„Договорите на дело за медицинските сестри, за кои подолго време во здравствените институциите беше ветувано дека ќе бидат трансформирани во редовен работен однос, не се случија“, велат од Здружението на медицинските сестри, техничарите, акушерките и стоматолошките сестри.

„Напротив, како и во многу наши претходни укажувања, во меѓувреме некои добија продолжување на недостоинствените договори, а на други во текот на вчерашниот ден им беше соопштено повеќе да не доаѓаат на работа бидејќи не им се продолжени.

По ова известување, медицинските сестри биле повикани повторно да се вратат во институциите поради неможноста за организирање на работата, со ветување дека недостоинствените договорите ќе им бидат продолжени.

Во ваков статус на договор на дело сестрите се ангажирани на три начини: преку агенции, преку проекти и преку интерни правилници на здравствените институции. По сите овие начини, нам сè уште не ни е познато по кои критериуми тие не добиваат ист финаниски надоместок“, велат од ЗМСТАС.

„До нашата Унија пристигнаа поразителни информации дека конкретно во Кичево пет медицински сестри,веќе три месеци работат без продолжен договор и без финансиски надоместок.

Особено сакаме да нагласиме дека и покрај ваквиот хаос во здравствениот систем, имаме институции кои отворено продолжуваат да бараат сестри за недостоинствениот договор на дело, меѓутоа повеќе нема заинтересираност.

Оваа ситуација во која ја измешавме политиката со здравјето на пациентите, Унијата е загрижена за професионалноста што се испорачува во институциите.

Поради ваквите настани, голем дел од образованите сестри со вештини заминаа и заминуваат од нашата земја. Останавме во здравствените институции сестринството да го браниме со срамна политичка реторика и национално пребројување.

Овој викенд се вративме од третата меѓународната конференција – Балканската асоцијација на медицинските сестри, каде што токму оваа тема беше ставена на дневен ред како голем проблем во нашата земја.

Апелираме инвестицијата во сестринството да нема транзициски периоди и политики за доброто на пациентите како стратегија за здрава нација.

Мора да се пристапи кон решавање на статусот на сестрите во редовен работен однос и повеќе да не постои никакво отстапување бидејќи сето ова е за доброто на сите нас.

Унијата во секое време може да понудии соодветни решенија за надминувања на проблемите“, изјави сестра Гордана Бешлиовска, претседател на Унијата на ЗМСТАС предводена од ЗМСТАС – „За нас“.