Македонија
Ѓорѓиевски: Фотоволтаици за сите училишта во општина Кисела Вода

Дoговор за заедничка инвестиција во фотоволтаици, енергетска ефикасност и заштита на човековата околина потпишаа градоначалникот на општина Кисела Вода, Орце Ѓорѓиевски, и директорот на Центарот за развој на Скопскиот Плански Регион, Јане Мицевски. Со озваничувањето на овој документ сите училишта во општина Кисела Вода добиваат фотоволтаици, со што самостојно ќе може да произведуваат енергија.
„Денес, заедно со директорот на Центарот за развој на Скопскиот Плански Регион потпишавме договор, кој обезбедува значајни финансиски средства за имплементација на фотоволтаични системи во сите основни училишта на територијата на нашата општина. Времето во кое живееме, за жал, е карактеризирано со многубројни поскапувања, особено во делот на енергетските ресурси, што од нас како Општина бара да бидеме економични, иновативни и одговорни. Фотоволтаичните системи се одличен начин за користење обновливи енергетски извори и намалување на зависноста од конвенционалните извори на енергија. Имплементацијата на фотоволтаични системи во училиштата не само што ќе придонесе кон заштеда на енергија и редуцирање на трошоците за електрична енергија туку и ќе обезбеди еколошка одржливост. Ова е важно и од аспект на едукацијата бидејќи учениците непосредно во своето училиште ќе може да ги увидат придобивките од користењето чиста и обновлива енергија. Сакам да нагласам дека овој проект го спроведуваме во сите основни училишта на нашата територија, со исклучок на ООУ ‘Климент Охридски’ во селото Драчево бидејќи ова училиште ќе добие сосема нов објект за што деновиве ќе почне тендерска постапка. Кога тој ќе биде изграден, Општина Кисела Вода самостојно ќе инвестира во поставување фотоволтаични системи“, посочи Ѓорѓиевски.
Му се заблагодари на директорот на Центарот за развој на Скопскиот Плански Регион, Јане Мицевски, за неговата посветеност и поддршка.
„Преку ова финансиско партнерство ќе го засилиме нашиот ангажман кон постигнување одржлив енергетски ефикасен развој во цела Македонија. Воедно, сакам да потенцирам дека Општина Кисела Вода и самостојно продолжува да инвестира во обновливи енергетски извори секаде каде што е можно. Во следните фази планираме воведување фотоволтаични системи во градинките, а потоа и во други објекти, кои се во наша надлежност“, изјави градоначалникот Орце Ѓорѓиевски. Потребните финансиски средства за реализација на изведбените работи од проектот се обезбедени од Министерство за локална самоуправа – Бирото за регионален развој преку Центарот за развој на Скопскиот Плански Регион, како и од страна на Општина Кисела Вода“, заврши Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Гинов: Во ниту еден момент не е доведено во прашање водоснабдувањето на Битола

