Во централното подрачје на општина Кисела Вода, во непосредна близина на Домот на култура „Билјана Беличанец“, се гради нова фонтана во паркчето „Срце“.

Оваа фонтана претставува естетско збогатување на просторот, кој е едно од најфреквентните места во општината, и ќе придонесе за поубав и попријатен амбиент за сите граѓани.

-Со изградбата на фонтаната во паркчето „Срце“ уште еднаш покажуваме дека вложуваме во подигнување на квалитетот на живот во секој дел од нашата општина. Создаваме убави, функционални и атрактивни јавни простори кои ќе бидат места на собирање, дружење и уживање за сите генерации. Овој проект е дел од нашите напори за модернизација и разубавување на општината, а во периодот што следува, продолжуваме со поставување на нова урбана опрема, која ќе ја направи Кисела Вода поубаво место за живеење- истакна градоначалникот Орце Ѓорѓиевски.

Првиот вицепремиер и министер за животна средина и просторно планирање, Изет Меџити, придружуван од заменик министерката Ане Лашкоска беше во работна посета на општина Свети Николе, каде заедно со градоначалникот Дејан Владев направија обиколка на локацијата на која се гради фекална канализација во с. Мустафино, во должина од 8 километри.

Проектот за изградба на фекалната канализација во с. Мустафино е повеќегодишен и е финансиран од Министерството за животна средина и просторно планирање, кое има склучено Договор во вредност од 32.5 милиони денари за изведба и Договор во вредност од 165 илјади денари за вршење на стручен технички надзор.

„Она што сакам да го истакнам е дека проектот се реализира и побрзо од предвидената динамика. Степенот на реализација на градежните работи изнесува 82 проценти од целокупниот проект“ изјави министерот Меџити и информираше дека во оваа општина и преку Европската инвестициска банка ќе се инвестираат средства во водоводната инфраструктура. Инвестициите се во висина од над 738 илјади евра за проектите: изградба на фекална канализација с. Кадрифаково, фекална канализација с. Сопот, водоводна мрежа во место викано “Мало Стопанство” и реконструкција на водоводна мрежа на дел од улиците Кумановска и Ќиќевачка.

Градоначалникот Дејан Владев се заблагодари на огромната помош добиена како од министерството така и од Владата, а информира дека општина Свети Николе на новиот повик од Владата ќе аплицира со проект за водоводна мрежа во м.в. Кнежевски пат, со што ова општина трајно ќе го реши проблемот со водоснабдувањето и ќе обезбеди современи услови за живот на населението.

Тој најваи дека изведбените работи за фекалната канализација во с. Мустафино се очекува да завршат до мај/јуни годинава.

Ќе се пристапи кон забрана на „Тик-ток“ ако некоја појава од инцидент прерасне во пракса. Ова го изјави министерот за дигитална трансформација Стефан Андоновски, прашан дали се разгледува забрана на платформата, на која најнов опасен предизвик за децата е оној со „парацетамол“.

„Ние имаме малку поразличен пристап, како што видовте со онлајн игрите на среќа. Кога е забележано дека тоа претставува проблем за поширок круг на граѓани, ние пристапуваме кон законски измени и кон забрана на пристапот на онлајн игрите на среќа коишто се нелегални. Истиот пристап ќе го имаме и кон овие апликации. Доколку забележиме дека тоа од инцидент станува редовна практика, како што стануваат нелегалните онлајн коцкарници, тогаш ќе пристапиме кон забрана. Но, не сакам да излегувам со различна изјава секоја недела и да го менувам ставот во зависност од тоа каков предизвик се појавил и на која социјална мрежа. Кога ќе видиме дека тоа прераснува во пракса, стои на располагање алатката за забрана“, рече Андоновски.

Тој беше дел од обележувањето на Денот на побезбеден интернет, што кај нас се одбележа првпат денеска во ОУ „Димитар Македонски“ во Лисиче. Министерот очекува учениците и нивните родители да го користат упатството што е доставено пред две недели во училиштата, кое треба да ги заштити најмладите од предизвиците на интернетот. Во таа насока рече дека упатството било споделено со сите училиштата и доставено до МОН и Педагошката служба. Тоа има два дела, од кој вториот е наменет за родителите, и е достапно за секој што е заинтересиран на веб-страницата и фејсбук-профилите на министерството.