соработка и во иднина.
Македонија
Сиљановска-Давкова на средба со Радев: во фокусот трагедијата во Кочани и евроинтегративниот пат

Претседателката Гордана Силјановска-Давкова која е во Бугарија за да учествува во „Процесот Акаба“, пред медиумите соопшти дека ги посетила повредените пациенти кои настрадаа во трагедијата во Кочани и сега се на лекување во болницата „Пирогов“.
Рече дека се чувствуваат многу подобро. Таа оствари средба и со бугарскиот претседател Румен Радев.
Фокусот бил на трагедијата во Кочани, но се разговарало и за одблокирање на нашиот евроинтегративен пат, при што двајцата заклучиле дека се неопходни позачестени средби. Претседателката нагласила дека се можни компромиси и очекува исчекор на тој план.
Оддавајќи му признание на Радев таа кажа дека тој бил првиот претседател којшто утрото по трагедијата во Кочани и се јавил и и понудил секаков вид на помош.
„Прв ми се јави претседателот Радев. Благодарам. За жал или за добро, понекогаш трагедијата го вади доброто во сите нас, не политичкото, туку човечкото. Ова нема да може да го заборави ниту еден политичар од двете страни“, ја пренесуваат изјавата на Силјановска-Давкова бугарските медиуми.