Македонија
Хелсиншкиот комитет: Пандемијата ја продлабочи нееднаквоста на лицата со попреченост

Пандемијата само ги интензивира и ги исфрли на површина проблемите со кои секојдневно се соочуваат лицата со попреченост, нивните родители и лицата што се грижат за нив, а државата сѐ уште заостанува во исполнување на обврските од Конвенцијата за правата на лицата со попреченост, покажува анализата на Хелсиншкиот комитет за човекови права, која е посветена на ефектите што пандемијата ги имаше врз лицата со попреченост во земјата, а е изработена со поддршка на Фондацијата за демократија на Вестминстер.
Од Хелсиншкиот појаснуваат дека истражувањето е спроведено преку преглед на документи, прашалници до институции и организации и анкета во која учествуваа 219 испитаници, кои се лица со попреченост или лица што се грижат за лица со попреченост.
Дамир Незири, претставник во земјата на Фондацијата за демократија на Вестминстер, посочи дека клучниот елемент од оваа анализа се препораките и обидот да се извлечат заклучоци за тоа како институциите може да ги поддржат и да се грижат за овие граѓани во периодот што следува, но и во однос на долгорочните ефекти по кризата.
Исто така, се утврдило дека мерките за спречување ширење на Ковид-19 и за намалување на ефектите врз граѓаните речиси и да не ги зеле предвид лицата со попреченост. Па, така, овие граѓани се соочиле со предизвици до пристапот до права и услуги, здравствена заштита, социјални услуги, движење, финансии, работни односи и образование.
Извршната директорка на Хелсиншкиот комитет за човекови права, Уранија Пировска, нагласи дека уште на почетокот на пандемијата беше јасно дека најмаргинализираните ќе ги трпат најстрашните ефекти.
„Институциите, а особено здравствените, беа ставени во служба на борба против пандемијата. Од тие причини, токму луѓето со попреченост се соочуваа со неможност да дојдат до оние здравствени услуги што им се потребни, како рехабилитација, која отсуствуваше, неможност да пристапат кон пунктовите за тестирање, отежнатост на децата со попреченост да ја следат наставата и зголемени финансиски трошоци за лекови и други помагала за да можае да опстанат во време на пандемија“, изјави Пировска.
Многу од испитаниците се соочиле со влошување на работната ситуација преку откази, намалени примања, намалени работни часови и отсуства од работа. Во образовниот процес предизвик била пристапноста на наставата за разните видови попречености и немањето техничка опрема и соодветна поддршка.
Хелсиншкиот комитет нагласува дека оваа криза го продлабочува постојниот јаз и дискриминацијата со која се соочуваат лицата со попреченост. За да се намали штетата од пандемијата, според комитетот, треба итно да се дејствува.
Во претстојниот период е клучно институциите да се фокусираат на обезбедување мерки што ќе ги намалат негативните ефекти од ковид-кризата врз оваа група граѓани и да ги вклучат лицата со попреченост и нивните претставнички организации во процесите на донесување одлуки за политиките и програмите, посочува Хелсиншки комитет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Забрана за возила од денеска на спојот на улиците „Димитар Илиевски Мурато“ и „Широк Сокак“

Од вечерва почнува забраната на моторниот сообраќај од 19:00 до 00:00 часот на спојот на улицата „Димитар Илиевски Мурато“ и улица „Широк Сокак“ во Битола.
„Поради отпочнување на спроведување на одлуката за означување на условите и утврдување на режимот на сообраќај во централното градско подрачје, Ве известуваме дека во периодот 10.06.2025 (вторник) до 10.09.2025 во терминот од 19:00 до 00:00 часот, се забранува моторниот сообраќај со поставување на физички препреки на спојот на улицата „Димитар Илиевски Мурато“ и улица „Широк Сокак“, со што се овозможува безбеден пешачки сообраќај“, соопшти Општина Битола.
Македонија
Стојкоски: Најодговорно изјавувам дека во Ѓорче Петров нема да се градат „хемиски фабрики“

