Македонија
(Фото) Симулациска вежба за проверка на функционалноста на системот за безбедност

Денеска на автопатот Петровец – Скопје, кај клучката Кадино, во организација на Министерството за внатрешни работи беше изведена голема симулациска вежба со подготвено сценарио за прикажување на одговор на настаната ситуација од сообраќајна несреќа. Беше прикажана сообраќајна несреќа помеѓу комбе, во кое се превезуваат мигранти, и патнички автобус, а во која има поголем број на повредени лица и жртви.
Целта на вежбата беше да се проверат капацитетите, можностите и подготвеноста на припадниците на институциите како Министерството за внатрешни работи, Министерството за здравство, Бригадата за противпожарна заштита при град Скопје, Службата за итна медицинска помош и Црвениот крст, во еден координиран пристап за одговор при вакви и слични состојби и декларирање на нови можности за унапредување на меѓуресорската и меѓуинституционалната соработка на сите релевантни чинители.
Директорот на Бирото за јавна безбедност при МВР, Александар Јанев го истакна своето задоволство што полицијата и сите други институции одговорија професионлно и правилно на сценариото кое за нив било реалност бидејќи сите тимови кои одговараа на лице место мислеле дека одговараат на вистински настан.
„Морам да изразам задоволство за одговорот на полицијата, каде што практично за неполни 7 минути бевме први на лице место. Затворањето и регулирањето на сообраќајот и првата помош се случија за околу 14 минути што реално е добар одговор, и истото се однесува и на Противпожарната бригата и Црвениот крст. Во принцип сите институции одговорија добро на вежбата, на сценариото кое беше реално. Тимовите кои одговараа на лице место практично не знаеја дека одговараат на замислена вежба туку на реално и вистински настан. После вежбата ќе имаме сите институции заедничка анализа на резултатите и ќе понудиме системски подобрувања онаму кадешто е потребно. Планираме и во иднина низ вакви симулациски и практични вежби да се подигне севкупната подготвеност на институциите во системот со цел зголемување на безбедноста на граѓаните бидејќи навремените и правилни реакции од сите вклучени во системот значи намалување на штети и спасување на животи во вакви ситуации. Полицијата и за добро и за лошо секогаш е прва на лице место на настанот и ќе продолжиме да работиме, да се унапредуваме со цел да ги штитиме граѓаните и нивната безбедност.“, потенцираше директорот Јанев.
Вежбата започна со движење на комби кое превезува десетина мигранти по надвозникот кај клучката Кадино, кое е следено од полициско возило и кое не застанува на дадените сигнали. Тоа со цел да и избега на полициската патрола, ја зголемува брзината на движење и се движи по обратната насока кон патарината Петровец, каде наидува патнички автобус и предизвикува директен судар со автобусот, при што има поголем број на повредени и жртви.
Во текот на вежбата, припадниците на Противпожарната бригада го гаснеа пожарот предизвикан од судирот и со сечење на одредени делови на возилата извлекуваа повредени лица. На лице место од страна на Итната медицинска помош и Црвениот крст се укажуваше помош на повредените лица на лице место – тријажа и транспортирање со хеликоптер и амбулантни возила до болничките установи. Припадниците на МВР го обезбедуваа местото на настанот, го пренасочуваа сообраќајот, преземаа мерки за обезбедување на сите лица во сообраќајната несреќа, утврдуваа идентитет, како и фаќање на криумчарите на мигранти, а најтешките пациенти беа пренесувани со хеликоптер за медицински транспорт на МВР. Медицинските установи со своите капацитети и расположливи средства и човечки ресурси укажуваа медицинска помош на повредените.
Вежбата се одвиваше на повеќе локации како Центарот за известување и координација на МВР, болниците, Итната медицинска помош и Бригадата за противпожарна заштита.
Ваквите активности треба да придонесат во унапредување на координацијата на институциите при одговор и решавање на кризни ситуации од поголем обем, со цел градење квалитетен систем на менаџирање со кризи кој ќе го штити животот и имотот на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Милошоски за Коцевски: Најдобро е да си поднесе оставка, бидејќи спонзорството од ДУИ и СДСМ само ќе му го руши угледот

Со денешното гласање во Собранието паднаа маските околу тоа кој е политичкиот покровител на Државниот јавен обвинител Коцевски и неговото раководно друштво во обвинителството, напиша во објавата на социјалните мрежи Антонио Милошоски од ВМРО-ДПМНЕ.
Според него, одговорот е јасен.
„Истите политичари од ДУИ и СДСМ кои во февруари 2024 година го предложија и гласаа „За“ изборот на Коцевски за јавен обвинител, денес не се осмелија да гласаат за негова недоверба. И покрај тоа што државниот обвинител има неколку крупни професионални грешки за кои заслужува разрешување, сепак фактот што токму Коцевски најдобро ги знае индициите за висока корупција направена од високи функционери од СДСМ е оној политички кредит што пратениците на Филипче и Оливер Спасовски мораат сеуште да го отплаќаат со заштита на функцијата на обвинителот“.
Како што оценува Милошоски, дури и пораката од СДСМ до Државниот обвинител дека од него зависело дали ќе бил “со штитот или на него”, повеќе звучи како кодиран сигнал од еден кон друг бизнис клан, отколку како парламентарен принцип поврзан со владеењето на правото.
Сепак, вели тој, добро е што ВМРО-ДПМНЕ остана доследна на своите позиции и тука не треба да се застане.
„Иако денес ги видовме политичките покровители на Државниот обвинител во Собранието, сепак корозијата на репутацијата на ЈО во најголем ја прават десетина актери внатре во самото обвинителство. Заради ваквите околности, како и заради силната порака која денес ја доби од Собранието, најдобро е ЈО Коцевски да си поднесе оставка, бидејќи спонзорството од ДУИ и СДСМ само дополнително ќе му го руши и угледот, и интегритетот на обвинителството во целина“, пишува Милошоски.
Македонија
(Видео) Драчево бара лежечки полицајци на „Јустинијан Први“: Не утре, туку сега, пред да има мртви

