Безбедносната состојба во државата е стабилна и нема индиции за загрозеност на интегритетот и суверенитетот на државата рече министерот за одбрана Владо Мисајловски, кој денеска (5 ноември) учествуваше на конференцијата насловена „НАТО – 75 години единство, соработка и колективна одбрана: Безбедносни предизвици за Европа“. Во своето обраќање министерот се осврна и на потребата од блиска соработка со сојузниците во справувањето со сите безбедносни предизвици, поддршката за Украина како и континуираното инвестирање во Армијата – во нејзината модернизација, но и во развојот на човечките капацитети.

„Колективната безбедност е поврзана, најважно во овој момент е да ги следиме сите безбедносни предизвици и да соработуваме колку што е можно поблиску со нашите партнери од НАТО и Европската Унија“, рече министерот. На одговор на прашање поврзано со внатрешните ризици за земјите членки на НАТО, министерот порача дека безбедносната ситуација во државата е на највисоко ниво, но и дека институциите мора да останат будни, да ги следат и превенираат сите безбедносни предизвици. „Една од заканите се дезинформациите и влијанието кое доаѓа директно од хибридните закани и мешањето во внатрешните работи“, рече министерот.

Мисајловски најави нов пакет на поддршка за Украина кој треба да биде дел од затворена седница на Владата денеска, и порача дека поддршката ќе продолжи и понатаму, во согласност со нашите можности и потребата од задржување на борбената готовност на Армијата во остварувањето на своите надлежности.

Во однос на модернизацијата, министерот порача дека во тек се повеќе договори, споменувајќи ја набавката на лесните оклопни возила JLTV и Stryker од САД, опрема за противвоздушна одбрана, набавката на хаубици. Развојот на Лесната пешадиска баталјонска група, рече, е наш приоритет кој е и обврска согласно квантитативните и квалитативните цели на способности дефинирани како дел од НАТО – Алијансата. Мисајловски истакна дека паралелно со процесот на модернизацијата, ќе се почитуваат и сите обврски од Колективниот договор на вработените во одбраната и Армијата затоа што тоа е начинот како можеме да имаме успешна Армија. „Сето ова е поврзано со буџетот и затоа драго ми е што и следната година буџетот [на одбраната] ќе биде над 2 проценти, за што изразувам благодарност до цела Влада“, додаде министерот.

Мисајловски спомена дека интеграцијата во Европската Унија е од исклучително значење за државата од многу аспекти поврзани со безбедноста и порача дека државата во делот на одбраната има одлична соработка со соседите. Пример за тоа, како што рече, е Договорот за мобилност на Коридорот 8, потпишан со Италија, Албанија и Бугарија во Вашингтон, кон кој на неодамнешниот министерски состанок во Седиштето на НАТО во Брисел се приклучи и Романија.

Конференцијата е во коорганизација на Министерството за надворешни работи и надворешна трговија, Фондацијата Конрад Аденауер и Влифрид Матин Центарот за Европски студии. Покрај останатите на конференцијата зборуваше и амбасадорката на Германија Петра Дрекслер.

Во седиштето на Демократската унија за интеграција во Тетово, претседателот на ДУИ, Али Ахмети, го прими турскиот амбасадор Фатих Улусој.

Ахмети и Улусој разговараа за многу прашања во земјата и регионот, како што се евроинтеграциите на земјата, билатералните односи меѓу двете земји, стратешкото партнерство со Република Турција, легитимитетот, ситуацијата во Северна Македонија итн.

Ахмети го информирал амбасадорот Улусој дека ДУИ воопшто не се колеба од заложбите за интегрирање на земјата во Европската унија и ќе продолжи да дејствува за реализација на оваа цел.

Исто така, истакнал дека како партија се посветени на градење на стратешко партнерство со Република Турција, која не поддржа без резерва за членство во НАТО и во Европската Унија.

Што се однесува до Владата без етнички легитимитет која ги исклучи етничките претставници, како што е наведено во соопштението, Ахмети нагласил дека веднаш мора да престане непочитувањето на Охридскиот договор и омаловажувањето на заедниците во земјава.

ДУИ оценува дека најдобро решение за состојбата со тензичните меѓуетнички и меѓусоседски односи, како и европската безперспективност, се заедничките парламентарни и локални избори во октомври 2025 година.

Затоа, го прифативме јавниот предизвик на Мицковски и ја поздравуваме подготвеноста на другите опозициски партии да се соочат со заеднички избори следната година.

Денеска министерот Панче Тошковски се обрати на „Конференција на високо ниво за соработка меѓу полицијата и царината за мало и лесно оружје и за криумчарење мигранти во Југоисточна Европа“ во организација на ОБСЕ.

Тошковски во своето обраќање нагласи дека организираниот криминал и нелегалната трговија со мало и лесно оружје и кориумчарењето мигранти се значителни безбедносни предизвици како во Југоисточна Европа така и во поширокиот регион.

„Овој настан во организација на ОБСЕ и ЕУ4ФАСТ кој иницира посилна институционална соработка на меѓународно и национално ниво ќе придонесе кон функционалноста на безбедносните системи кои се носечки столб на сигурноста на граѓаните и демократските вредности на државите. Борбата против организираниот и транснационален криминал бара од сите нас максимално вложување на напори и ресурси посебно во делот на прекуграничната полициско-царинска соработка, како клучен фактор во ефикасно справување со оваа закана“, потенцираше Тошковски.

Jа акцентираше и поддршката што ја добиваме во делот на борбата против криумчарење мигранти и трговија со луѓе и неодамнешното зачленувањето на МВР кон Европската мрежа за миграција на Европската Унија, со цел обезбедување на пристап до објективни, веродостојни и споредливи информации.

Тошковски нагласи дека ваквите настани ќе придонесуваат до поголема национална и регионална безбедност, која ќе биде остварлива доколку се зголеми нивото на размената на добри практики, искуства и максимално вложување на целокупниот капацитет и потенцијал кои што го поседуваме како агенции одговорни за спроведување на законот.

Амбасадорот на ОБСЕ, Килијан Вал истакна дека за жал Југоисточна Европа останува фокус точка за криумчарење мигранти и нелегална трговија со мало и лесно оружје.

„Нелегалното оружје од регионот се криумчари низ Европа засилувајќи го организираниот криминал па дури и тероризмот. За да одговориме на ваквите предизвици, започнавме соработка, меѓурегионална иницијатива на ОБСЕ која ги обединува полициските директори, царинските директори, службениците за спроведување на законот и експертите за теми од цела Југоисточна Европа“, нагласи Вал.

Амбасадорот Вал додаде дека нашата земја успешно ги препознава проблемите и работи активно на нивното решавање а Мисија на ОБСЕ во Скопје со задоволство ќе ја продолжи својата поддршка во адресирање на сите овие закани.

Министерот Тошковски и амбасадорот Вал во рамките на конференцијата остварија и посебна средба на која во фокус беа сите тековни проекти со кои ОБСЕ соработува со министерството за внатрешни работи.