Македонија
Филиповска-Грашкоска: Намален бројот на прекршувања на здравствените протоколи

Од стапувањето во сила на измените и дополнувањата на Законот за заштита на населението од заразни болести, со кои се зголемија надлежностите на инспекциските служби, од страна на инспекторите од Државниот пазарен инспекторат, Државниот инспекторат за труд, Државниот санитарен и здравствен инспекторат, Агенцијата за храна и ветеринарство, Државниот инспекторат за транспорт и Агенцијата за лекови и медицински средства, извршени се 10.274 контроли и 5.149 надзори.
Во споредба со претходниот месец се забележува намалување на прекршувањата на здравствените протоколи кои произлегуваат од Законот за заштита на населението од заразни болести. За споредба, во октомври, кога инспекторите немаа надлежности да забрануваат вршење дејност поради непочитување на здравствените протоколите, од вкупно извршени 6.963 надзори и 6.123 контроли беа изречени 37 кривични пријави против угостителски објекти, а во ноември, по донесувањето на измените на Законот за заштита од заразни болести, затворени се 5 угостителски објекти кај кои било констатирано дека не ги почитуваат здравствените протоколи.
Претседателката на Инспекцискиот совет, Магдалена Филиповска-Грашкоска, информира дека во согласност со Законот за заштита на населението од заразни болести во ноември инспекторите имаат изречено 8 прекршочни пријави, 2 кривични пријави, 16 платни налози, 30 решенија, од кои 5 се однесуваат за забрана за работа на 5 угостителски објекти, и донесени се 39.858 решенија за изолација.
„И покрај зголемениот број на контроли во ноември, сепак се детектирани помал број прекршувања на протоколите, со што се потврдува дека зголемените надлежности на инспекциските служби го даваат својот резултат при почитувањето на ковид-протоколите“, оцени Грашкоска.
Во посочениот период инспекторите од Државниот здравствен и санитарен инспекторат извршија 96 надзори, од кои 72 се по однос на здравствените протоколи. Во изминатите седум дена ДЗСИ издаде 14.664 решенија за изолација и домашно лекување на лица позитивни на Ковид-19 и лица што биле во контакт со заболени и 11 решенија за констатирани неправилности врз основа на спроведените надзори. Во периодот од 16 до 22 ноември Инспекторатот за транспорт изврши 57 надзори, при што изречени се 10 прекршочни пријави, 3 решенија и 4 платни налози за прекршувања на материјалните закони. Од извршените надзори, 16 се по основ на Законот за заштита на населението од заразни болести и притоа не се констатирани прекршувања на законот.
Во истиот период Државниот пазарен инспекторат изврши 3.463 контроли и 553 надзори поврзани со материјалните закони и здравствените протоколи за работа на угостителски објекти. Притоа поднесени се 27 прекршочни пријави, од кои 2 прекршочни пријави се поднесени против угостителски објекти, по еден во Тетово и Гостивар. Овие угостителски објекти не ги почитувале протоколите, односно тие работеле по 21 часот, поради што им е изречена и забрана за работа во рок од 30 дена и соодветна глоба. Дополнително, ДПИ издаде и 52 решенија и 25 платни налози.
Државниот инспекторат за труд во истиот период спроведе 519 надзори во правни субјекти на територијата на целата држава со фокус на почитување на протоколите во насока на заштита на здравјето на вработените. При овие надзори од страна на трудовите инспектори изречени се 27 решенија и еден платен налог, кои се однесуваат на утврдени неправилности од областа на работните односи.
Агенцијата за лекови и медицински помагала во изминатите седум дена изврши 26 надзори во аптеки по основ почитување на мерките на Владата и издавањето антибиотици, при што не се констатирани прекршувања на законските одредби и отстапувања од протоколите.
Агенцијата за храна и ветеринарство во периодот од 16 до 22 ноември спроведе 386 надзори. Притоа издадени се 7 решенија и извршени се 22 едукации поради констатирани неправилности, кои се однесуваат на неизвршени здравствени прегледи, неспроведување општи хигиенски мерки, неправилно складирање и чување производи и неправилно означување на производите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЛДП: Прифатена уште една наша предлог мерка – до 15 септември таблички во различна боја за државните службени возила

По намалувањето на банкарските трошоци, уште една мерка предложена од Либерално-демократската партија (ЛДП), се наоѓа пред сама реализација. Директорот на Службата за општи и заеднички работи најави дека до 15 септември сите државни институции и јавни правни лица мора да ги заменат табличките на службените возила со нови, посебни регистарски таблички, соопшти ЛДП.
„Сведоци сме на разни злоупотреби на службените возила од страна на избраните државни и јавни функционери за приватни потреби во минатото и затоа ја поздравуваме одлучноста на Владата за прифаќање на нашиот предлог. За ЛДП, овој чекор претставува позитивен пример за тоа како добрите предлози и идеи кои се во интерес на граѓаните и државата треба да бидат прифатени и имплементирани од сите релевантни чинители“, велат од партијата.
Од таму потсетуваат дека барањето на ЛДП минатото лето за бележење на сите службени возила во сопственост на државата дојде по излетот на претседателот на Собранието, Африм Гаши, кој тогаш со колона службени возила отиде на свадба во соседно Косово, без службен налог и задолжителна проверка на граница, по што од страна на Министерството за внатрешни работи беа покренати дисциплински постапки за 6 службеници.
Од ЛДП велат дека ова е нивен петти предлог кој Владата само во изминатата година го препозна и прифати. Претходно, државните претставници ги прифатија и почнуваат да ги имплементираат законската можност за граѓански референдум за отповикување на градоначалници; креативното толкување на заклучоците од ЕУ и одложеното дејство на уставните измени, намалувањето и укинување на банкарските провизии и предлогот за поголеми инвестиции во домашното одбранбено производство.
„Упатуваме апел до сите државни институции час поскоро да ја завршат постапката за воведување на нови регистарски таблички, која кога ќе се спроведе и реализира, веруваме дека ќе доведе до значително намалување на злоупотребата и поголема совесност на оние функционери кои имаат право на користење на возилата, но и на другите државни и јавни ресурси. Со воведувањето на ваквите мерки за зголемување на транспарентноста во работата на јавните и државни функционери спречуваме нивна злоупотреба на ресурсите за приватни цели на сметка на зголемената доверба на граѓаните и јавноста, преку видливост и отчетност на јавните ресурси, усогласеност на институциите во однос на транспарентноста и рационализацијата на трошоците на јавните средства“, велат од ЛДП.
Македонија
„Влен“ бара оставки од ДУИ за споменикот на Андон Ќосето

