Македонија
Фабриката „Благој Ѓорев“ од Велес казнета со 50 илјади евра поради загадување

Владата информира дека комбинираните тимови од инспектори и припадници на МВР изрекоа повеќе мерки и глоби при спроведување на засилените контроли за спречување на аерозагадувањето.
„Изречени се повеќе глоби и забрани за утврдени инциденти и активности кои значително влијаеле на загадувањето на воздухот и животната средина во повеќе општини минатата недела во рамките на активното спроведување на мерките за намалување на аерозагадувањето предвидени во програмата и планот за чист воздух донесени од Владата, спроведени од комбинираните тимови составени од седум владини советници, кои во координација со сите инспекторати во државата, вклучувајќи го и Министерството за внатрешни работи, преземаат активности за спречување на загадувањето на воздухот.
Инспекторатот на Град Скопје по реакција на граѓани, излегува на терен заедно со акредитирана лабораторија, спроведува вонреден инспекциски надзор и мерење на граничните вредности од стационарниот емитер“, се вели во соопштението.
Биле извршени вонредни инспекциски надзори во правни субјекти, обиколки на површини и диви депонии, како и контрола на начинот на кој се загреваат субјектите во повеќе општини во земјата (меѓу кои Босилово, Виница, Тетово, Гостивар, Илинден, одделни општини во Скопје, Карпош, Центар, Гази Баба, Шуто Оризари, Сарај, Конче, Куманово, Велес, Гевгелија…)
Во општина Велес при надзор на инсталациите и објектите што подлежат на Б-дозволи и eлаборати беа изречени неколку мерки, меѓу кои спогодување за плаќање глоба во износ од 50.000 евра на прехранбената индустрија „Благој Ѓорев“ АД Велес, која треба да се плати на сметка на буџетот во рок од 15 дена за пожарот во Б-инсталацијата, со кој се предизвика значително негативно влијание врз животната средина и амбиенталниот воздух, изречена е забрана за употреба на опрема за дробење во еден правен субјект – Б-инсталација за сепарирање песок, решение за отстранување недостатоци кај автомеханичарска работилница, решение за постапување со отпад од вршење дејност во работилница, како и одземање железнички прагови и нивни делови пронајдени кај физичко лице, кои биле користени за греење.
„Во дел од општините беа издадени известувања до правните субјекти да се придржуваат до наведените мерки од нивните елаборати за заштита на животната средина иако не беа констатирани видливи траги на загадување на воздухот. Компаниите што немаат извршено мерења на емисии во воздухот со решение беа задолжени да ги извршат според дозволата што ја поседуваат, беа изречени усни опомени за несоодветно распоредување отпад, како и опомени за отстранување хаварисани, нерегистрирани возила.
Секојдневни интензивни контроли од тимовите составени од инспектор за животна средина и комунален инспектор и редар се вршат во речиси сите општини во државата и за тоа се испраќаат извештаи до канцеларијата на претседателот на Владата на РСМ.
Контролирани беа сите места во градот кои се потенцијални извори на загадување, како земјоделски земјишта, каде што се палат стрништа, угостителски објекти, каде што се појавил чад, како и обиколка и контрола на фабрики по поднесена пријава дека е забележан чад или непознат мирис.
Во дел од општините, како во општина Конче, на огласните табли беа поставени соопштенија за забрането палење стрништа, депонии и друг вид отпад. За да ја олесни комуникацијата и да ги охрабри сите засегнати граѓаните, со цел континуирано да се спроведуваат активностите за борба против аерозагадувањето, Инспекторатот на Град Скопје на социјалната мрежа „Фејсбук“ објави упатство во кое се даваат насоки како граѓаните побргу и поефикасно да пријавуваат секаков вид загадување на амбиенталниот воздух“, се додава во соопштението.
Во објавата до граѓаните се објаснува како на едноставен начин секој може да се вклучи во пријавувањето на загадувачите, со испраќање фотографија и податоци за локацијата на загадувачите, со што ќе се овозможи побрза реакција на инспекторите и откривање на загадувачите. Во наредниот период надлежните ќе продолжат со вршење вонредни инспекциски надзори во правни субјекти кои поседуваат елаборат за заштита на животната средина секаде каде што има појава на емисии во амбиенталниот воздух, ќе контролираат површини каде што постојат депонии и стрништа и редовно ќе известуваат за преземените интервентни акции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Директорот на БЈБ на планинарски марш од пет километри во тетовско: Службата не е само униформа – таа е братство

