Македонија
Утре почнува лекувањето со „трикафта“ за осуммина пациенти, има пари да се обезбеди лекот за уште четворица

Клиниката за детски болести утре ќе почне да им го дава лекот „трикафта“ на пациентите со цистична фиброза за кои е утврдено дека се во најкритична состојба. Директорката на Клиниката за детски болести, Стојка Нацева-Фуштиќ, вели дека лекот утрово стигнал кај нив.
„Од утрово веќе ги примаме пациентите што треба да почнат со терапија. На Клиниката примаме околу шестмина пациенти, а двајца ќе се водат на Клиниката за пулмологија. Очекуваме да почнеме со терапија овие денови, кај некои од утре. Очекуваме позитивен ефект од терапијата во однос на подобрување на белодробната функција, квалитетот на исхрана, на квалитетот на живот, на нутритивниот статус, намалена зачестеност на хоспитализаци и поактивен живот на пациентите. Двајца од пациентите се во навистина критична состојба, тие ќе се лекуваат на Клиниката за пулмологија. Ефектот од терапијата е неизвесен, но ќе се обидеме да им ја подобриме состојбата со белодробната болест“, рече директорката Нацева-Фуштиќ.
Од осумтемина пациенти за кои терапијата веќе е пристигната, седуммина се возрасни, над 18 години, и едно е дете. Директорката најави дека ќе направат напор многу бргу да се обезбеди терапија за уште четворица пациенти оти со пониската цена им останале пари од сегашната набавка.
„Добивме пониска цена од предвидената. Дадовме барање до Фондот за здравство дополнително да бидат вклучени уште четворица пациенти“, рече директорката Нацева-Фуштиќ.
За сите пациенти е обезбедена терапија за цела година. Пациентите ќе добиваат таблети еднаш месечно и нема да се обврзани да останат во болница. Терапијата вклучува земање две таблети наутро и една навечер.
Министерот за здравство, Фатмир Меџити, денес рече дека заедно со премиерот работат на изнаоѓање решенија за лекување и на другите со дијагноза цистична фиброза.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по влажни коловози. Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Сиљановска Давкова: Не сум се фотографирала со восочни фигури на Доналд и Меланија Трамп

Фотографијата објавена на моите официјални профили на социјалните мрежи, на којашто сум заедно со претседателот на САД, Доналд Трамп, е автентична и направена во Њујорк за време на свечениот традиционален прием организиран од претседателот Трамп и неговата сопруга, Меланија Трамп, реагираше претседателката на државата Гордана Сиљановска – Давкова.
– Написите на одредени медиуми дека станува збор за фотографија со восочна фигура се целосно неточни, злонамерни и со јасна тенденција за дискредитација, вели таа.
Сиљановска – Давкова упати апел до медиумите за професионално, одговорно и чесно информирање на јавноста, со почитување на вистината како највисок демократски принцип.
Македонија
Денес дожд и температура од 13 до 21 степен

Времето во текот на денот се очекува да биде претежно облачно со повремени врнежи од дожд, наместа пообилни, проследени со ретки грмежи.
Според синоптичарите, ќе дува слаб со умерен ветер од југоисточен правец. Минималната температура ќе биде во интервал од 8 до 15, а максималната ќе достигне од 13 до 21 степен Целзиусов.
Во Скопје, се очекува претежно облачно со повремени врнежи од дожд. Според најавите, ќе дува слаб до умерен јужен ветер. Минималната температура ќе се спушти до 14, а максималната ќе достигне до 19 степени Целзиусови.
Локални врнежи од дожд се најавени и за утре, а потоа во следните два дена да биде претежно стабилно.
Од четврток се очекува нов влажен и постуден бран со пообилни врнежи од дожд и со значително опаѓање на температурата.