„Колку животи треба да се изгубат на улица „Јустинијан Први“ за конечно да се преземе нешто?
Денеска повторно автомобил излета од коловозот и заврши во двор на жител. Само по среќа немаше жртви. Но до кога ќе се потпираме на среќата? Утре тоа може да биде нечиј син, ќерка или родител згмечен на тротоар“, реагираат граѓаните преку социјалните мрежи на ѕидот на општината Кисела Вода по тешка сообраќајка на улицата.
„Години наназад алармираме на оваа улица се вози како на автопат! Нема лежечки полицајци, нема контрола. Се што некогаш беше поставено, одамна е уништено од нашите сонародници, во 3 часот ноќе со копач ги корнат и со камиони кочат на нив да ги одкорнат, а институциите молчат. Нивната незаинтересираност е директна закана за животите на жителите“, стои во објавата.
Доста е, како што вели во напишаното револтиран жител, со празни ветувања и молк.
„Бараме итни мерки, поставување на лежечки полицајци. Не утре, не, кога ќе има средства, туку сега пред да има мртви!
Ако општината и надлежните органи продолжат да си ги затвораат очите, секоја идна несреќа и секоја изгубена жртва ќе биде нивна одговорност нивно злосторство со премолчена дозвола!
Градоначалниче Орце Ѓорѓиевски, те повикуваме да реагираш!
Жителите на оваа улица очекуваат од тебе итно да се постават лежечки полицајци.
Време е безбедноста на граѓаните да биде на прво место пред да дојде до трагедија“, стои во напишаното на социјалните мрежи.
Македонија
Три активни пожари во државата, чешкиот „Блек Хок“ слета во Скопје, утре ќе гаси на Готен

На територијата на државата има вкупно 20 пожари на отворен простор, информираат од ЦУК за состојбата до 18:30 часот.
Според последните информации од центарот, активни се три пожари на територија на државата, шест се под контрола а единаесет се изгаснати.
Активни се три пожари:
1. Општина Василево, Општина Радовиш и Општина Берово:
с. Нивичино, на планината Голем Готен и Малешевските планини (нискостеблеста шума, смрека, грмушки и ниска вегетација);
2. Општина Прилеп:
с. Бешиште, место викано Бешишки Рид, друг крак према с. Градешница (Опш. Новаци) и трет крак према границата со Р. Грција.
Не се интервенира поради детонации (мешана шума);
3. Општина Прилеп и Општина Кавадарци:
помеѓу селата Царевиќ, Смолани, Радобил и Дрен (Општина Прилеп), и Галиште и Трстеник (Опш. Кавадарци)
(мешана шума и нискостеблеста вегетација);
Под контрола се шест пожари:
1. Општина Македонски Брод: с. Грешница (мешана шума и сува трева);
2. Општина Македонски Брод: с. Латово (ниска вегетација и деградирана шума);
3. Општина Штип: помеѓу селата Драгоево и Селце (нискостеблеста шума, прнар и сува трева);
4. Општина Карбинци: с. Јунузлија (шума);
5. Општина Македонски Брод: помеѓу селата Црешево, Локвица и Крапа (деградирана дабова шума, грмушки и ниска вегетација);
6. Општина Македонска Каменица: с. Ќосевица (борова шума);
Изгаснати се 11 пожари:
1. Општина Струга: с. Велешта (запалено стрниште);
2. Општина Старо Нагоричане и Куманово: с. Облавце, с. Бељаковце, с. Довезенце, Орах и Руѓинце, се шири кон селата Димонце и Коњух (Опш. Кратово) – загрозува куќи и помошни објекти (ниска вегетација);
3. Општина Кичево: с. Горно Црско (ниска вегетација и ниска шума);
4. Општина Желино: помеѓу селата Церово и Групчин (нискостеблеста и деградирана шума);
5. Општина Петровец: с. Средно и с. Долно Коњаре (мешана шума);
6. Општина Петровец: Катланово (ниска вегетација);
7. Општина Крива Паланка: с. Нерав (висока борова шума);
8. Општина Новаци: с. Рапеш (запалени бали);
9. Општина Прилеп: с. Кантларци (ниска вегетација);
10. Општина Прилеп: ул. Јоска Јордановски (ниска вегетација);
11. Општина Охрид: с. Ботун (ниска вегетација).
Директорот на ДЗС, Стојанче Ангелов попладнево појасни дека чешкиот „Блек Хок“ со седумчлена посада слета на аеродромот Скопје и утре наутро ќе почне со дејство врз пожарот на планината Готен од беровската страна.
Овој моќен хеликоптер со ведро од 3,4 тона како што појасни Ангелов, е дел од меѓународната помош која е најавена за да помогне во справување со пожарите во земјава. Помошта ќе дојде од Чешка и Словенија.