Македонија
Филипче пред членовите на СДММ: Иднината не е предодредна, таа ја обликуваме сите ние денеска

„Младите на СДСМ се надежта дека социјалдемократијата ќе опстои, а со тоа и надежите за подобро утре за секој од нас“ истакна претседателот на СДСМ, Венко Филипче на денешната конференција за избор на раководство и претседател на СДММ.
Претседателот на партијата порача дека младите ја обликуваат судбината на нацијата, посочувајќи им секогаш да бидат гласни и храбри да не молчат пред неправдите. Потсетувајќи на младинските демонстрации низ историјата, Филипче истакна дека секогаш младите се тие кои го палеле огнот на промените, од уличните протести во Париз 1968 до Арапската пролет, младите се тие кои застанаа против угнетувањето, бараа правда и се бореа за еднаквост.
„Сите предизвици со кои се соочуваме-било да се климатските промени, социјалната нееднаквост или економската неправда – не се само прашања за утре, тие се прашања за денес. И тие бараат храбра, решителна акција сега. Живееме во време на голема неизвесност. Подемот на популизмот и екстремизмот ја загрозуваат слободната младинска мисла, влеваат недоверба и гнев кај младите. На ова мора да се спротивставите. Социјалдемократијата е единствена политичка платформа преку која можете да делувате слободно , да се борите за вистинските вредности и да обезбедите просперитетна иднина за себе. Јас силно верувам а сакам да верувате и вие дека сепак, нашето општество е вкоренето во правичност, еднаквост и солидарност. И такво мора да остане и наша обврска е да не се предадеме во битката да имаме такво општество“-рече претседателот на СДСМ, Венко Филипче.
Истакнувајќи ја принципите и вредностите на социјалдемократијата, претседателот на СДСМ, Филипче посочи дека СДММ мора да се борат за напредок, за вистински вредности, за достоинствен живот и благосостојба на сите.
„Политиката не е спорт на гледачи. Не е доволно да застанете на страна и да се надевате дека некој друг ќе ја направи промената што сакате да ја видите. Без разлика дали тоа е преку организирање во вашите факултети, застапување за политики што ги одразуваат вашите вредности или интереси или пак сакате да се кандидирате за функција – вашето учество е од клучно значење“-рече Филипче.
Претседателот на СДСМ, Венко Филипче, повика на обединетост, посочувајќи дека силата е во единството на СДСМ.
„Заедно сме посилни. Само со застанување заедно можеме да се спротивставиме на силите кои сакаат да не поделат. Само со заедничка работа можеме да изградиме општество кое е поправедно и сочувствително. Денес да се обврземе дека ќе се поддржуваме еден со друг, да се креваме едни со други и да се бориме заедно за светот во кој веруваме. Иднината не е напишана. Не е предодредена. Таа е обликувана од активностите што ги преземаме денес. И тоа е обликувана од луѓе како вас – луѓе кои се подготвени да застанат, да зборуваат и да водат. Затоа, ве прашувам, каква иднина сакате да создадете? Во какво општество сакате да живеете? И што сте спремни да направите за да стане реалност? Одговорите на тие прашања не се само за размислување, тие се патоказ за делување. И верувам дека ќе делувате“ рече Филипче во своето обраќање.
Филипче му честиташе на новиот претседател на СДММ, Трајче Стојчевски, за изборот и му посака успех во работата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски за тендерот за униформите: Се фокусиравме на квалитетот и цената, нема неправилности

Министерот за внатрешни работи, Панче Тошковски, реагира на обвинувањата за тендерот за униформите за припадниците на полицијата, велејќи дека постапката била предмет на задолжителна управна контрола од Бирото за јавни набавки, при што не биле најдени никакви неправилности.
По обвинувањата од опозициската СДСМ дека тендерот го добиле две фирми, од кои едната со двајца вработени, а другата отворена 20 дена пред постапката, Тошковски образложи дека нивната логика е поттикнување на конкуренцијата и фер пристап.
Премногу строги критериуми, вели Тошковски, често ги елиминираат малите и средни претпријатија, кои во Македонија се најконкурентни и често можат да понудат најдобри цени. Наша цел, додава министерот, е да добиеме најдобар квалитет по најповолна цена, а тоа го постигнуваме со овозможување на поширок круг на понудувачи.
„Законот за јавни набавки не предвидува исклучување на фирма само поради тоа што е новорегистрирана или има помал број вработени и ние целосно постапуваме согласно неговите одредби“, дециден е Тошковски.
Министерот појасни и дека МВР нема склучено договор за директна, еднократна исплата на наведената сума одеднаш, туку склучена е рамковна спогодба која претставува максимална вредност за набавки во наредните три години. Самата рамковна спогодба, вели тој, не предизвикува директна финансиска обврска за Министерството, односно финансиски обврски се преземаат само кога ќе има реална потреба и се склучуваат посебни, поединечни договори за конкретни нарачки, со динамика на испорака според потребите.
„Наместо само на историјат на понудувачите, ние се фокусиравме на она што е најважно, реалниот квалитет на производот. Затоа, клучните услови беа задолжителна достава на мостри и лабораториски анализи. Секој понудувач мораше да достави примероци од униформите и делови од униформа, а мострите беа предмет на лабораториски анализи и испитувања од независни акредитирани лаборатории. Важно е да се нагласи и дека техничките спецификации за униформите и нивните делови се уредени со Правилник кој е јавно објавен во Службен весник. Тоа значи дека тие се стандардизирани и нема можност за какво било влијание врз нивната содржина, што обезбедува еднаков пристап за сите економски оператори“, се вели во реакцијата.
Покрај квалитетот, како што се додава, клучен фактор е и цената. Анализата покажала дека разликата помеѓу највисоката и најниската понудена цена во постапката е 14,4 отсто за дел 1 и 27,9 отсто за дел 2 од набавката, што ја потврдува конкурентноста на тендерот и добиените поволни цени.
Во врска со тоа дека обвинувањата доаѓаат од СДСМ, Тошковски рече дека токму тие што ги оставија полицајците без униформи, принудени сами да си крпат, шијат или позајмуваат делови од пензионирани колеги имаат образ да зборуваат за наводни криминални тендери.
Македонија
Таравари контра Фетаи: Неговата група брои помалку од 40 луѓе кои чувствуваат вознемиреност и вина

