Бујар Османи призна дека имал средби со Никола Груевски во Будимпешта, велат од ВЛЕН.

„Деновиве сведоци сме на едно скандалозно признание од страна на Бујар Османи, човек кој повеќе од две децении ја злоупотребува довербата на Албанците. Тој јавно одби да негира, односно потврди дека се среќавал со Никола Груевски, бегалец и лице на американската црна листа. ДУИ не е реформирана партија, туку групација која манипулира со националните чувства и европските стремежи на Албанскиот народ за свои лични и тесно-партиски интереси“, велат од коалицијата.

Од ВЛЕН упатија прашања до Бујар Османи од кога тоа средбите на еден министер за надворешни работи со лица од американската црна листа се класифицирани, дали тие средби се пријавени во Јавното обвинителство и МВР и кој е интересот зад оваа тајна комуникација?

„Албанците очекуваат одговори, не молк. Потсетуваме: Помошта за бегството на Никола Груевски беше дело на ДУИ. Законот за амнестија за Мијалков и неговата екипа беше дело на ДУИ. Сè ова го разбираме како очај на една корумпирана елита која знае дека нејзиното време истекува. ДУИ ја претвори политиката во пазар и во бизнис, а Албанците во заложници на нивните договори со бегалци и криминалци. ВЛЕН е тука да ја врати чистaта политика, да обезбеди транспарентност и да стави крај на ова лицемерие“, велат од коалицијата.

СДС, Зоран Заев и Венко Филипче ги злоупотребувале АНБ и Агенцијата за разузнавање, ги прислушувале претседателот Христијан Мицкоски, новинари и бизнисмени.

Службите за безбедност и разузнавање во периодот од 2019 до 2024 година, наместо за државата, работеле за СДС, а со цел политички прогон и хајка против ВМРО-ДПМНЕ и претседателот Христијан Мицкоски, замолчување на новинарите и уцена на бизнисмените, рече на прес-конференција Бране Петрушевски, пратеник на ВМРО-ДПМНЕ.

Ова, како што додаде, е скандал од невидени размери.

„И тоа токму од партијата што на власт дојде со проектот ‘Вистината за Македонија’. 7 години потоа вистината е поинаква, грда, но и болна.

СДС како тогашна власт ја следела опозицијата, ВМРО-ДПМНЕ. И сега сигурно ќе се правдаат со разноразни белешки, инструирани и фабрикувани случаи за надворешно влијание, измислени и наместени причини. Но, реалноста е болна, а тоа е дека употребувале државен апарат за политичка елиминација.

Според сознанијата што ги имаме, претседателот Мицкоски, неосновано и со една единствена цел, политичка елиминација, бил ставен на оперативна обработка од страна на службите што ги водели кадри на СДС“.

Според Петрушевски, АНБ на Виктор Димовски и Заре Милошески, како и АР на Еролд Муслиу, го следеле Христијан Мицкоски, неговото движење, неговата комуникација и неговото дејствување.

Како што оценува, следењето политички противник, заради негова политичка елиминација со помош на државни ресурси, е крајно тоталитаристички чин и метод, кој не е виден никаде во развиените западни демократии, особено не во последните 100 години.

„Она што Уставот го гарантира, а тоа е слободата на движење, слободата на говор и политичко организирање, му било загорзено на претседателот Христијан Мицкоски од страна на СДС.
Овие сознанија што ги имаме ние, но и во многу подетаљна форма, поткрепена со факти, ги има и ЈО.
Наместо молк, очекуваме одговори, и одговорност. Наместо летаргија, одлучна акција.

Прашања на кои мора да одговорат се:

1. Кој бил одговорен да го следи издавањето на ПИ-мерките од 2019 до 2024 година? Дали е, всушност, сегашниот јавен обвинител Љупчо Коцевски? Ако тоа е така, станува сосема јасно зошто СДС и ДУИ не гласаа за негово разрешување. Дополнително, денес Венко Филипче е опкружен со истите луѓе што прислушувале и злоупотребувале државен систем. Истите тие се дел од понудата на СДС.

2. Кому и зошто му служеле прислушуваните материјали? Во која европска држава се следат лидер на најсилна партија и новинари и медиуми? Дали со добиените информации се тргувало со влијание и се уценувале бизнисмени“, прашува Петрушевски.

Побара ЈО итно и недвосмислено да отвори случај и да бара одговорност од Виктор Димовски, Заре Милошески и од Еролд Муслиу и нивните политички наредбодавци во врвот на СДС.

Петрушевски вели дека тоа што во Македонија било пракса 5 години, а од кое му се гади на секој нормален човек, мора да биде казнето и никогаш да не се повтори.

Делегација на Вооружените сили (ВС) на Романија, предводена од началникот на Генералштабот, генерал Георгита Влад, од денес до четврток, ќе престојува во официјална посета на Армијата на Република Северна Македонија.

На официјалната средба помеѓу началникот на Генералштабот на Армијата, генерал-мајор Сашко Лафчиски и генералот Влад беше потврдена соработката помеѓу двете армии, која во текот на изминатата и оваа година се оценува како исклучително добра и на високо ниво. Посебно беше нагласена успешната соработка на полето на обуката и вежбите реализирани во рамките на иницијативата Б-9, како и во рамките на билатералните и регионалните активности.

За време на официјалниот состанок, романската делегација беше запознаена со трансформацијата на Армијата, учеството на Армијата во меѓународни мисии на НАТО, ОН и ЕУ, како и капацитетите на армискиот полигон „Криволак“. Дополнително се разговараше за заемна поддршка при исполнување на НАТО целите на способности и подобрување на интероперабилноста, како и можноста за унапредување на билатералната соработка, вклучувајќи ја и соработката во областа на специјалните сили.

Во рамки на посетата, генералот Влад оствари средба и со министерот за одбрана Владо Мисајловски на која се разговараше за посветеноста на двете земји во зацврстувањето на источното крило на НАТО, за безбедносната состојба во регионот, како и за можностите за развој на билатералната соработка. Министерот Мисајловски во оваа прилика ја нагласи исклучително интензивната одбранбена соработка благодарение на која се зајакнува интероперативноста помеѓу двете сојузнички армии и додаде дека македонските припадници, како и досега, ќе продолжат со својот придонес како дел од НАТО мултинационалните сили во Романија.

Покрај официјалните средби, во текот на денешниот ден, романската делегација ќе го посети и баталјонот за специјални сили во касарната „Илинден“ во Скопје, каде ќе биде запознаена со мисијата, опремата и вооружувањето со кое располага баталјонот и ќе присуствува на методско-показна вежба организирана од единицата.

Во текот на утрешниот ден романската делегација, во касарната „Боро Менков“ во Куманово, ќе присуствува на свечената церемонија за примопредавање на должноста на Политичко-воено- управувачкиот комитет и Координативниот комитет на СЕДМ, како и на одбележувањето на 26 години од формирањето на бригадата за Југоисточна Европа (SEEBRIG).

Соработката помеѓу Армијата и ВС на Романија се оценува на високо ниво. Оваа соработка е надградена во ноември 2023 година со учество на Армијата со свои сили во Романија во рамките на НАТО и тоа, Активноста за зголемена будност – enhanced Vigilance Activity – eVA Battlegroup Initial Operational Capability (денес тоа е во рамките на НАТО активноста „Зајакнати истурени сили“ – Forward Land Forces) и ангажманот на штабен офицер во Мултинационалниот корпус Југоисток (MNC-SE) во Букурешт. Овие активности претставуваат цврста основа за натамошно продлабочување и развој на партнерството меѓу двете армии.