Во последниот период, сведоци сме на сериозни и крајно неосновани тврдења изнесени од страна на градоначалничката на Град Скопје, г-ѓа Данела Арсовска, со кои се обидува да предизвика паника, несигурност и сомнеж кај јавноста околу урбанистките процеси и планови на територијата на Општина Ѓорче Петров, вели градоначалникот Александар Стојкоски, на обвинувањата од градоначалничката на Град Скопје, Данела Арсовска, дека ќе се градат хемиски фабрики.
„Најодговорно, пред целата македонска јавност, изјавувам дека на територијата на нашата општина не постои ниту една локација на која е предвидена, ниту ќе се дозволи, изградба на објекти од тешка индустрија, а уште помалку – таканаречени „хемиски фабрики“, како што таа тенденциозно наведува. Нејзината реторика е обид за свесно извртување на фактите со цел да се наметне лажна слика и политичка конфузија. Ги повикувам сите институции, граѓани и медиуми да ја погледнат реалната слика: На локацијата за која се прават шпекулации, постои постоечки објект со намена Г2 – лесна и незагадувачка индустрија, согласно важечкиот Генерален урбанистички план на Град Скопје, кој и самата градоначалничка има обврска да го почитува“, вели Стојкоски.
Тој вели дека објектот поседува сопствена пречистителна станица, под постојан надзор на Министерството за животна средина и сите релевантни државни органи. До денес, додава Стојкоски, нема ниту една еколошка забелешка или проблем, напротив, тој ги надминува и најстрогите еколошки нормативи пропишани со нашите закони.
„Дополнително, со новиот детален урбанистички план што го усвоивме, три и пол пати е намалена површината со намена за индустрија, во споредба со претходниот план. Тоа е податок што граѓаните мора да го знаат, бидејќи вистината е дека токму нашите одлуки одат во насока на заштита на животната средина и балансиран урбан развој. Очигледна е немоќта и неуспехот во работата на градската власт, што резултира со оваа низа на напади, манипулации и неосновани обвинувања. Од поставување над министерства и инспекторати, сега гледаме обид за наметнување и над одлуките на Уставниот суд, кој веќе донесе јасна одлука дека општина Ѓорче Петров не донела ниту еден противзаконски акт – иницијативата на г-ѓа Арсовска беше целосно отфрлена. Јавноста заслужува одговорно водење, а не евтин политички театар. Ѓорче Петров ќе продолжи да се развива транспарентно, без притисоци, со посветеност на граѓаните и во рамки на законот“, вели градоначалникот на Општина Ѓорче Петров.
Македонија
(Фото) Целосно реновирани управните служби во зградата на МРТВ: „Веќе нема да има хаос“

Министерот за внатрешни работи Панче Тошковски денеска заедно со раководството на Министерството го пушти во употреба реконструираното Одделение за управни работи – Скопје кое се наоѓа во зградата на МРТВ.
Тошковски образложи дека реконструкцијата почна кон крајот на месец октомври минатата година, и според него, била една од стратешките планови на ова раководството на МВР со цел граѓаните да добиваат брзи и ефикасни услуги кои ги плаќаат и ги заслужуваат.
„Веќе нема да има хаос, неред и граѓани со нарушено достоинство кога е потребно да се извади личен документ или било која услуга која ја дава овој Оддел. Целта на реконструкцијата е граѓаните да имаат можност за брзи и ефикасни услуги, да го штедат своето време и сето тоа да биде на достоинствен начин како што заслужува секој македонски граѓанин. Со реконструкцијата и реновирањето засега опфатени се 20 т.н. кабини за сликање кои ќе извршуваат повеќе работни функции и ќе даваат повеќе услуги на граѓаните, реконструирана е големата шалтер сала која во наредниот период ќе ги опслужува граѓаните во делот на издавањето на пасошите по итна и редовна постапка, личните карти по итна постапка, возачките дозволи, уверенија за државјанства заедно со сите останати постапки во врска со барањата за прием и отпуст од државјанства, промена на лично име и други, како и услуги од областа на возилата“, потенцираше министерот Тошковски.
Министерот за внатрешни работи Тошковски истакна дека заедничкиот простор кој е наменет и за граѓаните и за вработените е опремен на начин кој ќе овозможи секој граѓанин да се чувствува пријатно за времетраењето на давањето или чекањето на конкретната услуга.
Во реконструкцијата во оваа фаза се реконструирани и 15-на канцеларии за вработените, санитарните чворови, инсталиран е целосно нов централен систем за ладење и греење и извршено е целосно сервирање на надворешните окови, во насока објектот да биде што повеќе енергетски ефикасен.
Тошковски на крајот подвлече дека паралелно со процесот на дигитализација во кој многу од услугите кои ги дава МВР ќе бидат достапни и дигитално, ќе се продолжи со отворање на нови канцеларии на управни служби онаму каде што тие не се достапни за граѓаните, а веќе се отворени шест нови, како и реконструкција и модернизација на други каде што е потребно.