Министерката за енергетика, Сања Божиновска, оствари средба со Управниот одбор на ЗЕЛС, каде што главна тема беа високите трошоци за електрична енергија со кои се соочуваат јавните претпријатија, училиштата, општините и уличното осветлување.

Се разгледуваа неколку можни решенија и мерки што ќе придонесат за намалување на трошоците за електрична енергија на јавните институции.

Од Министерството велат дека преземаат конкретни чекори и струјата не смее да биде луксуз, а jавните институции нема да останат сами во борбата со високите сметки.

По40 години, извршена е темелна реконструкција на главната кујна на детската градинка „Срничка“ што се наоѓа во објектот „Чекорче“ во Општина Аеродром.

В.д. градоначалникот на Општина Аеродром, Дејан Митески и заменик-министерот за социјална политика, демографија и млади, Ѓоко Велковски, денеска беа во посета на градинката и извршија увид во обновениот простор.

„Станува збор за многу значаен проект, затоа што во кујната секојдневно се подготвува храна за сите шест клонови што припаѓаат на градинката „Срничка“ во која се згрижени речиси половина од дечињата во Аеродром“, велат од општината.

Реконструкцијата, опфати промена на плочките, рушење на одредени ѕидови, промена на водоводната мрежа и целосна замена на електричната инсталација, како и други градежни активности финансирани од Општина Аеродром, а со средства од Светската банка, кујната е опремена со целосно нова и современа апаратура, како и друга потребна опрема. Вкупната сума за обновувањето на кујната е во висина од 6,5 милиони денари.

Современите апарати и другата софистицирана опрема, во голема мера ќе им ја олеснат и работата на вработените во кујната, кои неуморно и со голема љубов подготвуваат топли оброци за дечињата кои се згрижени во „Срничка“.

Под покровителство на УНЕСКО, денеска се одбележува Светскиот ден на радиото, кое оваа година се одржува со мотото „Радиото и климатските промени“.

Целта на одбележувањето на овој ден е да се зголеми свеста на јавноста и медиумите за значењето на радиото, да се поттикнат носителите на одлуки да воспостават и да обезбедат пристап до информации преку радиото, како и да се зајакне вмрежувањето и меѓународната соработка меѓу радиодифузерите.

Во таа насока, Агенцијата за аудио и аудиовизуелните медиумски услуги ги извести сите радија во земјата дека УНЕСКО нуди можност за размена на искуства, материјали и идеи со радиостаници од други земји, како и бесплатни корисни ресурси, меѓу кои аудио и визуелни спотови на темата „Радиото и климатските промени“, материјали поврзани со развојот на медиумите, медиумската и информациската писменост и безбедноста на новинарите; водич за информирање за климатските промени и создавање приход и др.

Агенцијата за аудио и аудиовизуелните медиумски услуги на сите радиостаници во земјата им го честита Светскиот ден на радиото и ги повикува да дадат сопствен придонес во неговото одбележување.