Македонија
Фирми земале субвенции а не плаќале закупнина и не го обработувале земјоделското земјиште: Трипуновски за скандалите од времето на Николовски

Министерот за земјоделство, шумарство и водостопанство, Цветан Трипуновски најави дека од денеска започнува со објавување на сите сомнителни случаи и афери од претходното раководство на министерството.
Народот, појасни Трипуновски, покрај тоа што виде како работеше Николовски, денеска ќе има можност и да слушне што се случувало во министерството.
На денешната прес-конференција тој обзнани како одредени правни лица надвор од сите прописи земале државни пари.
„Правното лице „Ар експорт ДООЕЛ Увоз Извоз“ од Струмица кому преку Министерството за земјоделство му било дозволено да земе противправно околу 30 милиони денари за субвенции. Министерството од 2019 до 2022 година со фирмата од Струмица има склучено вкупно 19 договори за вкупна површина од 1416 хектари. По извршениот увид од страна на Државниот инспекторат за земјоделство е констатирано дека за 11 договори со површина од 941 хектари не се почитувале одредбите од страна на закупецот и требало да бидат раскинати. Врз основа на овие договори закупецот од Агенцијата за финансиска поддршка остварил приход по основ на субвенции од 485.000 евра“, посочи Трипуновски.
Дополнително како што појасни, закупецот требало преку бизнис план кој го понудил до министерството да инвестира над 2 милиони и 450 инвестиција на предметното земјиште, а во моментот на контрола имало инвестиција од околу 300.000 евра а инспекторите констатирале дека закупецот немал платено и закупнина за неколку години, со што дополнително го оштетил буџетот во износ од 60.000 евра.
Како втор случај го посочи правното лице „ДЗС Илинден“ со кого, како што информираше, министерството склучило закуп на времетраење од 30 години на површина од 1604 хектари, но подоцна со анекс, површината се намалува на 945 хектари државно земјиште.
Во 2019 година бил поведен судски спор за неплатен закуп за три години, по што подоцна било донесено решение за еднострано поништување на договорот за закуп. Но и по раскинување на договорот според Трипуновски, министерството не ја ипочитувало одлуката и не доставило примерок од изјавата до Агенцијата за катастар а на закупецот и по раскинување на договорот му биле исплаќани субвенции во износ од над 19 милиони денари.
„Ова ја отвора дилемата дали овие пропусти од страна на институциите се шема за испумпување на пари од државниот буџет. Ова се само два случаи поткрепени со цврсти докази кои потврдуваат дека системот и институциите се целосно разурнати но покажува и недомаќинско и криминално работење од страна на претходното раководство на СДСМ и Николовски. Институциите мора да работат во служба на граѓаните и затоа го повикувам Јавното обвинителство веднаш да постапи и да истражи, која била целта и зошто се дозволило овие два правни субјекти да добијат огромна сума на пари иако министерството и другите надлежни институции требало навремено да реагираат. Никој не смее и не може да биде над законот“, прецизира министерот за земјоделство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска Давкова објави дека се фотографираше со Доналд и Меланија Трамп

Претседателката Гордана Сиљановска Давкова на својот Фејсбук-профил објави дека ѝ претставувало чест да присуствува на приемот што го приредија претседателот на Соединетите Американски Држави, Доналд Трамп, и неговата сопруга Меланија Трамп, по повод 80. Генерално собрание на Обединетите нации.
Во објавата таа истакна дека во овие турбулентни времиња е важно да не се отстапува од демократските вредности и да се работи заеднички на зачувување на глобалниот мир и безбедност, додавајќи дека САД остануваат искрен сојузник на Македонија.
„Благодарност за гостопримството!“, напиша Сиљановска Давкова.
Македонија
Филипче: Ѓубрето во Скопје е исклучиво одговорност на ВМРО-ДПМНЕ

Претседателот на Сoцијалдемократскиот сојуз на Македонија, Венко Филипче, во одговор на новинарски прашања поврзани со најновите анкети кои се појавија во јавноста, а кои наводно укажуваат на слаб резултат на СДСМ, остро ги отфрли ваквите наративи, оценувајќи ги како намерен обид да се искриви реалната слика во општеството.
„Прво, анкетите сметам дека се обид да се искриви вистинската слика во секојдневниот живот и реалноста, а тоа е дека ВМРО-ДПМНЕ според наши анализи губи огромен број на гласови. Сакаат да створат некаква перцепција дека се победници, меѓутоа вистината е дека граѓаните воопшто не се задоволни од начинот како тие ги раководат општините“, рече Филипче.
Во одговорот, Филипче посочи дека токму локалното владеење на ВМРО-ДПМНЕ во изминативе четири години е најсилниот аргумент против нив, особено во главниот град.
„Еве, 90% од општините во Скопје, вклучувајќи и градот Скопје, се раководени од ВМРО-ДПМНЕ во изминатите 4 години. Па гледајте во каков град, какви општини живееме. Така што сметам дека е тоа само еден таков обид“, рече Филипче.
На новинарско прашање за хаосот со ѓубрето, запуштените улици и урбаната запоставеност на градот, Филипче директно ја посочи одговорноста кон ВМРО ДПМНЕ.
„Исклучиво и ексклузивно вината е во ВМРО-ДПМНЕ, во блокадите на Советот во Град Скопје, во рамките на раководењето на нивните општини. Еве, видете како е несредено, неискосено, неисчистено и во Аеродром, и во Кисела Вода. И сега тие луѓе повторно претендираат да бидат градоначалници“, рече Филипче.
Тој додаде дека оваа очајна слика е резултат на неработење и неодговорност на ВМРО ДПМНЕ, а дека пуштањето на анкети со однапред нарачани резултати е обид за одбрана од вистината.
„И во една таква ситуација, кога луѓето се свесни дека тие луѓе немале никаков перформанс, и сега се повторно кандидати, сè што можат во овој предизборен период е да пуштат такви лажни анкети“, рече претседателот на СДСМ, Венко Филипче.
Македонија
Пожарите стивнаа, остана само еден активен

На територијата на државата денеска до 18:00 часот има два пожари на отворен простор, од кои еден пожар е активен и еден е изгаснат, информираат до ЦУК.
Активен е пожарот во Општина Демир Капија, кај м.в. Јаворица каде гори нискостеблеста деградирана шума.
Изгаснат е пожарот во село Дедели, во Општина Валандово, каде гореше депонија.