Македонија
Функционерите шест месеци земаат 78 отсто повисоки плати оти премиерот Ковачевски не сака да избрза со новото решение, па и тоа да падне на Уставен суд
Место во април, веднаш откога Уставниот суд ја донесе одлуката платите на функционерите да се зголемат 78 %, премиерот Димитар Ковачевски вели дека вчера била отворена дискусија како би требало да изгледа новиот модел за пресметка на плати со кој тие ќе се намалат оти не сакаат да избрзаат со решението, па и тоа да падне на Уставен суд. Премиерот Ковачевски објаснува дека новото решение треба да се усогласи со многу страни оти не се носи одлука само за платите на министрите, туку и за градоначалниците, судиите, обвинителите, пратениците…
„Мора да биде прифатливо, прво, од правен аспект затоа што двапати е носено решение, кое паѓа на Уставен суд. Не еднаш, туку двапати. Второ, уште пред да се донесе одлуката на Уставниот суд, јас реков дека се работи на закон за плати со кој треба да се стави ред во платите во јавниот сектор. Да се знае која е највисока плата и потоа како одат нивоата на платите во согласност со одредени критериуми. Во Министерството за администрација и информатичко општество исто така во изминатиот период работеа на тоа решение. Тоа мора да биде усогласено со повеќе страни бидејќи зборуваме за плати што се однесуваат не само на 21 член на Владата, туку се однесуваат на 120 пратеници, на 80 градоначалници, на речиси 600 судии, 300 обвинители и така натаму. Не дефинираат плата само на 20 министри, кои ќе донесат одлука и потоа ќе отиде решението, кое не е усогласено со никого, ќе влезе во собраниска процедура. Дури и да се донесе некое решение, кое не е издржано, тоа повторно ќе заврши на Уставен суд, како што, повторувам, двапати имаше такви решенија“, рече премиерот Ковачевски.
Министри од областа на трудот и социјалата и од економските ресори работат на новото решение за чија изработка премиерот Ковачевски им дал рок од две недели во кои треба да изготват работна верзија. Тој денес, по посетата на компанијата „Вивакс“, одговарајќи на новинарско прашање за намалување на платите на функционерите, уште еднаш повтори дека одлуката што ги зголеми платите е всушност на Уставниот суд, кој го одмрзна 12-годишното замрзнување на платите, кои требало да се покачуваат по 6,5 % годишно. Потсети дека на Уставен суд падна и обидот во корона-кризата функционерите да се стават на минимални плати.
„Затоа во рамките на Владата беше формирана работна група која е составена од министри, од областа на трудот и социјалата, од економските ресори, кои ќе треба да изработат решение што ќе биде одржливо и нема пак да биде предмет на поништување од Уставниот суд. Носење решенија што го дерогираат системот на плати, каде што за некои вработени важи еден систем на пресметување плата, а за други друг систем за пресметување на плата, зборувам за јавниот сектор, ќе значи веднаш реакција, како во два случаја досега, и третпат од страна на највисоката судска инстанција“, рече премиерот Ковачевски.
По кој нов коефициент ќе се пресметуваат платите премиерот Ковачевски не можеше да каже оти за разни функции имаат разни коефициенти оти се во разни области.
Уставниот суд во март годинава ја донесе одлуката со која 78 % се зголемија платите на 1.050 избрани и именувани лица. Во меѓувреме, на протести за поголеми плати излегоа и сè уште излегуваат здравствените работници, судските работници, пензионерите, а студентите се пожалија дека гладуваат додека функционерите се луксузираат со зголемување на и онака високите плати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска: Како никој не се сети да им каже во ЕУ дека самите во член 4 гарантираат немешање во внатрешните работи и почитување на уставните структури
Како може некому да ветите дека ќе го смените Уставот, кога Уставот може да го сменат само пратениците во Уставот. Како знаете, дека вие можете однапред да ветите нешто што не е ваша надлежност?, му порача кандидатката за претседателка од ВМРО-ДПМНЕ, Гордана Силјановска-Давкова на нејзиниот опонент Стево Пендаровски во телевизиско соочување вечерва.