Директорот на Бирото за јавна безбедност во Министесрвтвото за внатрешни работи (МВР), Александар Јанев, денеска учествуваше на планинарски марш со полициски службеници од СВР Тетово, извести МВР. Досега вакви маршови се пдржаа во Велес, Струмица и Битола.
„Во духот на соработката, заедништвото и искрената комуникација, заедно го градиме оној полициски идентитет кој значи блискост со граѓаните, одговорност кон задачата и сила која извира од заедничките вредности. Надвор од канцелариите и рутините, утрово низ заедничка активност со пешачење од околу 5 км низ тетовскиот регион имавме можност да го јакнеме тимскиот дух, но и – што е најважно – подлабоко да се дозапознаеме, да зборуваме отворено за предизвиците на теренот, за реалните проблеми со кои се соочуваме, и за начинот како уште повеќе да се доближиме до граѓаните од Тетовскиот регион. Полицијата не се мери само со акции и бројки. Таа се мери со довербата што ја има кај народот. А таа доверба се гради со постојано присуство, искрен дијалог и подготвеност да се биде со граѓаните – и кога е тешко, и кога е мирно.“, кажа на маршот директорот Јанев.
Директорот Јанев потенцираше дека градиме полиција која не се плаши да ги погледне проблемите во очи и што чекори напред со дигната глава – за стабилноста на државата, за безбедноста на граѓаните, и за достоинството на полициската професија.
„Македонија има полиција што се движи напред – тим по тим, регион по регион – со срце за народот и со сила за предизвиците. Градиме тимови што се потпираат еден на друг – мотивирани, дисциплинирани и посветени на заштита на секој граѓанин. Затоа што секоја лична победа е колективна сила, а секој ден е нова можност да станеме подобри – за себе, за колегите, и за Македонија.“, истакна на крај Јанев.
Македонија
Средба Филипче-Клингбајл во Берлин: Македонија мора да продолжи по европскиот пат

Претседателот на Социјалдемократскиот сојуз на Македонија, Венко Филипче, денеска во Берлин, Сојузна Република Германија, во рамки на Конгресот на германската Социјалдемократска партија (СПД), се сретна со актуелниот вицеканцелар на Германија и сојузен министер за финансии, Ларс Клингбајл, кој воедно е и ко-претседател на СПД.
Од СДСМ известија дека на средбата, претседателот Филипче изразил благодарност до вицеканцеларот Клингбајл, за континуираната и силна поддршката на СПД за евроинтеграцискиот процес на Македонија, посочувајќи дека како сестрински партии, ја споделуваат истата визија за праведна, обединета и солидарна Европа.
„Филипче и Клингбајл разговараа за забрзувањето на евроинтеграцискиот процес на Македонија, како и на земјите од регионот и Западен Балкан, оценувајќи го како клучен процес за стабилизација, развој и напредок на државите-кандидатки за членство во Европската Унија. Беше посочено дека само со вистинска интеграција во ЕУ може да се обезбеди одржлив напредок – и економски и институционален, особено во однос на владеењето на правото и борбата против корупцијата.
Заеднички беше ставот дека Македонија мора да продолжи по европскиот пат, како единствена алтернатива за напредок и подобра иднина на државата“, извести СДСМ за средбата на лидерот во Берлин.
Филипче го потсетил Клингбајл дека во периодот на Владата предводена од СДСМ беа реализирани клучните стратешки цели – Македонија стана членка на НАТО и ги отпочна преговорите за членство во ЕУ.
Обајцата на средбата ја нагласиле потребата од натамошно унапредување на меѓупартиската соработка и размена на искуства меѓу СДСМ и СПД, како сестрински партии кои делат заеднички социјалдемократски вредности, базирани на солидарност, еднаквост, владеење на правото и социјална сигурност.
Македонија
Бледи се обидите на Филипче да се искупи за предавството, реагираат од ВМРО-ДПМНЕ

Добро е што Венко Филипче конечно ги согледа состојбите и дојде на позициите на ВМРО-ДПМНЕ, реагираат од партијата ВМРО-ДПМНЕ по денешните изјави на Филипче од Берлин.
„Добро е што Филипче и СДС признаваат дека проблемот со Бугарија не е само внесувањето на Бугари во Устав, дека проблемот е подлабок и дека ги опфаќа и идентитетските национални обележја.
Исто така, добро е што СДС и Филипче прифаќаат дека засегнат е и македонскиот јазик, за кој постојано ја убедуваа македонската јавност дека го заштитиле согласно нивните предавнички договори кои ги прифатија и потпишаа.
Но има работи кои македонската јавност нема ниту да му заборави, ниту да му ги прости.
Откако СДС, на чело со менторот на Филипче, Зоран Заев во чијашто влада беше и самиот Венко, распродаде се што е национално македонско и Македонија ја продаваа како невеста која богато ќе ја омажат, доцна им е за каење и за ископување на гревовите.
Задоцнети и бледи се ваквите обиди на СДС и Венко Филипче за нивните предавства, народот ќе ги памети како најголемите предавници во историјата на државата и истите ќе завршат во темните историски страници.
Сега Македонија има Влада која ги брани националните интереси и нема ни милиметар да се помести од позициите за одбрана на идентитетот, историјата, културата, јазикот.
На чело на државата сега е Влада која ги брани, зацврстува и ги провира националните идентитетски обележја.
Влада која работи во интерес на државата и граѓаните, која со напорен труд ја развива во сите пори на општественото живеење и која работи на нејзина евроинтеграција на достоинствен начин со заштитени национални обележја“, реагираат од ВМРО-ДПМНЕ, преку соопштение.