Македонија
Фондот ги обврза матичните лекари да намалуваат температура со парацетамол од една веледрогерија
Фондот за здравствено осигурување на 14 мај испратил допис до матичните лекари со кој ги известува дека во нивните ординации мора да имаат парацетамол во доза од 1000 милиграми.
Дополнувањето на списокот со задолжителна ампуларна терапија, според Фондот, е во согласност со „Правилникот за начинот на плаќање здравствени услуги во примарна здравствена заштита“, кој се дополнува со антипиретик во ампуларна форма Paracetamol 1000 mg/6,7 ml.

Овој лек во пропишаната доза од Фондот, во Македонија го увезува само веледрогеријата „Марти-Алко ДОО“ под името „апотел“. Производител на оваа ампула е грчка фирма, а во едно пакување има 3 ампули. Oд веледрогеријата не беа достапни за коментар.
„Макфакс“ испрати прашање, но не доби одговори од Фондот од каде потребата за проширување на задолжителната ампуларна терапија и зошто токму таа доза е пропишана како задолжителна, кога има уште една регистрирана во Регистарот на лекови, но со друга дозна јачина.
Од Фондот не одговорија врз основа на кои медицински созанија, анализи односно медицина базирана на докази, е утврдена потребата од дополнување на списокот задолжителна со ваква ампуларна терапија.
Во известувањето на ФЗО до лекарите само пишува дека потребата од дополнување на ампуларната задолжителна терапија е по нечие барање. Но, нема одговор чие е барањето и кој го поднел.

Лилија Чолакова Дервишова, претседателката на Здружение на приватни лекари на РМ, за „Макфакс“ изјави дека не биле консултирани за оваа промена на задолжителната терапија по приватните ординации кои соработуваат со Фондот, како што тоа било порано. Чолакова извести дека за ова расправала и Лекарската комора.

