Уривањето на дивоизградените платформи на угостителските објекти на Охридското Езеро немаат никаква врска со препораката на УНЕСКО, а ниту по сесијата на Комитетот за светско наследство во Баку, нема значајна промена во намерата на нашите власти да прикажат, и пред УНЕСКО и пред домашната јавност, посветеност кон зачувување на нашето најголемо природно и културно богатство, велат од еколошкото здружение на граѓани „Фронт 21/42“. Од таму велат дека на четири месеци до крајниот рок за исполнување на препораките нашата земја не е ни блиску до суштинско посветување на нивно исполнување.

„Деновиве во јавноста е актуелно рушењето на дивоизградените платформи во самото езеро на неколку угостителски објекти на брегот од Охридското Езеро. Сакаме да појасниме: ова нема никаква врска со препораката бр. 9 од УНЕСКО за справување со дивоградбите во регионот, туку е еден скромен почеток на основно владеење на правото во областа на урбанизмот во општината. Ова е делумно рефлектирано во изјавата на градоначалникот на Охрид по повод уривањето на платформите – и самиот потврдува дека ова е поместување од мртва точка, иако ние не го гледаме како значајно, но секако се согласуваме дека ‘конечно во Охридскиот Регион мора да почне да се почитуваат правото и законот’. Секако, го поздравуваме и гледаме како позитивен чекор секој пример на почитување на домашните закони од страна на властите (и локални и централни), истовремено сметаме дека земја што се смета спремна да почне преговори за членство во Европската Унија треба да има (и практикува) многу (многу!) повисоки критериуми во областа на основното владеење на правото“, се наведува во соопштението од „Фронт 21/42“.

Во однос на исполнувањето на препораката од УНЕСКО, кое, според Здружението, не е почнато барем според јавно достапните информации, има повеќе елементи кои сериозно загрижуваат и повторно упатуваат на заклучокот дека ни по сесијата на Комитетот за светско наследство во Баку нема значајна промена во намерата на нашите власти да прикажат и пред УНЕСКО и пред домашната јавност посветеност кон зачувување на нашето најголемо природно и културно богатство.

„Во акциониот план на општините Охрид и Струга студиите за влијание на евидентираните дивоградби врз исклучителните универзални вредности на светското наследство се планираат дури во 2021 година. Нема никакви пречки овие постапки да почнат уште веднаш – актуелната власт имаше обврска да ја спроведе оваа мерка до декември 2018. Нема ниту една логична причина зошто клучната постапка во справувањето со дивоградбите се одлага на толку долг временски период. Се прашуваме дали некому му е потребен толку долг период за кроење на инвентарот на дивоградби, кои ќе бидат предмет на овие студии… Со оглед на фактот дека овие студии ќе определат кои дивоградби ги нарушуваат вредностите и треба да се рушат (се разбира, доколку бидат стручно и независно изработени) – рушењето на дивоградбите од препораката на УНЕСКО можеме најрано да го очекуваме кон крајот на 2021 и почетокот на 2022“, велат од „Фронт 21/42“.

Од  таму велат дека не им е јасно кој дел од светското наследство нашите власти го сметаат за незаштитен појас и врз основа на што?

„Границите на заштитениот појас/подрачје се јасно дефинирани во Законот за Охридскиот Регион (и досието во УНЕСКО) и тие ги вклучуваат целосно општините Охрид и Струга и делумно општината Дебарца – ова се единствените граници што го дефинираат заштитеното подрачје, нема други. Клучното прашање што нè мачи во врска со инвентарот е дали во овие 1.076 евидентирани дивоградби се наоѓаат дивоградбите што актуелната власт ги легализира од 2017 со речиси три години свесно прекршување на итната мерка побарана од УНЕСКО. Во изјавата на градоначалникот на Охрид препознаваме одговор на ова прашање, кој не влева надеж дека навистина значајно ќе се мрднеме од мртва точка. Имено, Георгиески јасно потенцира дека не може да постапуваат не само за нелегалните градби што оваа власт ги легализира игнорирајќи го УНЕСКО туку и за оние за кои се поднесени барања за легализација. За да ја спроведе оваа препорака, навистина ќе му треба суштинска поддршка од централната власт, но тешко дека ќе ја добие од нив, кои неколку месеци по добивањето на оригиналната препорака, наместо да го стопираат легализирањето, го продолжија Законот за легализацијата. Клопчето во кое сите власти од осамостојувањето на Македонија до денес го заплеткаа највредното во државава е толку заплеткано што само државник со многу поинакво размислување и пристап од сите до сега, ќе успее да го отплетка“, велат од Здружението.

Од таму велат дека додека Охрид и Струга имаат барем напишана определба да ја спроведат оваа препорака во 2021-2022, Општина Дебарца нема ниту план ниту намера да запре со легализациите на дивоградбите.