„Господине Оливер Спасовски, да биде Сања Божиновска дел од македонската Влада треба да е привилегија, затоа што, тоа што она го има на професионален план во енергетиката направено не можете ниту да го сонувате, а камоли па да се приближите“, му порача претседателот на Владата Христијан Мицкоски на Оливер Спасовски на денешната седница за поставување на пратенички прашања.

Премиерот Мицкоски додаде дека за разлика од Спасовски кој делел македонски пасоши на белосветски криминалци, министерката Божиновска има долгогодишно работно искуство, а за неа како што рече знае светскиот бизнис крем од Украина до Шпанија и од Скандинавија до Атина.

„Нејзината биографија и нејзините постигнувања, се нешто за кое што барем можевте да излезете овдека и да кажете секоја чест за стручноста и за личното портфолио. И сега се доведуваме во ситуација, да е грев ако сме успешни. Се доведуваме во ситуација да зборуваме работи, кои што навистина немаат никаква врска, ниту па јавноста ја интересира, во врска со тоа кое што го води Сања. Еве јас ќе ви кажам бидејќи ја знам долго време, да речеме 12-13 години. Верувајте ми за нејзе знаат светскиот бизнис крем од Украина до Шпанија и од Скандинавија до Атина. Додека имавме политичари во македонската влада, кои што даваа пасоши на белосветски криминалци. Тоа е ваша работа, тоа е директен ваш ресор и за тоа ќе ве напаѓам, ќе барам одговорност. Бидејќи го споменавте Панче Тошковски, ќе барам одговорност за тоа што сте го правеле, тогаш ќе барам одговорност. Сега да зборуваме за работи кои немаат никаква врска со енергетиката, ниту со рударството. Ниту со минералните суровини. Знаевте кои фирми носат јаглен во РЕК Битола и Осломеј. Знаевте? Знаевте кои носеа транспортни траки во РЕК Битола. Требало како МВР да го истражите тоа, бидејќи стигаа информации до вас, стигаше гласот, ние како опозиција зборувавме. Еве два реда позади вас еден поранешен ваш член од вашата влада ќе ви каже, за работи кои немаат никаква врска. Тоа била ваша работа, се надевам дека повторно никогаш нема да ви биде бидејќи тоа што таму го направивте е полошо и од најголемиот дебакл, кои што и се случи на Македонија. Ако вие сте постапувале, место да дават пасоши на светски нарко картели и лидери на такви нарко картели, и сте се фокусирале на тоа што ви е работа да истражите, зошто преку програмата за ФИТР се спонзорираа иновативни методи за креирање пица, вода за пиење, слично, кои носи јаглен, како се носи јагленот, кои врши ископ, како се врши ископ, зошто се плаќа вака, зошто ЕЛЕМ има најмногу договори во четири очи, тогаш ќе ви станело јасно, зошто денес имате 18 пратеника, а на следните избори, прашање е дали ќе имате двоцифрен број на пратеници, ако вака продолжите. Ваша работа била господине Спасовски да утврдите зошто фирми враќале данок на додадена вредност, пријавувајќи лажна консигнација, а празни магацини. Ваша работа било тоа господине Спасовски, не била моја. Ние како опозиција сме зборувале, немојте ова да го правите, немојте господине Спасовски, еве допрел до вас гласот, истражете, вие не сте го работеле тоа. Тоа е господине Спасовски ваша работа. Ќе ви дојде господинот Пекер, да му кажете не благодарам, а не лична карта да му вадите во 11 часот навечер во Драчево. И оние службеници таму кои што преземаат дело заради вас, по две три години што беа во затвор за патни исправи на српски кланови и на македонски кланови, кои што се занимаваат со криминал и корупција. Вие господине Спасовски треба да одговарате за тоа. И ако за тоа нема одговорност, тогаш да ќе барам одговорност. Тоа е работата господине Спасовски за која вие треба да се грижите. Кој каква имал самосвест, што имал самосвест, јас ви кажувам и ви гарантирам и ви потпишувам, дека Сања Божиновска е многу поголема Македонка од вас сите заедно. Запишете го ова. Јас ова ви го кажувам и ви потпишувам да знаете. Заедно седиме тука се бориме и Македонци и Албанци и левичари и десничари, заедно сме во иста влада и работиме за еден интерес, за една кауза, тоа се вика Македонија. И ќе продолжиме да се бориме, нема да застанеме“, кажа премиерот Мицкоски.

„За 120 дена покажавте како се сака Македонија, а тоа е со дела и реализација на проекти, односно со исполнување на ветеното од изборите на кои граѓаните гласаа за ВМРО-ДПМНЕ. Имаме континуитет на изборните ветувања, односно нивно преточување во конкретни проекти во интерес на граѓаните“ изјави Ковачки на денешната седница за пратенички прашања на Собрание.