Таа објасни дека овој лек се пушта венски во инфузија и е хепапатотоксичен и нефротоксичен. „Чудно е што прво меилот го добивме од фармацевтската компанија“, вели Чолакова.
„Никогаш не се чуло да се менува ампуларна терапија без анекс на договорот и без преговори“, дополни претседателката на ЗПЛРМ. Таа додава дека во ниедна медицина базирана на докази не пишува дека матичниот лекар треба да пушта антипиретици за снижување температура. Вели, важно е да се рехидрира телото, да се тушира, да се пијат течности, можеби со аналгин, а последна опција е ваков антипиретик. „Никогаш не препорачуваме веднаш да се вклучи лекот. Ампулите не се бонбони“, раскажува Чолакова Дервишова.
За ова е известена и Лекарската комора, а според Чолакова лекот го нема во ниту болниците низ Македонија, па прашува зошто тоа би го имале само приватните лекари. Од ФЗОМ не одговорија на ниедно од прашањата на „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) ДИК со првични неофицијални резултати од повторените локални избори во четири општини
Државната изборна комисија (ДИК) вечерва ги објави првичните, неофицијални резултати од повторените избори во општините Врапчиште, Гостивар, Маврово Ростуше и Центар Жупа.
Врапчиште (излезност 32,37%)
– Исен Шабани (НАИ) – 5.355 гласа
– Зулхајрат Демири (Група избирачи) – 3.028 гласа
Гостивар (излезност 30,34%)
– Ваљбон Лимани (НАИ) – 14.519 гласа
– Невзат Бејта (ВЛЕН) – 7.174 гласа
Маврово Ростуше (излезност 28,51%)
– Онер Јакуповски (ВМРО-ДПМНЕ) – 1.906 гласа
– Анес Ахмети (СДСМ) – 938 гласа
Центар Жупа (излезност 13,26%)
– Аријан Ибраим (Демократска партија на Турците во Македонија) – 973 гласа
Портпаролката на ДИК, Радица Тодоровска Алексовска, рече во текот на утрешниот ден Комисијата ќе ги соопшти првичните официјални резултати, по приемот и обработката на записниците од сите избирачки места.
Македонија
(Видео) Мицкоски: Победата во Маврово-Ростуше е знак дека граѓаните наградуваат резултати, а кланот на Филипче доживува нов дебакл
„Денешниот изборен ден во четирите општини помина во демократска, мирна и достоинствена атмосфера. И покрај тешките временски услови и одредени технички предизвици, граѓаните слободно и одговорно го остварија своето право на глас. Тоа е јасна и недвосмислена потврда за демократскиот капацитет на државата и важна инвестиција во нејзината стабилност“, кажа на прес-конференција, претседателот на ВМРО-ДПМНЕ, Христијан Мицкоски.
„Овие избори покажаа дека институциите функционираат и дека демократските процеси се зацврстуваат. Во време на сериозни регионални и глобални предизвици, ова е вредност што мора да се чува и надградува, без разлика на политичките разлики. Во општина Маврово-Ростуше, ВМРО-ДПМНЕ оствари убедлива и многу важна победа. Онер Јакупоски е новиот градоначалник! Победа повеќе од двојна со над 1000 гласови разлика. Честитки за Онер, за сите симпатизери и за сите граѓани на Маврово-Ростуше. Оваа победа не е само локален резултат. Таа е јасна политичка порака. Порака дека граѓаните препознаваат работа, присуство на терен и одговорност. Порака дека не се наградуваат празни зборови, туку резултати“, истакна Мицкоски.
Оваа победа, вели тој, е „резултат на концептот што доследно го градиме: скромност, многу работа и реални решенија за секојдневните проблеми на граѓаните“.
„Во другите општини, изборната трка се водеше меѓу кандидати на други политички партии. Но целокупната политичка слика е повеќе од јасна. Со денешниот ден се заокружува резултатот од локалните избори во Македонија. ВМРО-ДПМНЕ победи во вкупно 56 општини во државата. СДСМ во 6. Тоа не е случајност. Тоа е јасен политички суд на граѓаните. Ова претставува уште еден тежок дебакл за СДСМ и за актуелното раководство на таа политичка партија. По историскиот пораз на локалните избори во 2025 година, денешните избори се само потврда дека изиграната доверба има последици. Партијата која на национално ниво освои околу 140 илјади гласови не може сериозно да зборува во име на мнозинството, ниту да се претставува како силна и кредибилна опозиција“, рече лидерот на ВМРО-ДПМНЕ.
Според Мицкоски, „проблемот на СДСМ не е само во изборните бројки“.
„Проблемот е многу подлабок. Тоа е пораз на политика што со години произведуваше криминал, конфликти, национални предавства и деструкција. Политика што ја држеше државата во место и ја трошеше енергијата на граѓаните. Затоа мора јасно да се каже: не станува збор само за блокади. СДСМ мора конечно да се соочи со сопственото коруптивно минато и со криминалците во своите редови. Без тоа расчистување, без јасна дистанца од корупцијата и криминалот, нема ниту кредибилитет, ниту доверба, ниту иднина оваа политичка партија. Македонија нема потреба од политика на навреди и ниски удари. Граѓаните се презаситени од политиканти кои бараат заштита во политиката за сопствените гревови. Оваа држава има потреба од борба на идеи, визии и програми. Од одговорна политичка конкуренција, а не од тоа кој погрубо и поневоспитано ќе навреди. Од другата страна е концептот што победува. Концептот на ред, стабилност и одговорност. Концептот на проекти, мерки и резултати. Концептот на држава што стои исправено и работи за своите граѓани, а не за тесните клановски интереси. Кланот на Венко Филипче доживува нов дебакл и тоа е резултатот кога се води политика на соопштенија напишани во други држави, а не борба на концепти и интересите за своите граѓани“, вели Мицкоски.
Македонија
МВР: Повторените локални избори завршија без нарушувања на јавниот ред и мир
Локалните избори кои се одржаа во дел од општините на подрачје на СВР Тетово, односно ОВР Гостивар и СВР Охрид се одржаа во мирна, фер и демократска атмосфера, информираат од Министерството за внатрешни работи.
„МВР во текот на целиот ден презеде мерки и активности во рамки на своите надлежности со цел непречено и безбедно спроведување на изборниот процес. Не беа регистрирани инциденти или било какви нарушувања на јавниот ред и мир“, стои во известувањето од МВР.

