Македонија
Улици, плоштади и мостови во Скопје ќе добијат нови имиња, објавена листата со промените
Од Град Скопје информираат дека на претстојната седница на Советот ќе се расправа за имињата на 485 улици во градот.
„Повеќето од овие улици досега биле именувани со број или биле именувани како краци на други поголеми улици. По усвојувањето на оваа одлука од Советот, овие улици ќе добијат нови имиња“, се наведува во соопштението.
Градските власти посочуваат дека со одлуката ќе бидат вратени и некои од старите имиња на улиците што беа променети во текот на 2012 година.
„Тоа беше спротивно од волјата на граѓаните што живеат на тие улици, па затоа ќе се вратат имињата на улиците Ленинова, Железничка, Мексичка, Каирска, Стив Наумов, Салвадор Алјенде, 4 Јули, 29 Ноември, Бихаќска, Владимир Комаров, Руди Чајавец, Жарко Зрењанин, Драчевска, Ратко Митровиќ и други“, се наведува во соопштението.
Новите имиња на улици, плоштади, мостови и на други инфраструктурни објекти на подрачјето на град Скопје, во согласност со Законот за определување на имињата на улици, плоштади, мостови и други инфраструктурни објекти, предвидено е да се црпат од Регистарот на имиња, кој неодамна беше дополнет од Советот на Град Скопје со листа од нови 570 имиња, по претходно добиената согласност од Владата.
„Мостот ‘Тодор Александров’ (популарно наречен ‘Близнак’) ќе биде преименуван во мост ‘Накие Бајрам’ и ‘Роса Плавева’, мостот ‘Слобода’ (кај ‘Холидеј ин’) ќе се вика мост ‘Вера Ацева’, а новиот мост на булеварот АСНОМ, ќе се вика ‘Генерал Михајло Апостолски’.
Улицата пред Градскиот стадион ќе се вика ‘Столтенбергова’ според угледниот норвешки дипломат и висок функционер на Обединетите нации, Торвалд Столтенберг, кој даде голем придонес во обновата на градот по катастрофалниот земјотрес во 1963 година.
Булеварот ВМРО ќе добие ново име и ќе се вика ‘Блаже Конески’, улицата Стив Наумов (поранешна ‘Ленинградска’) ќе се вика ‘Славко Јаневски’, улицата ‘Адолф Циборовски’ ќе се вика ‘Горан Стефановски’, а улицата 1523 во Кисела Вода ќе се вика ‘Благоја Георгиевски – Буштур’. Пешачкиот мост кај зградата на Владата ќе го добие името по неодамна починатиот заменик-градоначалник на Скопје, Енвер Малиќи“, се наведува во соопштението на Град Скопје, во кое се додава дека при изборот на нови имиња, кои ќе бидат содржани во предлогот на градоначалникот Шилегов до Советот, земени се предвид етничките, културните и социјалните специфики на локалното население што живее на тие улици.
„Во согласност со ваквите заложби, новиот булевар, кој е предвидено да биде изграден од скопската обиколница до булеварот Словенија, а поминува низ Визбегово, ќе се вика ‘Хасан Приштина’. Во таа насока во редот на новите имиња на улици ќе се најдат и ‘Беким Фехмиу’, ‘Ибрахим Ругова’, ‘Адем Демачи’ и ‘Мајка Тереза’“, стои во соопштението во кое е наведена и целосната листа за промена на улиците во Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре променливо облачно време со температура до 7 степени
Времето утре ќе биде променливо облачно со сончеви периоди. Во западните делови ќе дува умерен западен ветер, информира УХМР.
Минималната температура ќе биде во интервал од -12 до -3, а максималната ќе достигне од 0 до 7 степени.
Во Скопје, променливо облачно и студено со сончеви периоди. Ќе дува слаб ветер од променлив правец.
Минималната температура ќе се спушти до -9, а максималната ќе достигне до 3 степени.
До крајот на седмицата ќе се задржи стабилно и суво време. Од среда по котлините ќе има услови за појава на магла, а температурата ќе биде во благ пораст.
Македонија
Средба Хоџа-Ќехаја: Екологија и регионален развој во фокус
Министерот за животна средина и просторно планирање, Муамет Хоџа, денеска оствари работна средба со амбасадорот на Република Косово во Република Северна Македонија, Флоријан Ќехаја, на која се разговараше за актуелната состојба и перспективите на билатералната соработка во областа на животната средина и просторното планирање.
За време на средбата, министерот Хоџа и амбасадорот Ќехаја ги оценија пријателските односи и одличната соработка меѓу двете земји, истакнувајќи ја важноста на постојните документи и заеднички иницијативи, вклучувајќи го Меморандумот за разбирање од 2012 година за соработка во областа на животната средина, Договорот за економска соработка, како и регионалната иницијатива „Заедничка визија за Шар Планина“, која има за цел заштита и одржлив развој на прекуграничните заштитени подрачја.
Соговорниците ја истакнаа важноста на соработката во рамки на ИПА Програмата за прекугранична соработка, како и на значајните инфраструктурни и економски проекти кои придонесуваат за зајакнување на врските меѓу двете земји.
На средбата, се изрази заеднички интерес за интензивирање на соработката во наредниот период, вклучувајќи и ревидирање на постојниот Меморандум, меѓу двете држави.
Хоџа и Ќехаја ја реафирмираа посветеноста за зајакнување на билатералната и регионалната соработка во областа на заштитата на животната средина и зачувувањето на природното наследство.
Македонија
На 18-годишнината од хеликоптерската несреќа, положен венец на споменикот кај Катлановско Блаце
Денеска, 12 јануари (понеделник), министерот за одбрана Владо Мисајловски и началникот на Генералштабот на Армијата, генерал-мајор Сашко Лафчиски на обележјето кај Катлановско Блаце положија венец со свежо цвеќе во спомен на единаесетмината припадници на воздухопловниот ВИНГ кои пред 18 години ги загубија своите животи, враќајќи се од мисијата АЛТЕА во Босна и Херцеговина.
Министерот Мисајловски по овој повод порача дека нивната мисија била благородна и дека никогаш нема да бидат заборавени бидејќи со своите дела покажале како се сака државата и како се сака татковината.
На спомен-обележјето кај Катлановско Блаце почит на загинатите припадници оддадоа членовите на семејствата, како и делегации од Командата за операции, Првата пешадиска бригада, воздухопловниот ВИНГ и од општината Петровец.
Со едноминутно молчење и положување венци со свежо цвеќе од страна на припадниците на воздухопловниот ВИНГ беше оддадена почит за единаесетмината загинати припадници и пред спомен-обележјето пред командата на ВИНГ-от во касарната „НХ Страшо Пинџур“ во Петровец, како и во меморијалниот парк во кампот Бутмир во Сараево, Босна и Херцеговина, каде нашите припадници беа дел од мисијата АЛТЕА.
Во хеликоптерската несреќа, на денешен ден пред осумнаесет години, враќајќи се од мировната мисија АЛТЕА трагично загинаа потполковник Тони Спасовски, мајор Горан Ристовски, капетаните Бране Спасовски и Игор Ѓорески, наредниците Славчо Василев и Тони Давитковски, постарите водници Јанко Шириќ и Александар Тасковски, водниците Мики Ивановски и Александар Васиќ и десетарот Златко Вељаноски.

