Македонија
Фетаи за „Монструм“: Овој чин не заслужува ништо помалку од доживотен затвор

Обвинителката Фатиме Фетаи, која го застапува случајот „Монструм“, преку анализа на доказите, односно вештачењата и сведочењата, му докажуваше на судот дека возилото „опел омега“ било употребено за транспорт при извршување на петкратното убиството на Смилковското Езеро. Таа посочи дека возилото не било на МВР, како што тврдеше еден од сведоците во постапката, додавајќи дека на него биле најдени билошки траги од обвинетиот Алил Демири на потпирачот на глава, но и земја од Смилковското Езеро.
„Неточна е тезата од правно фактички и правно логичен аспект“, рече Фетаи за тврдењето на сведокот дека МВР е сопственик на „опелот омега“ образложувајќи дека тој ја препознал само по бојата, но не дал никакви други детали за неа, ниту регистарски таблички.
Обвинителката докажуваше и дека телата на убиените не биле донесени на Смилковското Езеро, како што беше тврдено во текот на постапката и јавноста. Таа рече дека трагите, нивното земање, транспортот, вештачењето, го запечатуваат тврдењето дека петкраткото убиство е направено онаму каде што се пронајдени телата.
„Лишени се од живот пет лица со употреба на оружје. Настануваат траги од крв, како и патрони. Трагите од крв може да бидат локва, слевање, капка… Трагите од слевање настануваат со истекување крв од крвните садови. Сите видови траги се важни бидејќи укажуваат дали телото е поместувано или донесено. Во однос на трагите од оружје, ќе се задржиме на проектилите и патроните како траги. Може да се пронајдат цели или одредени нивни делови. За патроните важи податокот дека се утврдува од какво оружје е испукано. Вистинското место на настанот е она каде што се пронајдени телата. Фингирање проектил, природното истекување на почвата каде што се извршило убиството е невозможно. На иста линија се и на вештите лица дадени во постапката“, рече Фетаи објаснувајќи ги материјалните докази и осврнувајќи се на научниот аспект во однос на доказите.
Се лиферуваа информации дека младите момчиња биле во блиски контакти со ќерката на Трајко Вељаноски, па затоа се случил настанот, рече Фетаи, која образложи дека немало индиции, ниту се докажало дека убините се познавале со неа ниту дека имале контакти, а најмалку дека поради тоа се лишени од живот.
„Во однос на околноста дека обвинетите биле на местото на настанот претходните денови, единствен доказ е исказот од заштитениот сведок. За деновите пред убиството не постои доказ дека иделе таму за да евидентираат кои лица од која националност доаѓале“, рече Фетаи.
За тоа дека Алил Демири, Агим и Африм Исмаиловиќ ги извршиле убиствата, Фатиме Фетаи рече дека има докази и се потврдуваат со материјални докази и сведочења пред судот.
„Вишок е само тоа дека на свиреп и подмолен начин било извршено убиство. За да биде на свиреп начин, треба да има страдање на жртвата и извршителот свесно да знае дека жртвата страда… Убиството на подмолен начин е на потајно сторување, каде што сторителот ја искористува неговата доверба… Во случајот има докази за употреба на три вида оружје, приближно траење на настанот… Да се разбереме, овој чин не заслужува ништо помалку од доживотен затвор“, рече таа објаснувајќи дека делот за свиреп и подмолен начин е вишок поради недостиг на докази.
За Фетаи, неважно е кој со какво оружје пукал, со оглед на делото тероризам за кое се гонат. Таа посочи дека имало договор за лишување од живот на жртвите меѓу обвинетите образложувајќи дека контактирале, но и како се транспортирале до извршувањето на убиствата кај Смилковското Езеро.
„Исказот на Хаки Азири заслужува верба. Ги има сите елементи за исказот да биде веродостоен. Делот за исклучените телефони се потврдува со листинзите од телефонските оператори. Чекањето во Топанско Поле се поклопува со времето на извршувањето на чинот. Обвинетиот Хаки самиот го дообјаснува моментот кога застанува возилото ‘опел омега’ зад неговото за обвинетите да се префрлат во неговата кола. На иста линија е и исказот на Хаки, кој ги дава сите појаснувања за настанот и неговите дејства“, рече Фетаи, која објасни дека на подоцнежното тврдење на Хаки Азири дека бил присилен да ја даде изјавата пред судот поради деталите што ги кажал во врска со чинот, не може да му се верува.
Фетаи бара сите обвинети да бидат осудени.
„Не би сакала никигаш повеќе во вршење на функцијата јавен обвинител да бидам доведена да давам завршен збор за ваков настан. Лицата за кои се бара осуда се одговорни за делата што им се ставаат на товар“, рече Фетаи на почетокот од завршните зборови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.