Изнесени се опасни лаги и манипулации од партиска говорница на една политичка партија, дека „ќе секнат чешмите во Битола“ и сакам јавно да побарам од советничката од СДСМ Мирјана Захариевска Ралевска да им се извини на битолчани и одговорно тврдам дека во ниту еден момент водоснабдувањето на Битола не е и нема да биде доведено во прашање, кажа денеска на прес-конференција Андреј Гинов, директор на ЈКП Водовод Битола.
„Околу „загубата“ на ЈКП Водовод Битола ќе кажам само неколку работи: -вкупните приходи за 2024 година се околу 284 милиони денари, вкупните расходи се околу 346 милиони денари, што продуцира загуба од околу 61 милион денари. Ако се земат предвид само неколку ставки на расходи и приходи ќе се види јасно зошто е тоа така. Вкупен приход од наплата на вода од правни и физички лица е околу 262 милиони денари, а од останатата реализација е околу 22 милиони денари, а додека расходите по само три основи и тоа : електрична енергија околу 43 милиони денари, сирова вода- кон „Стрежево“(заради сушата минатото лето) околу 50 милиони денари и трошоци за плати за вработените 148 милиони денари – што дава вкупен расход кога се додава и ДДВ по само три ставки е повеќе од 280 милиони денари“, рече Гинов.
Ова, според него, покажува дека целокупниот приход при висока наплата на сметки од околу 95% е близу вкупниот расход за само овие три ставки.
„Само за илустрација би кажал уште две споредби и тоа: во 2021 година во ЈКП Водовод имаше вкупно 227 вработени и трошокот за плата изнесуваше околу 107 милиони денари, а сега во 2024 год. има вкупно 205 вработени (22 вработени помалку) а трошокот за плати изнесува околу 148 милиони денари што е за 41 милион денари повеќе при значително помал број на вработени.
Во текот на 2021 година „Водовод“ влезе во непотребна инвестиција за „нова управна зграда“ за која што се потрошени повеќе од 60 милиони денари колку што изнесува сегашната загуба на ЈКП Водовод Битола“, истакна Гинов.
Македонија
Николоски: Пријателска средба со Мевлут, мој и на Македонија голем пријател

„Пријателски разговор со Мевлут Чавушоглу, пратеник во Турскиот парламент и поранешен министер за надворешни работи на Република Туркије“, напиша на фејсбук профилот, вицепремиерот и министер за транспорт Александар Николоски.
„Разговаравме за долгогодишната соработка помеѓу двете држави како и за можностите за засилена соработка во делот на економијата и потенцијални нови инвестиции.
Соработката и пријателството помеѓу двете држави и во иднина ќе ги зајакнуваме и продлабочуваме“, напиша вицепремиерот Николоски.
Македонија
Мицкоски: Потребен е механизам за спречување блокади на билатерална основа

Да се воведат механизми кои нема да дозволат билатерални спорови да се пречка за остварување на заедничка цел, порача премиерот Мицкоски од состанокот на постојаниот комитет на парламентарното собрание на НАТО чиј домаќин е земјава.
Според него, досега биле направени многу отстапки и одрекувања за остварување на државните цели како што е членството во НАТО, но како што вели, потребен е механизам за спречување блокади на билатерална основа, со кој ќе се одблокира и европската иднина за државата.
„Пријатели си помагаат, но и пријатели искрено си ги кажуваат своите чувства и забелешки. Сметам дека треба да се размисли и за воведување на механизми каде нема да се дозволи билатерални спорови да бидат пречка за остварување на колективната и заедничка цел. Ако ние сите заедно ја чуваме куќата, тогаш и заедно имаме право да си ги кажеме нашите проблеми, разочарувања и очекувања. Ние ќе останеме лојален партнер, и заедно и посветено ќе работиме кон остварувањето на колективните цели“, истакна премиерот.
Пред шефовите на парламентарните делагации од земјите членки на НАТО, Мицкоски се осврна и на трагедијата во Кочани по која сојузниците ја покажале својата солидарност. Помош понудиле десет европски држави, а преку механизмот за цивилна заштита на ЕУ дел од повредените заминаа на лекување во странство.
„Оваа трагедија ни покажа дека солидарноста не е само збор, туку дело што ги поврзува народите. Таа е темелот на нашата Алијанса-принцип што не води во заедничките напори за зачувување на мирот и безбедноста. Солидарноста значи дека кога еден од нас страда, сите страдаме. Кога еден е во неволја, сите притрчуваме на помош. Во изминатите пет години од нашето членство во НАТО, активно придонесувавме кон колективната безбедност и стабилност на Алијансата“, кажа Мицкоски.
Состанокот на Парламентарното собрание на НАТО кој се одржува во Скопје доаѓа на петгодишнината од членството на земјава во северноатланската алијанса, а денеска се одбележуваат и 76 години од основањето на НАТО како камен темелник на европската и северноамериканската безбедност..