Повеќе од 30.000 оспорувани т.н. „фантомски гласачи“ кои беа избришани од Избирачкиот список за предвремените парламентарни избори кои се одржаа во декември минатата година, повторно се враќаат во Избирачкиот список и тие лица ќе имаат право да гласаат за локалните избори.

Вкупно 30.477 гласачи за кои Државната изборна комисија (ДИК) оцени дека се спорни и дека не треба да гласаат за парламентарните избори, како резултат на вкрстените и теренските проверки кои покажале нерегуларности во документацијата или дека тие лица воопшто не постојат бе аизбришани од Избирачкиот список.

Но, одредбите од Избирачкиот законик предвидуваат овие лица да бидат вратени на списокот гласачи и да имаат право на глас.

„Одредбите од Изборниот законик изгласани во 2016 година, важеа само за предвремените парламентарни избори одржани на 11 декември, а по конечните резултати, овие одредби се ништовни. Овие 30.000 гласачи повторно ќе ги има на списокот ако ги исполнуваат законските услови, а тоа е, пред сè, да бидат живи, да имаат лична карта и да имаат деловна способност“, вели Љупка Гугучевска, портпаролка на ДИК.

Локалните избори треба да се одржат во првата половина од мај, но се уште е неизвесно, затоа што не е формирана Влада. Претседателот на Собранието треба да ги распише локалните избори. За да се одржат на 14 мај тие треба да бидат распишани на 5 март, а за да се одржат на 7 мај, истите треба да бидат распишани за помалку од недела дена.

Но, доколку изборите не се одржат или се пролонгираат станува неизвесно функционирањето на локалните власти, со оглед на тоа дека законот не предвидува продолжување на мандатите на градоначалниците и советите./крај/со/бб