Македонија
(Видео) Угриновски: Срамните игри за притворот на обвинетите за 27 април се под менторство на Бејли

Срамните игри со пуштањето и притворањето на осомничените од 27 април е договор помеѓу СДСМ и ВМРО-ДПМНЕ, под менторство на американскиот амбасадор Џес Бејли, обвини Драган Угриновски, член на ИК на Единствена Македонија и претседател на „Тврдокорни“.
„Со овие игри на владејачката партија ‘Погреб за Македонија’, составена од СДСМ и ВМРО-ДПМНЕ, целта е од Истражниот затвор ‘Шуто Оризари’ да се пуштат сите оние за кои се заинтересирани во ВМРО-ДПМНЕ, а за возврат партијата да се врати во Собрание и да учествува во донесувањето на законите за разнебитување на Македонија“, рече Угриновски.
За настаните од 27 април од Единствена Македонија во Собранието беше поднесен предлог-закон за амнестија на притворените. Угриновски вели дека Единствена Македонија се залага за укинување на притворот на секое притворено лице, но силно го осудуваат селективниот договор на ВМРО-ДПМНЕ и СДСМ за непристоен пазар, односно укинување на притворот на функционерите на ВМРО-ДПМНЕ, а за возврат враќање на оваа партија во Собранието.
„Граѓаните на 27 април во Собранието влегоа со силна верба дека го бранат уставниот поредок, а не да нападнат конкретни лица. Претходно беше создадена атмосфера дека е загрозен уставниот поредок“, рече Угриновски и додаде дека претседателот Ѓорге Иванов при давањето на мандатот на Зоран Заев барал гаранции токму за она за што сега се водат постапки, за 27 април, со што тогаш и самиот претседател ја потврдил општествената опасност за уставниот поредок.
Претседателот на МПЗ „Тврдокорни“ вели дека членовите на здружението се разочарани од одлуката само на одредени лица да им се укинува притворот, додека, пак, вистинските патриоти да останат во затвор. „Разочарани сме од валканата игра на ВМРО-ДПМНЕ која се пазари за укинување на притворот само за своите, а ги предаде уставобранителите кои и понатаму остануваат во занданите на Шутка. Ние од Единствена Македонија и МПЗ Тврдокорни остануваме со уставобранителите и како и досега продолжуваме со нашата помош за семејствата на притворените како и со битката за нивно ослободување“, рече Угриновски.
В.Ј.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Бројот на вработени намален за 17.000 – погубни економски политики на ВМРО-ДПМНЕ

Фрапатни се податоците кои покажуваат дека по доаѓањето на ВМРО-ДПМНЕ на власт во 2024 година во земјава има над 17.000 помалку вработени, обвини СДСМ.
Според партијата, тоа е директен резултат на погубните економски политики, хаосот и несигурноста, како и напуштање на политиките кои ги востастави СДСМ за стабилна и одржлива економија.
„Со оваа неспособна Влада: пазарот на труд се стеснува, продуктивното население е разочарано и заминува, Фондот за пензиско осигурување е под притисок, бидејќи денес 1,63 вработени обезбедуваат една пензија, наместо 1,74 како што беше пред само една година. Владата нема стратегија, нема визија, нема мерки за задржување и отворање на нови работни места“, велат од СДСМ.
Од таму обвинија дека ова се последици од владеењето на Мицкоски и дека се зголемува несигурноста за младите, пензискиот систем се доведува во ризик, а приватниот сектор е оставен сам да се снаоѓа.
Македонија
Регионална иницијатива за превенција од пожари на Западен Балкан

Во услови на зголемени ризици од пожари, започна регионална иницијатива за подигање на свеста за управување со пожари на ниво на предел во земјите од Западен Балкан. Иницијативата, поддржана од Министерството за земјоделство, шумарство и водостопанство, има за цел да го поттикне интегрираното и одржливо управување со екосистемите, наместо традиционалниот пристап што се фокусира исклучиво на гаснење.
Пожарите оставија сериозни последици врз природата, економијата и животот на граѓаните, а над 90% од нив се предизвикани од човечка невнимателност — факт што укажува дека превенцијата е клучна.
Преку интерсекторска соработка, јакнење на локалните капацитети и активности на терен, иницијативата тежнее да создаде предели и заедници отпорни на пожари.
„Природата е наша заедничка одговорност. Со здружени напори можеме да постигнеме нула пожари предизвикани од човечки фактор,“ велат од Министерството.
Македонија
Гром го предизвикал пожарот во велешката фабрика, велат од „Мирана“

Удар од гром е причината за пожарот што синоќа избувна во дел од производствениот погон на „Биокосмос“ во Велес, информираат од компанијата „Мирана“ преку официјално соопштение.
Од ударот се оштетени дел од просториите на „Биокосмос“ и, како што посочуваат од таму, тие привремено ќе бидат надвор од употреба додека не се санира штетата.
Фабриката „Мирана“, која се наоѓа во истиот индустриски комплекс, не била зафатена од пожарот и производствениот процес таму продолжува непречено.
Во пожарот нема повредени лица.
Центарот за управување со кризи претходно денес информира дека пожарот бил целосно локализиран рано утрово, околу 4 часот. Според информациите на ЦУК, огнот зафатил магацински простор со фрижидери и канцеларии со документација, а на неколку места сè уште се забележува слабо чадење.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.