Македонија
Царовска во посета на ПМФ: Науката мора да се развива
Министерството за образование и наука оваа година има 12 отсто повисок буџет за наука, но исто така ќе продолжи да инвестира и во научен кадар, рече министерката Мила Царовска по денешната посета на Ботаничката градина при Природно-математичкиот факултет во Скопје.
„Она за што дискутиравме и во Министерството пред некој месец беше дека им недостига човечки потенцијал. За да создаваат наука, да може да се развиваат, потребни им се луѓе, потребни се научници, кои од претходни студенти ќе станат дел од академскиот свет и понатаму ќе ја развиваат науката. И токму затоа, заедно со Министерството за финансии, со премиерот Зоран Заев, успеавме да обезбедиме согласности, со цел тие да остварат вработување, но и понатаму да вложуваат. Затоа што науката мора да се развива. Со години имавме застој во вложувањата и во човечкиот потенцијал кој треба да создава наука, но и финансиски инвестиции за да може да се учествува и на меѓународни и на домашни научни проекти. Токму затоа во буџетот на Министерството за 2021 година има 12 проценти повеќе финансиски средства за наука“, изјави министерката Царовска.
Во тек е процесот на утврдување критериуми кои центри за извонредност и кои национални проекти би се избрале за да се инвестира во нив. Царовска нагласи дека ќе следи нов, системски пристап кон инвестиции во наука, како значаен сегмент поврзан и со економијата во државата, но и со развој на човечкиот потенцијал и капацитет.
В.д. деканот на ПМФ, Валентин Мирчески, рече дека по многу години, имаат исклучително конструктивна дебата со МОН.
„Конечно, разбрана е потребата за кадровско зајакнување на Факултетот. По толку години отсуство на вработувања на академски кадар, на технички кадар, од Министерството, конечно, добивме серија вработувања. Почнавме една исклучително важна дебата и во контекст на состојбата со научноистражувачкиот сектор, со финансирањето на науката, и се надевам дека и во тој сектор ќе имаме квалитативно поместување нанапред, дека конечно ќе видиме активни програми што ќе ја поддржат научноистражувачката работа во нашата земја“, изјави Мирчески.
Раководителката на Институтот за биологија, проф. Рената Ќуштеревска, која е и одговорна за Ботаничката градина, нагласи дека вработувањата на тројцата млади луѓе следуваат по децениска заборавеност на Институтот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лукровски најави бесплатни прегледи за остеопороза за жени над 50 години во „Систина“
Кандидатот за градоначалник на општина Карпош од ВМРО-ДПМНЕ, Сотир Лукровски, најави проект за бесплатни прегледи за остеопороза во соработка со приватната болница „Аџибадем Систина“.
Тој истакна дека по неговото доаѓање на градоначалничката функција, по 10 жени постари од 50 години месечно ќе добиваат бесплатен преглед за остеопороза, што ќе биде дел од поширока иницијатива за превентивна здравствена заштита.
Лукровски додаде дека целта е „општината да биде сервис за уште подобри услови за работа во здравствените установи, како пред сè за пациентите така и за вработените“.
„Со моето доаѓање во општината дојдов со предлог да отпочнеме со превентива кај популацијата на жени над 50 годишна возраст и договоривме пакет или ветување дека месечно по 10 жени односно 120 годишно, и ако тоа го преточиме во еден, нели, градоначалнички мандат, 480 жени, госпоѓи ќе добијат преглед во делот на борба против остеопорозата преку Декса скен, мислење и понатамошен третман,“ изјави Лукровски.
Тој се заблагодари на менаџментот и лекарскиот тим на болницата и додаде дека веќе разговарале и за други можности со кои општината може да помогне на граѓаните.
Македонија
Средба на Сиљановска-Давкова со професорите Мартиновски и Конески
Претседателката Гордана Сиљановска – Давкова денеска ги прими проф. д-р Владимир Мартиновски, декан на Филолошкиот факултет „Блаже Конески“ и проф. д-р Атанас Конески, претставник на Културен и едукативен центар „Небрегово“, именуван по родното место на Конески.
Професорите ја информираа за преземените активности врзани за одбележувањето на 80 години од стандардизацијата на македонскиот литературен јазик, како и 80 годишнината од основањето на Филолошкиот факултет во Скопје.
Обајцата ја аргументираа заложбата за измена на Законот за државни награди заради додавање на наградите „Блаже Конески“ и „Ремзи Несими“.
За нив, најдобро време за доделувањето на наградите е месец декември, кога објацата се родени: Конески на 19-ти, а Несими на 25-ти.
Со гордост истакнуваат дека двајцата биле професори на Филолошкиот факултет и она што е Конески за македонскиот јазик и македонистиката, е Несими за албанскиот јазик и албанологијата.
Сиљановска-Давкова е убедена дека пратениците ќе ја препознаат оваа благородна идеја и со големо мнозинство ќе го изгласаат Законот за изменување и дополнување на Законот за државни награди.
За неа, Конески и Несими се духовни великани на македонскиот и на албанскиот јазик, чии имиња одамна требало да симболизираат врвни достигнувања во белетристиката.
Македонија
На Клиниката за неврологија отворен ден за граѓаните за подигнување на свесноста и превенција од мозочен удар
По повод Светскиот ден на мозочниот удар – 29 октомври, Универзитетската клиниката за неврологија, утре организира отворен ден за граѓаните за подигнување на свесноста за превенција, препознавање на симптомите рана дијагностика и навремено лекување на мозочниот удар, под мотото „Мозочниот удар се лекува“.
Во рамките на настанот, на 28 октомври 2025 година (вторник), ќе се врши бесплатен доплер на каротидни артерии за сите заинтересирани граѓани, без потреба од упат, во периодот од 10:00 до 12:00 часот, во просториите на Клиниката за неврологија.
Со овој настан, Клиниката велат од таму, испраќа порака за важноста на редовните прегледи и контролата на ризик факторите кои можат да доведат до мозочен удар, како што се покачен крвен притисок, шеќер во крвта, зголемени масти, пушење и седечки начин на живот.