ВЛЕН бара одговорност на ДУИ за поставување на споменикот на Андон Ќосето во Автокоманда. Според нив, поставувањето на споменикот на Андон Ќосето не е случајна, ниту изолирана грешка туку е продолжение на политиките кои го разделуваат, навредуваат и понижуваат Скопје како мултиетнички и модерен град.
„Данела Арсовска не е сама. Таа не е изолиран феномен, туку производ и продолжение на стар систем, на еден режим кој сè уште дише преку своите сенки, преку своите директори, советници и сојузници. Функционерите на ДУИ се дел од тој систем. ДУИ е дел од градската власт на сите нивоа. ДУИ има одговорност зошто дозволила и по втор пат поставување на споменикот на Андон Ќосето. Поставувањето на споменикот на Андон Ќосето не е случајна, ниту изолирана грешка — тоа е продолжение на политиките кои го разделуваат, навредуваат и понижуваат Скопје како мултиетнички и модерен град“, изјави Мухамед Елмази – претснавник на ВЛЕН.
Тој потсети дека првото поставување на овој споменик било во време кога Никола Груевски беше премиер, а Блерим Беџети и Бујар Османи негови министри
„Вчера, Никола Груевски не издржа и јавно се пофали со споменикот и си ја честиташе сопствената политичка визија. Тоа не е случајно. Тоа е доказ дека денешната градска власт, предводена од Данела Арсовска, е продолжена рака на истата идеолошка линија, на истиот режим, во кој режим ДУИ секогаш е дел и секогаш молчи. Во град Скопје, Данела Арсовска не владее сама. Таа има кабинет, директори и функционери. Голем дел од тие функционери се кадри на ДУИ. Тие не се неми набљудувачи, туку активни чинители во системот кој дозволи повторно поставување на споменик кој го навредува духот на соживотот“, рече Елмази.
Тој бара ДУИ да ги повика нивните директори во град Скопје да поднесат морална оставка како знак на целосно неприфаќање на поставување на споменикот на Ќосето и да ја прекие поддршката кон Данела Арсовска која, како што вели, продолжува да прави обиди за меѓуетнички провокации и обиди за дестабилизација.
„Јавно ги повикуваме сите директори и функционери на ДУИ во Град Скопје да поднесат оставка. Тоа е единствениот морален потег што можат да го направат – во знак на солидарност со сите граѓани кои се чувствуваат повредени, меѓу кои Албанци, Турци, Бошњаци, па и Македонци кои веруваат во соживот, почит и заедничка иднина“, рече Елмази.
Македонија
(Видео) Петрушевски: Негласањето на СДС за интерпелација на Коцевски дава одговор на прашањето зошто никој од СДС не е во затвор

Од вчерашното гласање на СДС во Собранието, каде не ја поддржаа интерпелацијата за главниот обвинител Љупчо Коцевски, се е јасно. СДС го штити Коцевски, а Коцевски за возврат го штити СДС и нивните кадри потонати до гуша во криминал за да не одговараат, изјави Бране Петрушевски, пратеник на ВМРО-ДПМНЕ.
Според него, негласањето на СДС за интерпелација на главниот обвинител Љупчо Коцевски е одговор на прашањето, зошто никој од СДС не е во затвор, а има низа постапки.
„Сега е јасно и кој ја мати водата за Кочани. Истите тие кои претпладне правеа пресови за Кочани, сега сметаат дека Коцевски добро ја работел работата. Очигледно е кој свири, а кој игра во обвинителството. СДС силно удира на тапани, а Коцевски игра како ќе му кажат. Заради овој однос на СДС и начинот на кој ја киднапирале цела судска власт довербата во правосудството е помало од 2%. СДС гледа на нивниот обвинител Љупчо Коцевски како на последно упориште. Во тоа им се приклучува и ДУИ, кои заедно со Коцевски бараат спас за криминалот на Филипче, Заев и Али. Тоа е всушност и пораката од СДС до Коцевски, или е со штитот или на него, кој во периодот кој доаѓа ќе треба да извршува се повеќе насоки“, рече Петрушевски.
Тој го повика Коцевски да покаже, како што вели, грам доблест и да не чека ниту час, туку веднаш да ја прими пораката на Собранието, и волјата на народот преку гласањето во Собранието и да си поднесе оставка.
„Секое понатамошно седење на функцијата спонзорирано од СДС и ДУИ ќе му го руши и онака слабиот углед и целосно ќе го стави во функција на измеќар и метлар на мафијата“, рече Петрушевски.