Со месеци сме сведоци на незапаметен хаос во македонското јавно здравство – хаос што не е само бројка, не е само статистика. Тоа се човечки судбини, животи доведени во опасност поради неспособноста на Арбен Таравари и Владата на ДПМНЕ, истакна на прес-конференција Душанка Георигиева Трпевски, членка на Извршниот одбор на СДСМ.

Најтешко е, вели таа, за оние кои немаат време да чекаат – онколошките пациенти.

„Луѓето кои се борат за својот живот сега се принудени да водат уште една битка, битка со системот што треба да ги заштити.

Нема лекови, нема соодветни услови, чекањата се бесконечни, нема доволно лекари. Голготата на онколошките пациенти не запира, а институциите молчат!

Прво немаше биолошка терапија на Клиниката за онкологија, а сега, цели еден месец, не функционира ниту единствениот државен ПЕТ-скенер.

Ова не е само неспособност – ова е директен напад врз здравјето и животот на стотици пациенти низ целата земја“, оценува пратеничката на СДСМ.

Власта, како што наведува, бездушно ги остава без неопходната медицинска услуга, додека министерот Таравари и Владата на ДПМНЕ покажуваат целосна неспособност да го управуваат здравствениот систем.

„Ова мора да запре. СДСМ бара итна одговорност – од директорката Невена Маневска, од министерот за здравство Арбен Таравари, од сите кои дозволија оваа катастрофа да се случи.

Министерството за здравство веднаш мора да ја стави во функција неопходната дијагностичка апаратура! Ова не е политика, ова е живот. Граѓаните не смеат да бидат жртви на неспособноста и негрижата на оваа власт“, децидна е Георигиева Трпевски.

Министерот за дигитална трансформација, Стефан Андоновски се обрати на 9-тото издание на „Italian design day“, во организација на Амбасадата на Република Италија во соработка со Италијанската трговска агенција. Андоновски истакна дека ова е одлична прилика и можност да се разговара со нашите пријатели од Италија, и преку примери да размениме искуства за предизвиците и можностите со кои се соочува нашата држава за надминување на нееднаквстите, урбана иновација, технологија и одржливост.

Андоновски на настанот се осврна и на тоа дека фокусот на министерството е следење на трендовите и технологиите, и дека министерството е посветено на креирање на систем кој обезбедува достапни и инклузивни услуги за сите граѓани.

„Нашиот фокус е да ја направиме технологијата да биде разбирлива и лесно достапна, да ја понудиме едноставноста и ефикасноста која ќе го намали товарот за секој граѓанин.” изјави Андоновски.

Тој додаде дека нееднаквосите не се решаваат преку еден проект или едно решение, туку тоа е контиуниуран процес кој бара посветеност, иновација и партнерство меѓу јавниот и приватниот сектор, како и постојана едукација на сите наши граѓани.

„Мојата визија е да изградиме едно општество каде технологијата не само што ја подобрува секојдневната ефикасност, туку го прави животот на секој граѓанин полесен, подобар и подостапен.” заврши во своето обраќање министерот Андоновски.

Покрај камерите на улиците во рамките на „Безбеден град“, кои ќе ги ловат прекршоците во сообраќајот, полицајци со возило опремено со специјални камери ќе ги снимаат погрешно паркираните возила. Министерот за внатрешни работи Панче Тошковски вели дека проектот „Безбеден град“ ќе понуди повеќеслојно системско решение за поголема сообраќајна култура.

„Дел од имплементацијата на ‘Безбеден град’, во иднина ‘Безбедна држава’, ќе бидат и возила што ќе бидат целосно опремени со паметни камери и при движење во рамките на одредени сообраќајници, улици, ќе ги констатираат сите погрешно паркирани возила. Тие веднаш ќе бидат процесирани во рамките на системот врз основа на компјутерска обработка на податоците што ќе бидат внесени во системот“, рече министерот Тошковски.

Тој нагласи дека имплементацијата на проектот „Безбеден град“ суштински е веќе почната оти од 1 јануари годинава при регистрација на возилата се бара сопствениците да остават електронска адреса и телефонски број. За една година, односно до 1 јануари 2026 година, кога министерот Тошковски очекува да почне да функционира новиот систем за казнување на прекршоците во сообраќајот, ќе бидат собрани податоците од сите возила, што ќе биде основа за новиот систем да почне да функционира.

Пред да почнат на граѓаните да им стигнуваат казни, министерот Тошковски и денес рече дека ќе има тест-период од неколку месеци, во кој ќе бидат само известувани за направените прекршоци.

„Очекувам оној тест-период што го најавивме, бидејќи целта не ни е да ги казнуваме граѓаните сами по себе, туку да ја смениме сообраќајната клутура и да ги намалиме бројките, да го има. Ќе го имплементираме одреден временски период, неколку месеци граѓаните ќе добиваат пораки, ќе бидат известувани кога ќе сторат одреден прекршок, а притоа тој ќе биде констатиран, ќе се уверат дека системот функционира. Од 1.1.2026 година ќе ги овозможиме законските предуслови тоа да биде онака како што треба да биде“, рече министерот Тошковски.

Во тек е измена на 5 закони, односно на Законот за безбедност на патиштата, Законот за прекршоците, Законот за возилата, Кривичниот законик и Законот за извршување на санкциите, кои се клучни за функционално системско решение.

Измената на законите министерот Тошковски вели дека е прв приоритет за Министерството. Во наредниот месец ќе се работи на измените на законите и министерот очекува на крајот на март веќе да биде готова првичната верзија за во април измените да влезат првин во владина, а потоа и во собраниска процедура.

Паралелно со измените на законите, министерот Тошковски рече дека интензивно работат и на подготовка за изградба на катна гаража во кругот на Министерството за 500 возила и ги повика градоначалниците и сите други фактори во општеството да го следат примерот и да дадат свој придонес за поголема сообраќајна култура.