„Деновиве Макрон даде изјава дека ЕУ не е само територија, туку е концепција на човештвото и правото. Е, од тоа тргнувам и јас кога размилувам за ЕУ. За нејзините темелни вредности и принципи без кои таа не е политине заедница туку е само машинерија. Значи таа не е догма. Што ќе направам јас? Најпрво ќе направам регионални чекори. Штом ќе завршат изборите јас сакам да разговарам со моите соседи и заради регионалната политика и заради очекуваната поддршка од нив. Сакам да објаснам дека и кога има една преговарачка рамка не е логична заканата со вето. И дека може, дури и кога преговарачката рамка е ваква, низ интерпретација поинаква да се примени. Од типот, ако вие речете дека нема да употребувате вето за идентитески прашања, за историските дилеми и слично, протоколите, туку за Копенхагенските критериуми, јас ќе бидам сосема согласна. Значи, мислам дека е време кога ќе се смени власта, да чуе што мислиме и ние. Оти тоа е дијалогот што е нужен за добрососедски односи. Ако некој не го кажувал и ова досега, веројатно и тогаш било се во нивни раце“, рече Силјановска-Давкова.
Понатаму, како што додаде, како никој не се сетил да им каже на оние од Советот и од Европската комисија и сите останати со тоа се рушат темелните вредности на ЕУ? Бидејќи ЕУ гарантира во членот 4 почитување на уставните и политичките структури, немешање во внатрешните работи, почитување на дигнитет и интегритет, различности, неставање на билатерални спорови во рамката. Ако тоа не го кажете, вие ќе останете на прагматичните решенија.
Доаде и дека ниту еден од темелите на кои почивала програмата на Пендаровски во 2019 година не останале. Сите се урнале и ништо не е остварено.
Македонија
СДСМ за Димитриевски: Ароганција е кога човек-партија одработува против своите довчерашни сопартијци
Ароганција е кога човек-партија одработува против своите довчерашни сопартијци и во тоа нема ништо социјалдемократски ниту вредносно туку единствено и само личен интерес, реагира СДСМ по обвинувањата кои ги упати Максим Димитриевски од ЗНАМ, дека дозволиле отварање на бугарски клубови во Македонија и нивната ароганција е ненадминлива.
„За тоа кој ги отвораше клубовите со имиња како Ванчо Михајлов адресата е Белиот дворец на ДПМНЕ. Многу позната адреса каде ЗНАМ ги договара идните чекори за соработка заедно со поддршката на Гордана Силјановска Давкова.
Освен сликите на Ванчо Михајлов по штабовите на ДПМНЕ доволно говорат сликите на Мицкоски со основачите на тие клубови по манастирите низ државава за кои не слушнавме ниту збор од ЗНАМ.
Дали е тоа поради враќање на стари долгови за локалните избори 2021 година во Куманово или нови долгови јавноста ќе види многу скоро“, се вели во реакцијата на СДСМ.
Македонија
Утревечер и во петок нестабилно време со пороен дожд и грмежи
Времето утре ќе биде променливо облачно.
Од пладневните часови на повеќе места ќе биде нестабилно со пороен дожд и грмежи, локално во форма на краткотрајно невреме со засилен ветер и услови за изолирана појава на град. Услови за пороен дожд ќе има во текот на ноќта. Минималната температура ќе биде во интервал од 6 до 12, а максималната ќе достигне од 18 до 25 степени.
Во Скопје променливо облачно. Од пладневните часови во делови од котлината ќе биде нестабилно со пороен дожд, грмежи, засилен ветер и услови за изолирана појава на краткотрајно невреме. Минималната температура ќе се спушти до 12, а максималната ќе достигне до 23 степени, јавува УХМР.
Во наредните денови, следува период на променливо облачно време со повремени локални врнежи од дожд. Утре, во ноќта кон петок и во петок на повеќе места ќе има развој на нестабилна облачност проследена со пороен дожд и грмежи, локално во форма на краткотрајно невреме со засилен ветер и услови за изолирана појава на град.
Дневната температура од утре до сабота ќе биде во постепено опаѓање, а во недела ќе се покачи за 2 до 4 степени..