Претседателот на Алијансата за Албанците, Арбен Таравари ја коментираше прес-конференцијата на неговите поранешни партиски соборци кои јавно денес излегоа со став дека остануваат во Влен, и не се согласуваат со неговите политики.
Таравари вели дека тоа е група од помалку од 40 луѓе на Арбен Фетаи (претходно го разреши од партиската функција), а чувствуваат мешавина од вознемиреност и вина.
„Анксиозноста е најлошото чувство кое човек го доживува…особено кога е измешано со чувство на вина! Продолжуваме помирно и посигурно од кога било кон Октомвриската победа која е блиску…многу блиску!“, пишува Арбен Таравари, претседател на Алијансата за Албанците.
Ставот на неговите поранешни сопартијци е дека Албанците сакаат да продолжи промената, а не враќање на старото, по најавите на Таравари за соработка и со ДУИ на претстојните локални избори.
Македонија
Албанците сакаат продолжување на промената, а не враќање на старото, велат неистомислениците на Таравари од Алијансата

Го слушнавме нашето членство. Се сретнавме со нашите активисти во секој град – од Липково до Струга. И пораката е јасна: Албанците сакаат продолжување на промената, а не враќање на старото. Ова беше истакнато на денешната прес-конференција на некогашните соработници на Арбен Тараври од Алијансата за Албанците, кои не се согласија со одлуката да ја напушти Владата.
На прес-конференцијата зборуваше ексминистерот од Алијансата, Азир Алиу, а присутен беше и Арбен Фетаи, којшто Таравари вчера го разреши од партиските структури.
Тие не се согласуваат со поличкиот правец кој го зазема Таравари, најавувајќи соработка и со ДУИ за претстојните локални избори.
„Во овој турбулентен политички период, кога стариот режим ги прави последните обиди да ја затемни надежта за промени, ние избравме да не реагираме брзо. Слеговме на терен, ги слушавме нашите активисти, разговаравме со партнерите и размислувавме – со смиреност и одговорност“, рече Алиу.
Оваа група од веќе поделената Алијанса, смета дека земјата има потреба од стабилност, развој, одговорно владеење и од Алијанса која нема да ja предаде довербата добиена од граѓаните. Тврди дека се залага за одговорност, а не поради лични интереси и целта е да не ја напуштат битката на половина пат.
Велат дека Алијансата не е создадена да биде ничија алатка. Таа е создадена да биде глас на граѓаните, промените, и еднаквоста.
На пресот беше истакнато дека денешната влада е постабилна од кога било, посветена на реформите и решена за интеграција. Алијансата за Албанците, како што додадоа, има клучна улога во овој процес, и тие нема да се откажат од таа мисија.
„Во однос на половичните состаноци на ограноците што се нарекуваат „партиски конгреси“ и кои шират поделби и етикетирања – тие не го претставуваат духот, ниту пак статутот на Алијансата. Изразуваме разочарување за навредите упатени кон албанската младина и жената во име на Алијансата, но нашата одговорност е да не го изгубиме правецот дури и кога другите се деградираат“, беше истаканато.
Додаваат дека ќе продолжат како рамноправен партнер во коалицијата ВЛЕН, со иста професионалност и посветеност – служејќи им на граѓаните со чест и решителност.
Крилото на Арбен Таравари во Алијансата за Албанците, претходно го разреши Арбен Фетаи од функцијата претседател на партиското собрание. Таравари изјави дека се исклучени и некои членови на Претседателството кои јавно се изјаснуваат против Алијансата за Албанците. Се работи за 8 од 46 членови. За Мимоза Муса, Таравари рече дека не е донесена одлука оти не е јасно дефинирано дали останува со Алијансата за Албанците, или со Влен.