Сопругата на затворениот поранешен јужнокорејски претседател Јун Сук Јеол, Ким Кеон Хи, е уапсена по низа сериозни обвиненија вклучувајќи манипулација со акции и поткуп. Поранешната прва дама ги негира сите обвиненија за време на четиричасовното судско рочиште во Сеул, но судот сепак издаде налог за притвор наведувајќи го ризикот од уништување на доказите, објавува Би-би-си.

Иако Јужна Кореја има долга историја на обвинувања и затворање поранешни претседатели, ова е првпат и поранешен претседател и поранешна прва дама да бидат зад решетки. Нејзиниот сопруг Јун беше приведен во јануари и чека судење за неговиот неуспешен обид да воведе вонредна состојба минатата година, потег што ја втурна земјата во хаос и на крајот доведе до негово соборување.

Обвинителите тврдат дека 52-годишната Ким заработила повеќе од 800 милиони вони (приближно 578.000 долари) со учество во шема за фиксирање на цената на акциите на „Дојч моторс“, јужнокорејскиот дилер на БМВ. Иако наводно се случило пред нејзиниот сопруг да стане претседател, аферата фрли сенка врз целиот негов мандат.

Таа е обвинета и за прифаќање две чанти „шанел“ и дијамантски ѓердан како мито од контроверзната Црква за обединување во замена за деловни услуги. Меѓу другите обвиненија, Ким се обвинува и за влијание врз номинациите на кандидати за време на парламентарните дополнителни избори во 2022 година и општите избори минатата година.

Ким Кеон Хи се појави на сослушувањето со сериозен израз на лицето, облечена во црн костим. „Искрено се извинувам што предизвикав проблеми и покрај тоа што сум незначителна личност“, изјави таа кратко пред новинарите.

Додека беше на функцијата, нејзиниот сопруг Јун стави вето на три опозициски закони, со кои ќе се бараше специјален обвинител да ги истражи обвинувањата против неговата сопруга. Последен пат стави вето на нив во ноември, само една недела пред да прогласи вонредна состојба. Специјалниот обвинител за случајот беше назначен во јуни оваа година откога ривалот на Јун, Ли Џе Мјунг, ја презеде функцијата.