На македонскиот јазик му се заканува бришење од Извештајот на Европскиот парламент. Доколку тоа се случи ќе има само еден виновник – Христијан Мицкоски. Никој друг, изјави Богданка Кузеска, портпаролка на СДСМ.

Според неа, Мицкоски свесно ја отворил веќе затворената дебата за македонскиот јазик во ЕУ, со што, како што рече, директно го загрозил она што еднаш било постигнато – признавањето на македонскиот јазик како единствен и автентичен јазик на македонскиот народ во Европската унија.

„Ова не е грешка. Ова е намерен, политички пресметан чекор со кој Мицкоски, воден од теснопартиски интереси и слугување на туѓи држави, повторно ја доведе државата и македонскиот народ во понижувачка ситуација. Мицкоски не може да впери прст кон никого за поразот што Македонија повторно го доживува во Брисел. Токму тој и неговиот пријател Андреј Ковачев, со кого заеднички работат на блокирање на европската перспектива на македонските граѓани, се виновни за ова. Неговата координирана акција со Андреј Ковачев и европратениците од ЕПП резултираше со тоа што денес повторно ни се оспоруваат јазикот и идентитетот. Повторно нè вратија таму каде што веќе бевме поминале – во борба за основни национални права“, рече Кузеска.

Таа додаде дека СДСМ, преку договорот за ФРОНТЕКС и Преговарачката рамка, ја извојувал најчистата победа за македонскиот јазик.

„Договорот Фронтекст е документ потпишан на чист македонски јазик, без фусноти, без придавки, без ѕвездички. Во преговарачката рамка стои јасно македонски јазик. Ова е победа која никој не можеше да ја оспори. Но наместо да ја поддржи, Мицкоски не работи за Македонија“, рече таа.

Кузеска побара од Мицкоски веднаш да се извини пред македонскиот народ и да сноси политичка одговорност за тоа што, како што рече Кузеска, го избришал македонскиот јазик од извештајот на Европскиот парламент.

Скандал од невидени размери е повлекувањето на кумановското Јавно обвинителство од постапката против градоначалникот Максим Димитриевски само неколку дена пред да се донесе пресудата, изјави Атина Мургашанска, советничка во Советот на општина Куманово.

Според неа, ова конечно потврдува и зошто Максим Димитриевски влезе во коалиција со Мицковски и која беше неговата цел.

„Оваа одлука јасно ја открива вистинската причина зошто Максим Димитриевски влезе во коалиција со Христијан Мицкоски, само за да ја избегне личната одговорност пред правосудните органи. Тројанскиот коњ во опозицијата – сега веќе е комплетно разобличен. Цената за расколот во опозицијата беше токму спасот на Димитриевски од кривичен прогон. Тој одигра улога на саботажа и денес му слугува на Мицкоски како измеќар. За возврат доби политичка заштита од правен прогон. Сега е јасно зошто молчи за криминалите на ВМРО-ДПМНЕ и ВЛЕН. Максо станал вечен должник на Мицкоски“, рече Мургашанска.

Според неа, ова не е само правен скандал, туке е тежок политички договор кој ја компромитира независноста на обвинителството и го поткопува целиот правосуден систем.

СДСМ бара истрагата од самото обвинителство и итна одговорност.

На улицата „Волковска“ во Општина Ѓорче Петров ќе се вршат градежни активности за вградување на завршен асфалтен слој.

Работите ќе започнат на 5 јули (сабота) од 01:00 часот по полноќ, и ќе траат најдоцна до 6 јули (недела) до 09:00 часот. Во наведениот период, улицата ќе биде целосно затворена за сообраќај.

Како резултат на затворањето, автобуската линија бр. 22 ќе сообраќа до „Блага Вода“ согласно возниот ред на ЈСП, а од „Блага Вода“ до последната станица на 22-ката, во двата правци, превозот ќе биде организиран со комбиња.

„Ги замолуваме граѓаните за трпение и разбирање и ги повикуваме да ја почитуваат поставената сообраќајна сигнализација, како и насоките од надлежните служби за време на изведбата на градежните работи“, велат од Општината.