Од понеделникот 134 медицински сестри почнаа со шестмесечна платена работа во службите за патронажна дејност во 17 здравствени дома и во 2 општи болници со проширена дејност на територијата на земјава.

Министерот за здравство, Венко Филипче, ги посети и им посака успешен почеток на медицинските сестри во Здравствениот дом во Скопје.

„Чест ми е што на нашиот медицински кадар му овозможуваме достоинствени услови за работа. 42 медицински сестри почнаа со работа во Здравствениот дом во Скопје, а 92 други медицински сестри во целата држава. Се грижиме за здравствените работници тука да работат, во македонското јавно здравство. На патронажните сестри им посакувам успешен почеток, а ние ќе продолжиме со вистински мерки и политики за да ги мотивираме да останат и да работат во Северна Македонија“, потенцира министерот Филипче и додаде дека за 2 години издадени се повеќе од 5.000 согласности за вработувања и зголемени се платите на здравствените работници. 15 отсто на докторите специјалисти, 10 отсто на медицинските сестри

Патронажните сестри во Скопје ќе бидат распоредени во патронажните пунктови во поликлиниките Чаир, Ѓорче Петров, Јане Сандански, Драчево, Бит-пазар и Ченто, при Здравствениот дом – Скопје, за граѓаните на градот Скопје и околните населени места.

„Патронажните сестри се поделени по тимови, во 6 пукта. Ќе одат на терен, во домовите на граѓаните, и ќе се грижат за здравјето на оние на кои им е најпотребно. Благодарност на Министерството за здравство за реализираната мерка, со која докажуваме дека се грижиме за човечкиот капитал во нашата земја. Со 42 медицински сестри значително ќе го зголемиме капацитетот на Здравствениот дом во Скопје“, истакна директорот на Здравствниот дом, Виктор Исјановски.

Во Кочани и Ресен успешно се реализира моделот интегрирана здравствена и социјална заштита. Стручен тим од медицински сестри, физиотерапевт, негувател и социјален работник оди во домовите и се грижи за здравјето на пациентите.