На иницијатива на градоначалничката на Град Скопје г-ѓа Арсовска, а согласно Статутот на јавното претпријатие, вчера на седница на Управниот одбор на претпријатието се донесе одлука со која е предвидено намалување на цените на услугите за паркирање на јавните површини во зоните на паркирање во градот Скопје, истакна директорот Христовски на денешната прес конференција.

Христовски додаде дека согласно одлуката за измена на Ценовникот на услуги на Јавното претпријатие Градски паркинг, намалувањето се однесува на час паркирање во следните зони:

-Зона А0 паркирањето од 100 денари, се намалува на 75 денари.

-Во зона А од 50 денари, се намалува на 40 денари,

-Во зона Б од 40 денари, износот за паркирањето се намалува на 30 денари и

-И во зона Ц и Д, цената за еден час паркирање од 30 денари се намалува на 25 денари.

Ваквата одлука за поевтинување на паркирањето во Скопје влегува во сила по добивање согласност од Советот на Град Скопје, а истата ќе се применува од 01.03.2022 година.

Христовски потенцираше дека со усвојување на оваа одлука, а сред економска криза, кога цените растат, Јавното претпријатие Градски паркинг им излезе во пресрет на барањата на граѓаните за поевтин паркинг во градот и го реализира она кое е ветено пред скопјани.

Нашата цел како Јавно претпријатие е со своите одлуки секогаш првенствено да бидеме транспарентни во своето работење, да бидеме во служба на граѓаните и да ги реализираме правовремено барањата на граѓаните во градот Скопје, вели директорот Христовски.