Во согласност со сите параметри и показатели што го одредуваат нивото на квалитет, финскиот образовен модел е еден од најдобрите во глобални размери. Најрелевантен показател се постигнувањата на финските ученици на најпознатите и најпрестижни меѓународни тестирања и натпревари каде што тие се секогаш меѓу прворангираните. Тоа е потврда за стекнатите знаења и вештини на финските ученици во тамошните училишта, велат од Министерството за образование.

Додаваат дека Северна Македонија како земја во развој има тенденција да ги следи глобалните образовни трендови, а благодарение на нововоспоставената билатерална соработка помеѓу двете земји, Министерството за образование и наука и другите институциите на системот во државава што работат во оваа област добиваат поддршка од финските.

Во таа насока, денес беше организиран и еднодневен вебинар, на кој беа споделени фински образовни искуства како поддршка на реформите во основното образование во нашата земја. На вебинарот учествуваа министерот за образование и наука, Јетон Шаќири, и раководителите на повеќе сектори во МОН, како и претставници од Бирото за развој на образованието, од Педагошката служба и од повеќе основни училишта во државата. А од другата страна претставници беа финскиот амбасадор за Република Северна Македонија, Кимо Лахдевирта, советници во финската Национална агенција за образование, професори од финскиот Универзитет за едукација на наставен кадар „Оулу“, како и низа образовни експерти.

Повеќе теми беа предмет на дискусија, но фокусот најмногу беше ставен на градењето мрежа на училишта што континуирано ќе се заложуваат за подигнување на конкурентноста и со какви стимулативни мерки тие да бидат поддржани од надлежните институции на системот. Претставниците на Финска го споделија искуството за подготовката на нивната национална стратегија.

Во своето воведно обраќање на вебинарот, финскиот амбасадор Кимо Лахдевирта истакна дека развивањето на целиот образовен систем бара време.

„Во Финска реформирањето на образовниот систем сè уште трае. Станува збор за единствена комбинација од разни фактори, така што секоја земја што се стреми да ги следи финските чекори треба да ја види поголемата, сеопфатна слика. Финска е подготвена да го сподели своето знаење и оттаму веруваме дека за образованието меѓународната соработка е од клучно значење“, истакна Лахдевирта.

Министерот за образование и наука, Шаќири, изрази голема благодарност до претставниците од финските образовни институции за отвореноста да ѝ помогнат на нашата земја да напредува во процесот на креирање и спроведување автентичен концепт за современо образование.

„Во период кога Северна Македонија е насочена кон имплементација на крупни реформи, особено во делот на основното образование, многу ни е важно да ги чуеме искуствата на оние што всушност ги диктираат глобалните образовни трендови. Ние и досега учевме од Финска. Сме го анализирале финското образование, но оваа непосредна комуникација е најдобар начин за запознавање со политиките шт вие ги креирате и спроведувате, а тоа многу ќе ни помогне“, рече Шаќири.

Двете страни дискутираа и за важноста да се поседува стратегија за мотивација и обука на наставниот кадар за организирање што повеќе креативна и интерактивна настава за што неопходно е вложување во нивните дигитални вештини, обезбедување ИТ-технологии и дигитални и интерактивни материјали за учење.

Министерот Шаќири рече дека МОН во последните две-три години посветува големо внимание на наставниот кадар, кој е всушност најважната алка во процесот на едукација потенцирајќи дека и најдобрите реформи хартија не би успеале доколку училиштата не поседуваат квалитетен, добро обучен и мотивиран кадар за работа.

„Затоа и ги зголемивме нивните плати над 20 проценти во изминатиот период, а воведовме и можности за кариерен напредок. Работиме на тоа да имаат подобри услови за реализирање на наставата, а особено сме посветени на обезбедувањето континуирани обуки за професионален развој“, рече Шаќири.

На крајот од семинарот се дискутира и за креирањето политики за заштита на учениците од сите облици на насилство, особено од насилството преку интернет.