Исто така Ковачки додаде дека и покрај празните каси кои ВМРО-ДПМНЕ ги наследи, сепак Владата не бара изговори туку прави конкретни дела во интерес на доброто на граѓаните.

„И покрај катастрофалната состојба на наследениот буџет во кој немаше пари за пензии, а некои претпријатија со месеци трпеа за плата сепак не баравте оправдувања туку преминавте на конкретни чекори. Успеавте да обезбедите повисоки пензии и да ги исплатите заостанатите плати, да постигнете историски договор за платите на наставниците , да ја проширите позитивната листа на лекови, да обезбедите учебник за секое дете“ рече Ковачки.

Ковачки истакна дека ВМРО-ДПМНЕ вложува во инфраструктурни проекти, но и врши нивна реализација, за разлика од претходната власт која што ваквите проекти и служеле исклучиво како печатница за пари.

„ Од друга страна деновиве гледаме како претходната власт душмански постапувала со народните пари преку формирање на фирми на ДУИ и СДС, за испумпување на милионски суми од фондот за иновации и технолошки развој“ дополни Ковачки.

Првото прашање на Ковачки до Претседателот на Влада беше во однос на начинот на распределба на средствата за секоја општина и дополнително дали ќе има нов повик за да може опшините да аплицираат на нови проекти.

„Како одеше распределбата на парите за секоја општина и дали средствата се доделуваат врз основа на специфични потреби и проектни барања на општините, или можеби врз распределбата влијаеле други причини?Дали ќе има нов повик за искористување на средства за нови проекти, доколку има кога е тоа предвидено?“ праша Ковачки.

Второто прашање се однесуваше на  Стратегијата 2050 година, и подетално објаснување за истата како и кои механизми се предвидени за општ консензус, бидејќи антимакедонски елементи на СДС биле против оваа стратегија иако нејзината цел е визија за долгорочен напредок за земјава.

„Во вашиот говор на 23 октомври најавивте иницијатива за долгорочна стратегија за наредните 30 години со акцент на консензус меѓу сите релевантни општествени чинители и институции во земјата. За каква стратегија всушност станува збор и кои механизми ги планирате за општ консензус?“ 

Третото прашање беше поврзано со патувањето во САД  на самит на НАТО, каде СДС јавно обвинија за низа неправилности во патувањето, иако Антикорупциска комисија потврди дека нема злоупотреба на јавни средства, праша дали СДС  се извинија за клеветите и навредите по ваквата одлука на комисјата.

„Веднаш после формирањето на владата заминавте на пат за САД на самит на НАТО, СДС јавно обвинија за вашето патување во САД и покренаа прашање за транспарентноста и трошоците на ова патување. Дополнително тие во својот напад вклучија и членови на вашето семејство, што придонесе за засилување на дебатата во јавноста и непотребно подгреа политичка полемика.

Она што дополнително го засили интересот на јавноста е фактот дека случајот беше разгледан и од страна на Антикорупциска комисија која донесе одлука со која се затвори прашањето потврдувајќи дека нема злоупотреба на јавни средства ниту конфликт на интереси за ова патување. Дали јавно Ви се извинија за клеветите и навредите по ваквата одлука на комисјата?“ , заклучи Ковачки.

Откако ВМРО-ДПМНЕ и Мицковски дојдоа на власт, сериозно е нарушена безбедносна состојба во земјата. Само во октомври, за неполн месец, имаше 5 инциденти со пукање, а над 25 вооружени инциденти кои се случија во изминатите 4 месеци, рече пратеникот на СДСМ, Оливер Спасовски, на седницата на пратенички прашања.

– Пред три дена имаше пукање од автоматско оружје во Чаир, пред една недела, исто така имаше пукање на Скопската обиколница, потоа пред две недели, имаше пукање во Чаир, каде што директно беше и помилуваниот наркобос, Барон, кој беше вмешан во тој инцидент. Сето ова е во октомври. Исто така, на почеток на октомври се пукаше во Чаир каде беше повредено 19 годишно момче, а се пукаше и во Арачиново, Батинци, Сингелиќ, на пластичарската улица, имаше пукање и во Тетово, се случи и убиство кај Мавровка, рече Спасовски.

Тој јавно го праша Мицковски, дали по сите овие вооружени инциденти, ќе побара одговорност од министерот за внатрешни работи Панче Тошковски, дали ќе поднесе оставка или пак Мицковски ќе поднесе предлог за разрешување на министерот.

– Мицковски како претседател на владата излезе со став дека се подготвува сериозно нарушување на безбедносната состојба во земјата, некаде на есен, од страна на одредени групации и поединци за кој до сега не добивме никаква конкретна информација. Доколку тоа е во истрага нема да се соопшти, но доволно е да се соопшти дека е отворена постапка против тие, затоа што не треба да чекаме да ни се случи дестабилизација на безбедносната состојба, па дури тогаш да реагираме, рече Спасовски.