Македонија
Филипче: Набавен е нов дигитален рендген-апарат за Поликлиниката Ѓорче Петров

Во Поликлиниката Ѓорче Петров комплетно е реновиран вакциналниот пункт и се набави нов дигитален рендген-апарат. При посетата министерот за здравство, Венко Филипче, истакна дека се следат стандардите и упатствата на Светската здравствена организација (СЗО) и започнато е со комплетно реновирање на вакциналните пунктови во поликлиниките во градот Скопје.
„Сега, во овие реновирани пунктови, условите за дечињата се многу попријатни. На територија на градот Скопје висок е опфатот со вакцинација со задолжителното вакцинирање, над 99% во Скопје, а над 95% ширум државата. За неколку денови ќе биде пуштен во употреба и новиот рендген-дигитален апарат, што на жителите на овој регион значајно ќе им олесни пристап до оваа рендген-услуга. Пациентите нема да мора да одат до болниците ‘8 Септември’, старата градска болница и Клиничкиот центар и преку системот Мој термин ќе се скрати времето за чекање“, изјави министерот Филипче.
Минатата година се воведоа две нови вакцини за заштита од пневмокок и рота вирус, кои ги штитат најмладите пациенти од инфекции, кои се чести во детската возраст, особено кај деца кои посетуваат градинки. Имунизацијата е единствената мерка која нè заштитува од заразни заболувања. Исполнета е препораката на СЗО со опфат на вакцинација над 95 отсто со МРП-вакцина.
„Како општина заедно со комуналните служби редовно се одржува Поликлиниката во Ѓорче Петров. Дониравме мебел за опремување на детското катче, на вакциналните соби, ги сменивме дотраените клупи. Во наредниот период се надевам дека во зависност од времето ќе гледаме да ги смениме и павер-елементите коишто се дотраени и се од самата изградба на поклиниката. И понатаму во соработка со Министерството за здравство стоиме на располагање првенствено нашите деца да имаат добра примарна заштита и нормално, и повозрасните се чувствуваат пријатно во Поликлиниката Ѓорче Петров“, изјави градоначалникот на општина Ѓорче Петров, Александар Наумоски.
Поликлиниката Ѓорче Петров дава здравствена заштита на населението од три големи општини Ѓорче Петров, Карпош и Сарај со вкупна бројка од 140.000 жители.
„Успешно продолжува приказната за реновирање на вакциналните пунктови. Управата на Здравствениот дом веќе започна пред два месеца и таа приказна успешно заврши во Поликлиниката Чаир, сега и во Поликлиниката Ѓорче Петров. Од понеделник започнуваме со реновирање на вакциналниот пункт во Поликлиниката Јане Сандански, и таму ќе се инсталира нов рендген-дигитален апарат“, рече директорот на Здравствен дом Скопје, Виктор Исјановски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.